Josee twinmäˈänyˈixy ja myëgaˈaxëty

JOSEE yëˈë nety nyijawëyaampy pën ja nimäjkpë myëgaˈax dëˈënyëm yˈaxëkjäˈäyˈattë, ets pën nan dëˈënyëm kyaj tmëdattë paˈayoˈon. Pääty tˈanmääjy ja myëgaˈaxëty: Miitsëty käjpn niˈijxpë të mindë. Yëˈë mˈixandëp pën mëkëtsë nnax ngäjpn.

Ta ja myëgaˈaxëty yˈatsoodë: Kyaj, kyajts të nmindë käjpn niˈijxpë. Tëyˈäjtënëts njënäˈändë. Ak tukaˈaxëts ëëtsëty. Jatsë nety ndukkaˈaxˈattë nimäjmajtsk per tuˈuktsë nmëgaˈax kyaj pënnë, ets ja tim mutskpë tam ja të wyeˈemy mëdëtsë ndeety.

Josee ta dëˈën nyaybyëjtakë extëm kyaj tmëbeky. Ta ojts dyajweˈemy ja Simeonk pujxndëgoty. Ta tˈanmääjy ja myëgaˈaxëty: Mënëjxtë jeˈxy peky mä mjëën mdëjk, per ko ja tëgok mjëmbittët yëˈëts ntsojkypy ets xymyëmindët ja mëgaˈaxë tim mutskpë.

Ko ja Josee myëgaˈaxëty jyäjttë Kanán, ta ttukmëtmaytyaktë tyeety ti nety të tyuny të jyatyëty. Jakoob ta jyotmaytyuktëjkë ets jyënany: Josee kyaj pënnë, ets tyamë Simeonk nan kyaj pënnë. Kyaj, kyajts ngaxäˈänyë nmutsk määnk Bejamingʉ. Per ko ja jeˈxy peky ojts yˈagëjxënë, kuanë ko Jakoob ojts tkajxnë ja Bejamingʉ ets nëjx ja jeˈxy peky tjuytyë jap Ejiptʉ.

Ko Josee tˈijxmiinyë myëgaˈaxëty ets tˈijxy ko ta ja yˈutsyë tim mutskpë myiny, ta jyantsy xyondaky. Per ja myëgaˈaxëty kyaj tnijawëdë pën yëˈë, yëˈëdënë Josee diˈib anaˈamp Ejiptʉ. Min net nˈokˈijxëm ti tyuunë Josee ets twinmäˈänyˈijxy ja nimäjkpë myëgaˈax.

Ojts ttukˈaneˈemy ja tyuumbëty ets dyaˈujtstäˈäyët ja myëgaˈaxëtyë xyäˈk, ets tpëjtäˈägët mä ja Bejamingʉ xyäˈk ja platë kopë diˈib yëˈë jyaˈäjtypy. Ta ja myëgaˈaxëty ojts tsyoˈonëdë, per tamë nety waanë nyanëjxtë ko ja Josee tkejxy ja tyuumbëty ets tnaspäädëdët, ets ko tnaspatëdë ta tˈanmääytyë: ¿Tikotsë nwintsënë kyopë të xymyaˈtsëdë?

Ta niˈamukë yˈatsoodë: Kyajts ti të nmaatstë, per pën ja xypyaaty pën tmëdatyë tadë kopë, yaˈook.

Ta tˈëxtääytyaaytyë mä tëgekyë xäˈk, ets jap ja kopë tpattë mä Bejamingʉ xyäˈk, extëm yam xyˈixy mä dibujë. Ta ja Joseejë tyuumbë yˈanmääyëdë: Niˈamukë miitsëty mbäät mjëmbijnëdë, perë Bejamingʉ yëˈëts nmëjëmbijttëp. ¿Ti net tyuundë ja Bejamingʉ myëgaˈaxëty?

Niˈamukë tpajëmbijttë ja Bejamingʉ mä ja Josee tyëjk. Per ja Josee tˈanmääjy ja myëgaˈaxëty: Niˈamukë miitsëty mbäät mnëjxnëdë mä mnax mgäjpn, perë Bejamingʉ yëˈëts yä nyajweˈempy extëmtsë nduumbë nmosë.

Net ja Judaa jyënany: Pën nyajweˈembyëtsë tyäˈädë nˈutsy, oogëptsë ndeety, yëˈko mëk ttsoky, nek oyëts ëjts nwëˈëmët, tunë mayˈäjtën, ets waˈanëtsë tyäˈädë nˈutsy tnejxy.

Ta ja Josee tˈijxy ko ja myëgaˈaxëty të tyëgatstë. Kyaj nyekyˈaxëkjäˈäyˈattë extëm ijty, ets myëdäjttëbë paˈayoˈon. Minë net nˈokˈijxëm ti tyuunë Josee.