Ja wyandakënë Jeftee

¿TË NÄˈÄ xyˈoktuumbë tuˈugë wandakënë ets okë net mtsiptakxëty xykyuytyunët? Dëˈën jyajtyë tyäˈädë yetyëjk diˈib yam mˈijxypy, ets pääty yam axëëk jyantsy nyayjawëty. Txëˈäjty Jeftee, yëˈë tuˈugë yetyëjk diˈib ijt jotmëk, tyuuny fes jam Israel.

Jeftee ja jyukyˈajty mä ja israelitëtyë nety kyaj tnekyˈawdattë Jyobaa. Mä jatëgok axëëk jyantsy adëˈëtstë. Päätyë Jyobaa nyaˈijxëdë ets ja amonitëty yˈaxëktunëdët. Per ta tmënuˈkxtaktë Jyobaa ets tˈanmääytyë: Tëts mijts nmëbokytyundë. ¡Pudëjkëdëtsëk!

Ja israelitëty axëëk nyayjäˈäjëdë ko ttundë axëkˈäjtënë. Per ta dyaˈijxëdë ko jodëmbijttëp ko jatëgok tˈawdäjttë Jyobaa. Päätyë Jyobaa pyudëjkëdë.

Ta ja israelitëty twinˈijxtë Jeftee ets tniwintsënˈatët ja tsip mä tsyiptunäˈändë mët ja amonitëty. Jeftee mëk ttsojky etsë Jyobaa pyudëkëdët mä ja tsip. Pääty ttuuny ja wandakënë ets tˈanmääjy: Pën mijts xyajmadakpëts, yëˈëts mijts nmoˈoyëbë tadë jäˈäy diˈib jawyiin pëtsëëm mätsë ndëjk, diˈibëts xyjëjpˈyoˈopy mätsë nety ojts të ntsiptuny.

Jyobaa myëdoo ja Jeftee wyandakënë ta dyajmadaky mä ja tsip. Ta ko jyëmbijty, ¿mnijäˈäp pën jawyiin pëtsëëm ets ojts jyëjpˈyoˈoyëty? Yëˈë ja tyuˈuk nëëx. Ta ja Jeftee jyëëjy yaxy ets jyënany: ¡Ay uˈunk jaˈa! ¡Extëmëts xytyim jotmay myooynyë! Per tëts ndunyë wandakënë mä Dios ets kuanëtsë net nguytyunët.

Ko ja Jeftee nyëëx tnijäˈäjë wiˈixë nety ja tyeety të ttunyë wandakënë, ta yˈokjotmaytyuktëjkë, yëˈko nyikaˈagaambyë nety ja tyeety etsë myëtnaymyaayëbëty. Per ok, ta oy nyayjäˈäjë ko tmëdunäˈänyë Jyobaa nëˈën ja xyëë jyukyˈäjtënë mä ja tabernakulo jam Silo. Pääty tˈanmääyë tyeety: Pën mijts të xytyunyë wandakënë mä Jyobaa, pes ta net xykuytyunët.

Ta ja Jeftee nyëëx ojts nyëjxnë jam Silo, ets jam ja xyëë jyukyˈäjtënë dyajnäjxy tmëdunyë Jyobaa mä ja tabernakulo. Ja toxytyëjkëty diˈib Israel ja nëjx kyuˈixëdë taxk xëë tuˈukpë jëmëjt, ets yˈit xyondë jam mëët. Ja jäˈäy mëk ttsojktë ja Jeftee nyëëx, yëˈko jantsy oyë Jyobaa Dios tmëduny.