¿Wiˈix mbäät ndukniˈˈijxëmë jemyatypyë yˈëwäˈx kyäjxwäˈxët?
1. ¿Wiˈix mnayjäˈäjë ko tim ogäˈän ojts mnejxy käjxwäˈxpë?
1 ¿Mjamyejtsypy ko tim ogäˈän ojts mnejxy käjxwäˈxpë tëjkm dëjkm? Seguurë ko mjantsy tsyëˈkë. Per ¡jantsy oy mnayjäˈäjë ko naty mnejxy mët ja diˈib myaˈëxpëjkëp o mëdë wiinkpë käjxwäˈxpë parë mbudëkëyaˈanyëty! Ets tyam mnijäˈäbë net kajaa wiˈix xytyuunëdë Diosë tyuunk, listë net mˈity parë xytyukniˈˈixët diˈib näämnëm tëjkëp käjxwäˈxpë.
2. ¿Ti naybyudëkë tsyojktëbë nmëguˈukˈäjtëm diˈib näämnëm tëjkëp käjxwäˈxpë?
2 Yëˈë nmëguˈukˈäjtëm diˈib näämnëm tëjkëp ëwäˈx käjxwäˈxpë tsyojktëbë naybyudëkë, extëm wiˈix dyajtsondäˈäktëdë maytyaˈaky, wiˈix dyajtunëdë Biiblyë tëjkm dëjkm, wiˈix tnijëmbitëdë jäˈäy, wiˈix mëët yˈëxpëjktsondäˈägët ets wiˈixë net dyaˈëxpëkët. Per nan tsyojktëbë naybyudëkë mä wiˈix tmëtmaytyäˈägëdë jäˈäy nëˈääy tuˈääy ets mä jyuy tyooktë. ¿Wiˈix mbäät xypyudëkë? Mët ja mˈijxpajtën ets mët ko xyˈanëëmët wiˈix mbäät mas oy ttuny.
3. ¿Wiˈix mbäät nbudëjkëmë nmëguˈukˈäjtëm diˈib jemy mët ja ijxpajtën diˈib nmoˈoyëm?
3 Nyäjkëm ja ijxpajtën. Jesus tyukniˈˈijxë ja yˈëxpëjkpëty wiˈix kyäjxwäˈxët (Luk. 8:1; 1 Peed. 2:21). Pääty ko mnëjxäˈänët käjxwäˈxpë mët tuˈugë nmëguˈukˈäjtëm diˈib jemy, oy ko jawyiin xywyinmayët wiˈixë jäˈäy xymyëtmaytyäˈägäˈäny parë ja mmëguˈuk tniˈˈijxtuˈudët, mbäät ja jäˈäy xymyëtmaytyaˈaky extëm nyaˈˈanmäˈäyëm mä ëxpëjkpajn. Ets ko naty jam mdëjkˈayoˈoytyë mbäät jawyiin mgajxy tuk tëjk majtsk tëjk parë ja mmëguˈuk tmëdowët, ets ok, ta net xyajtëwët wiˈix të tmëdoy. Duˈuntsoo ja diˈib jemy tˈixët tiko yˈoyëty nëjxëm käjxwäˈxpë mëdë nmëguˈukˈäjtëm, ets nan nëjxëp tkupeky ko xyˈanëëmët wiˈix mbäät mas oy ttuny.
4. ¿Wiˈix mbäät nbudëjkëmë nmëguˈukˈäjtëm diˈib jemy ko naty të nmëdoˈojëm wiˈixë jäˈäy të tmëtmaytyaˈaky?
4 Nˈokˈanmäˈäyëm wiˈix mbäät mas oy ttuny. Jesus nan ojts ttuˈumoˈoy ja yˈëxpëjkpëty wiˈix yˈëwäˈx kyäjxwäˈxtët (Mat. 10:5-14). Mbäät nanduˈun xytyuny. Ko ja mmëguˈuk diˈib jemy tmëtmaytyäˈägëdë jäˈäy, mmëdoogukë yajxon. Ets ko mtsoˈonëdët, ta xyˈanëëmët ti të xyˈoymyëdoy ets ko jantsy oy të ttuny, oyxyëp të xyjaˈixy ko tam muum të tyëgoyˈäjtxëty. Kyaj wiˈix xynyaˈˈanëëmët, nek oy ko xyˈixët pën nanduˈun tyëgoy mä ja tuˈukpë tëjk. Pes mbäät duˈun të jyaty mët ko tsyëˈëgë. Jamyats ko kyaj niˈamukë nmëdäjtëm tuˈugyë ja wijyˈäjtën ets ko tëgäjtsp wiˈix tijaty nduˈunëm (1 Kor. 12:4-7).
5. ¿Wiˈix mbäät nˈanmäˈäyëm ja nmëguˈukˈäjtëm ko nbudëkëyäˈänëm?
5 Näˈäty mbäät këˈëm ja nmëguˈukˈäjtëm mˈamdoyëtyë käjxwijën. Per pën kyaj, ta xyˈëxtäˈäyëdë winmäˈäny wiˈix yajxon xyˈanëëmët. Näägë nmëguˈukˈäjtëm diˈib jeky kujk tyuunë duˈun jeˈeyë tˈanëëmëdë: “¿Mbäät nmoˈoy tuˈugë käjxwijën?” o “¿Wiˈix mˈokwinmay extëm të xymyëtmaytyaˈagyë jäˈäy?”. O mbäät ja tuk peky xyˈanëëmë: “Kots ndëjkë käjxwäˈxpë yëˈëjëts ojts xytsyiptakxë..., per diˈibëts xypyudëjkë yëˈë...”. Näˈäty oy ko nimajtsk xykyäjxtët wiˈix nyajmoˈoyëmë käjxwijën mä Wiˈix nduˈunëmë Diosë Tyuunk. Tukˈix jeˈeyë tuk peky mä të tyëgoy net kyaj wiink nyayjawëdët.
6. Mä Diosë tyuunk nduˈunëm, ¿wiˈixë duˈun ja pujxn dyajjëjpë myëëbujxn?
6 Pujxn yajjëjpëbë myëëbujxn. Timotee jekyë naty kujk yˈëwaˈxy kyäjxwaˈxy, perë apostëlë Pääblë ojts yˈanëˈëmxëty ets niˈigyë wyimbajtˈadëˈëtsët ets niˈigyë tjatët ja jäˈäy ttukniˈˈixët (1 Tim. 4:13, 15). Pääty oy jeky kujk mjakäjxwaˈxy, mbäät niˈigyë xyjaty wiˈixë jäˈäy xytyukniˈˈixët. Mbäät tijaty mdukniˈˈixëty ja mmëguˈuk diˈib mëët mdëjkˈayoˈoytyë oy jeky kujk kyatuny. Pëkë kuentë wiˈix mbäät xypyudëkë mmëguˈuk tsuj yajxon, ets mas ja diˈib jemy, duˈuntsoo nëjxëp jantsy oy tkäjxwäˈxy ja oybyë ää ayuk (Pro. 27:17).