Wiˈix mbäät njukyˈäjtëm winë xëë winë tiempë

¿MNIJÄˈÄP ti yamë tyäˈädë kixyuˈunk mëdë myëtnaymyaayëbëty kyäjxtëp? Yëˈë tadë liibrë diˈib mijts yam mgajxypy... Maytyaˈaky diˈib miimp mä Biiblyë. Ets nan yëˈë jam kyäjxtëbë tyäˈädë maytyaˈaky... “Wiˈix mbäät njukyˈäjtëm winë xëë winë tiempë”.

¿Mnijäˈäp ti jam yˈëxpëjktëp? Yëˈë jam yˈëxpëjktëp ko tim jawyiin tsojkëp nijäˈäjëm tijaty mä Jyobaa ets mä yˈUˈunk Jesús parë njukyˈäjtëm winë xëë. Pesë Biiblyë jyënaˈany ko yëˈë dëˈën ja tuˈu diˈib nëjxp mä jukyˈäjtënë winë xëë winë tiempë. Pääty nijawë mas mä tyäˈädë Diosë tëyˈäjtënbë ets mä yˈUˈunk Jesukristʉ.

¿Wiˈix mbäät nijäˈäjëm mas mä Jyobaa Dios ets mä yˈUˈunk Jesús? Tuk nax net ko xykyäjxëdë tyäˈädë liibrë mä tsyondaˈaky axtë mä kyexy. Tyäˈädë liibrë kajaa tnimaytyaˈagyë Jyobaa mëdë Jesús, ¿këdii? Ets myaytyakypy nandëˈën tijaty të ttundë ets tijaty tyunandëp. Per tsojkëp jatuˈugë liibrë ngäjxëm.

¿Mˈijxypyë tadë liibrë diˈib jam naxkëjxy? Yëˈë Biiblyë. Anëëmë pën ets mdukwingugäjxëdë Biiblyë mäjaty yajpäätyë tyäˈädë maytyaˈaky. Biiblyë yajxon xytyukmëtmaytyakëm ti tsojkëp etsë Jyobaa nmëduˈunëm yajxon ets nbatëmë jukyˈäjtënë winë xëë. Pääty tsojkëp nmëdäjtëmë kostumbrë ets ijtp ngäjxëmë Biiblyë.

Per kyaj jeˈeyë tsyokyëty ets nijäˈäjëm tijaty diˈib mä Jyobaa etsë Jesukristʉ. Yëˈko mbäät tijaty njantsy nyijäˈäjëm mä yëˈëjëty ets kyaj nëjx mbatëmë jukyˈäjtënë winë xëë. ¿Mnijäˈäp ti mas ak tsojkëp?

Tsojkëp nguytyuˈunëm diˈib nˈëxpëjkëm. ¿Mjamyejtsypyë Juudʉs Iskaryotʉ? Yëˈë diˈib nandëˈënë Jesús yˈapostëlëˈäjt mä ja nimäjmajtskpë. Juudʉs nyijäˈäbë nety pënën Jyobaa ets pënën Jesús. Per, ¿wiˈix jyëmbijty? Ko tiempë nyajxy ta tijaty tˈatsojky ets tkëyajkyë Jesús mët ko yajmoojy 30 platë meeny. Päätyë Juudʉs kyaj tpäädäˈänyë jukyˈäjtënë winë xëë winë tiempë.

¿Mjamyejtsypyë Geˈasii, diˈib yajmaytyakp mä maytyaˈagyë 69? Yëˈë myëdatanë wit etsë meeny sentääbë diˈib kyaj tjaˈajëty, ets pääty yˈandaky, perë Jyobaa ta tyukumëdoojë. Ëtsäjtëm nan xytyukumëdowäˈänëm nandëˈën pën kyaj nmëmëdoˈojëmë yˈanaˈamën.

Per jukyˈäjttë nandëˈënë jäˈäy diˈib xëmë myëduundë Jyobaa ets kyaj tmastuttë. Ëtsäjtëm nan kyaj nmastuˈudäˈänëmë Jyobaa, ¿këdii? Tuˈugë ijxpajtënë yëˈë ja mixyuˈunk Samwel. Ok jamyats extëm të nˈëxpëjkëm mä maytyaˈagyë 55, jeˈeyënëmë nety taxk o mëgoxkë jyëmëjt ko ojts tmëduuntsondaˈagyë Jyobaa mä ja tyëjk. Pääty oy mijts mutsknëmëty, kyaj nëgoo mdimmutskëty ets xymyëdunëdë Dios.

Pën mas mbäät mbajoˈomëmë yˈijxpajtënë yëˈë Jesukristʉ. Mutsknëmë nety ko yajpaty mä ja Diosë tyëjk tnimaytyaˈagyë Tyeetyë tsäjpotmëdë, extëm të nˈijxëm mä maytyaˈagyë 87. Nˈokpajoˈomëmë yˈijxpajtënë, nˈoktukmëtmaytyakëmë jäˈäy tadë nDiosˈäjtëm Jyobaa etsë yˈUˈunk, Jesukristʉ. Pën nduˈunëm dëˈën, nëjxëp njukyˈäjtëm winë xëë winë tiempë yä Naxwiiny mä ja it lugäärë tsujpë diˈibë Dios yakaampy.