Ja Faraongë kyumäˈäy

JA BINË yäjkpë kyaj tnekynyimaytyakyë Josee mä Faraón, ta nyajxy majtsk jëmëjt ets ja Josee tapyëm pujxndëgoty. Mä tuˈugë ux, Faraón majtsk ok kyumääjy tim tëgatsy, ets kyaj tnijäˈäjë wiˈix nyikejy ja kyumäˈäy. ¿Mˈijxypy ko tyam myaˈay? Ja kum bom ta Faraón tmëjwoojy ja wijy jyaˈayëty diˈib yajnikajtëbë kumäˈäy ets ttukmëtmaytyaky wiˈixë nety të kyumäˈäy. Per kyaj tjäjttë dyajnikajtët.

Taanëm ja binë yäjkpë tjamyejtsyë Josee. Ta tˈanmääjy ja Faraón: Kots nˈijty pujxndëgoty tapë nety tuˈugë yetyëjk diˈib yajnikejpyë kumäˈäy. Ta ja Faraón netyë ojts tniˈanaˈamë ets ja Josee yajjuudët pujxndëgoty.

Ta tˈanmääyë Josee: Të ngumäˈäyëts jëxtujkë bakë niˈxatypyë, oyatypyë, ets nan jëxtujkë pagiˈixatypyë ak päjk päjk. Ets ta tyäˈädë bakë pagiˈixatypyë të ttsuˈtstäˈäy ja bakë niˈxatypyë.

Mätsë myëmajtskˈokpë të ngumäˈäy, të nˈixyëts tuk kopkë triigë diˈib myëdäjtypy jëxtujkë xyäj jantsy tuktikyaty. Ets ja tuk kopk, nan jëxtujkë xyäj per ak wëëts xaats. Ets ta diˈibë xyäj ak wëëts xaats, të tjëˈëndäˈäy ja diˈibë xyäj jantsy oyaty.

Ta ja Josee tˈanmääjy ja Faraón: Tadë majtskpë mgumäˈäy tiˈigyë nyikejy. Tadë jëxtujkpë tsäjkääjë niˈxatypyë, etsë tadë jëxtujkpë triigë xäj diˈib oyaty, yëˈë yˈandijpy jëxtujk jëmëjt, ets nyikejy ko jëxtujk jëmëjt yˈitäˈänyë jeˈxy peky yä Ejiptʉ. Etsë tadë jëxtujkpë tsäjkääjë pagiˈixatypyë mëdë jëxtujkpë triigë xäj diˈib wëëts xaats, nan jëxtujk jëmëjt tˈandijy, ets nyikejy ko myinäˈänyë yuu jëxtujk jëmëjt.

Pääty tˈanmääjy ja Faraón: Winˈix tuˈugë yetyëjkë wijypyë diˈib yajnipatëbë jeˈxy peky nëˈën yˈitäˈäny jëxtujk jëmëjt. Net kyaj yuuˈooktëdë jäˈäy mä tadë jëxtujk jëmëjtpë yuu myinäˈäny.

Ja Faraón yˈoymyëdoo extëm yaˈanmääjy. Ta twinˈijxyë Josee ets dyajnaymyukëdëdë jeˈxy peky ets dyajnipatët, ta tkutujkënymyoojy ets yˈitët extëmë myëmajtskpë anaˈambë jap Ejiptʉ.

Kyum tuktujk jëmëjt, ta Josee tˈijxmiiny niganäägë yetyëjk. ¿Pënatyëdaa? ¡Yëˈë ja nimäjkpë yˈajtsy! Yëˈë netyë tyeety të kyaxëdë ets tjuytyëdë jeˈxy peky Ejiptʉ, yëˈko jam Kanán mä tsyëënëdë të nety yˈagëjxënë ja jeˈxy peky. Josee yˈëxkäjp ja myëgaˈaxëty, per yëˈë kyaj yˈëxkäjpëdë. ¿Mnijäˈäp tiko? Yëˈko Josee të yaˈkpajnë, ets tëgatsy ja wyit nyijam diˈib pyëjtakypy.

Josee ta tjamyejtsy mä wiˈix kyumääjy ko myutskˈäjty, mä tˈijxy nyiminëdë myëgaˈaxëty ets nyiwindäˈägëdë. Extëm yaptsoo të xyˈokkäjxpë, ¿mjamyejtsypy? Päätyë Josee tjaygyujkë ko Diosë nety të kyexyëty, ets ko tam tidën nety të yajtuknigexy. ¿Ti netë Josee tyuun? Min nˈokˈijxëm.