Tuˈugë kiixy diˈib yajxondakë tyeety etsë Jyobaa

¿Mˈijxypyë tyäˈädë kixyuˈunk diˈib mä dibujë?... Tyäˈädë kixyuˈunk ja tyeety txëˈäjty Jefté. Mä Biiblyë kyaj yajnigajpxy ti tyäˈädë kixyuˈunk txëˈäjty, per nyigajpxypy ko yajxondakë tyeety etsë Jyobaa. Min nˈokˈijxëm wiˈix yajnimaytyäˈägäˈänyë tyäˈädë kixyuˈunk mëdë tyeety.

Jefté jantsy oyjyaˈay yˈijty ets jyuˈtë tiempë parë ja nyëëx ttukniˈˈijxë pënën Jyobaa. Nan yëˈë ijty tuˈugë yetyëjk diˈib kumëjää ets oy tniwintsënˈäjty ja käjpn. Pääty ja israelitëty yˈanmääyëdë: ¿Oy mijts xynyiwintsënˈatët mä nëjkx ntsiptunäˈänëm?

Jefté ta tˈanmääyë Dios parë yajmadäˈägëdët mä nëjkx tsyiptunäˈäny. Ets ta ttukwandaky ko pën yajmadakëp, ta tmoˈoyaˈany ja tim jawyiimbë jäˈäy diˈib jëjpˈyoˈoyëˈkëp ko nety jyëmbity. Etsë tyäˈädë jäˈäy jam tsyëënët mä ja Diosë tyëjk ets jam tyunët nuˈunë xyëë jyukyˈäjtën. Mä ja Diosë tyëjk, jam ijtyë jäˈäy nyëjkxtë Diosˈawdäjtpë. ¿Ojtsëdaa Jefté myadaˈaky? Ojts. Ets ko jyajty mä tyëjk, ¿pëndaa tim jawyiin ojts jyëjpˈyoˈoyeˈegyëty?...

¡Yëˈë ja nyëëx! Jeˈeyë nety tuˈugë nyëëx ets kuanë ko nety tkëyakët. Jefté mon tuk jyantsy nyayjäˈäwë. Per jamyats ko të nety duˈun twandaˈaky. Pääty ko ja nyëëx tnijäˈäwë, ta yˈanmääyë: Tatë, pën të Jyobaa duˈun xytyukwandaˈaky, kuytyunë net.

Ja nyëëxë Jefté nan mon tuk nyayjäˈäwë, pes ko nyëjkxët tsënaabyë mä ja Diosë tyëjk, kyaj nety mbäät pyeky ets tpäädëdë yˈuˈunk yˈënäˈk. Per yëˈë niˈigyë nety ttunäˈäny diˈibë tyeety wyandak, ets nan yajxondäˈägaambyë netyë Jyobaa. Tyäˈädë yëˈë diˈib mas jëjpˈam pyëjtak, ets kyaj ko pyëkët o ko tpäädëdë yˈuˈunk yˈënäˈk. Pääty ojts nyijkxy tsënaabyë mä ja Diosë tyëjk ets jam yˈijty nuˈun ja xyëë jyukyˈäjtën.

Ko duˈun ttuuny, ¿ojtsëdaa dyajxondaˈagyë tyeety etsë Jyobaa?... ¡Ojts dyajxondaˈaky! Pën mijts mëdoop ets mtsejpyë Jyobaa, mbäät mˈity extëm ja Jefté nyëëx. Nan mbäät xyajxondaˈagyë mdääk mdeety etsë Jyobaa.