Ja wandakën diˈib tyuunë Jefté

Ja israelitëty jyaˈaytyëgooytyë jatëgokë Jyobaa ets ta tˈawdäjttsondaktë kanäägë Dios diˈib kyaj tyëyˈäjtënëty. Per ja diosëty diˈibë nety yˈawdäjttëp kyaj ojts kyuwäˈänëdë ko nyibëdëˈkëdë ja jäˈäyëty diˈib Ammón. Duˈun kanäk jëmëjt ja israelitëty yˈayoowdë. Ok, ta Jyobaa tˈanmääytyë: “Tëts nbokytyundë. Tunë mayˈäjtën yaˈˈawäˈätspëtsëëmdëgëts mätsë nmëtsipëty”. Ta ja israelitëty dyajkutëgooytyë ja awinax ets ta jatëgok tˈawdäjttsondaktë Jyobaa. Yëˈë mëk tjäˈäwë ko tˈijxˈayooy.

Pääty ja israelitëty twinˈijxtë tuˈugë tsiptuumbë diˈib xyëwˈäjt Jefté. Yëˈë diˈibë nety nyiwintsënˈataampy ja tsip mä nëjkx tsyiptunäˈändë mët ja jäˈäyëty diˈib Ammón. Jefté ta tˈanmääyë Jyobaa: “Pën xyyajmadaktëbëts mä tyäˈädë tsip, nwandakypyëts nmoˈoyëdë tadë jäˈäy diˈibëts tim jawyiin xyjëjpäädëˈkp kotsë nety njëmbity”. Jyobaa myëdoowˈijt ja nyuˈkxtakënë Jefté ets ta dyajmadaky.

Ko Jefté jyëmbijty mä ja tyëjk, ja tim jawyiimbë jäˈäy diˈib ojts jyëjpäädëˈëgyëty yëˈë ja nyëëx, diˈibë nety tukpäjk. Ta pyëtsëëmy jyantsy yˈetsy ets tjantsy dyajjënäˈäny ja pyujxnxijtën. ¿Ti tyuunë Jefté? Ta tjamyejtsy extëmë netyë Jyobaa të tˈanëëmë ets jyënany: “¡Ay tsyulë! Mëkëts njawë, tëtsë Jyobaa ti ndukwandaˈaky, ets parëts nguytyunët, tsojkëp ngaxët Siló mä ja tabernakulo”. Ta ja nyëëx yˈatsooy: “Tatë, pën yëˈë Jyobaa të xytyukwandaˈaky, oy ko xykyuytyunët. Diˈibëts jeˈeyë nˈamdoopy, yëˈë etsëts xykyaxët majtsk poˈo mëdëtsë nmëtnaymyaayëbëty tungëjxy kopkëjxy. Ok, tatsë net nëjkxët mä ja tabernakulo”. Ja nyëëxë Jefté xëmë tmëduunyë Jyobaa ets tyuuny mä ja tabernakulo nuˈunë xyëëw jyukyˈäjtën. Ets ja myëtnaymyaayëbëty jëmëjt jëmëjt ijty kyuˈixëdë.