¿Wiˈixë Jesus wyinmääy mä politikë?
MÄ EVANGELIOS tap kanäk peky yajnimaytyaˈaky diˈib xytyuknijäˈäwëm wiˈixë Jesus wyinmääy mä politikë. Extëm nˈokpëjtakëm, ko nyëbajtääy ja netyë jyëmëjt 30, ta Mëjkuˈu ojts yˈanëˈëmxëty ets yˈanaˈamët yä naxwiiny. Ok, ta mayjyaˈay jyayajtëkëyanë rey. Ets jatëgok, ta tjatsojktë etsë Jesus tnibëdëˈëgëdë gobiernë. Ko duˈumbë jotmay twinguwäˈkë, ¿ti tyuun?
Tˈanaˈamëdë naxwinyëdë jäˈäy. Mä Biiblyë tnimaytyaˈaky ko ja Mëjkuˈu ojts tjatukˈawanë Jesus ets yˈanaˈamët mä “nidëgekyë naxwinyëdë jäˈäyëty [ja yˈanaˈam kyutujkën, NM] es ja myëjˈäjtën”. ¿Tijatyxyëbë Jesus tyukmëduunë naxwinyëdë jäˈäy koxyëp ojts tkupeky? ¿Ojtsxyëp tjëjpkudijë tyäˈädë tuunk koxyëp tnijawë ko mbäät yˈoybyëtsemy ko ttuktëkëdë politikë? Jesus kyaj tkupejky diˈib yajtukˈawäˈänë (Matewʉ 4:8-11).
Tyunët rey. Ja tiempë mä Jesus jyukyˈajty, mayë jäˈäy yˈëxtääytyëbë nety tuˈugë rey diˈib kyaj dyaˈˈayowët ja nax käjpn ets diˈib yaˈoyëp ja jotmay diˈibë politikëtëjk myëdäjttëp. Pääty, ko tˈijxtë ko Jesus mbäät tijaty ttuny, ta tjatsojktë etsë Jesus tpaduˈudëkëdë politikë. Per ¿ti tyuun? Juan jyënany: “Jesus nyijäˈäjë ko jyamënëjxäˈänëdë aguanë es pyëjtäˈägäˈänëdë rey, pääty [...] abeky nyaybyëjtakë es pyatëjkë mä ja kopk es [yˈitany] naytyuˈuk” (Fwank 6:10-15). Ta jatëgokë Jesus kyaj ttuktëjkë politikë.
Tnibëdëˈëgëdë gobiernë. Mä netyë Jesus wyingoonë yˈoˈkën, ta nyimiinëdë majtsk grupë jäˈäy, tuk grupë ja farisee yˈëxpëjkpëty, diˈib kyaj tnekytsyoktë etsë Roma yˈanaˈamëdët ets ja tuk grupë yëˈë Herodesë jyaˈay diˈib kyupëjktëp ja gobiernë. Yëˈëjëty tsyojktë etsë Jesus tpuwäˈägët tuˈugë partiidë, ta dyajtëëwdë pën oy ko ja judiyëty dyaktëdë kyugëbety mä ja gobiernë diˈib Roma.
Marcos tkujäˈäyë wiˈixë Kristë yˈatsooy: “¿Tikots miits xyajkäˈäjäˈändë? Tukˈijxtëgëts ja meeny diˈibë mëët mgugëbety. Net dyajmiindë tuˈugë platë meeny. [...] Net dyajtëëy: ¿Pënë tyäˈädë wyiin jyëjp esë xyëë diˈibë yam këxjäˈäy? Ta [...] yˈatsoodë: Yëˈë yajkutujkpë kopk. Net ja Jesus yˈanmääyëdë: Pes mmoˈoytyë ja yajkutujkpë kopk ja diˈibë yëˈë jyaˈäjtypy, es mmoˈoytyë ja Dios diˈibë Dios jyaˈäjtypy” (Markʉs 12:13-17). Extëmë Jesus yˈatsooy, tuˈugë liibrë diˈib xyëˈäjtypy Teología Moral, jyënaˈany: “Jesus yëˈë duˈun jantsy Mesías, per kyaj yëˈëjëty tuˈugë mesías diˈib tyuktëjkëbë politikë diˈibë [judiyëtëjk] wyinmääytyë. [...] Jesus yëˈë tukniˈˈijxë diˈib yajnaywyäˈkxëbë relijyonk mëdë politikë”.
Ko Jesus tkatuktëjkë politikë, ¿yëˈë yˈandijpy ko kyaj tpaˈˈayooyë ayoobë jäˈäy, kyaj tmëjpëjtaky ko ja tëyˈäjtën kyayajtuny o ko jyaˈˈatyë ayoˈon? Kyaj. Pesë Biiblyë jyënaˈany ko mëk tjäˈäwë ko tˈijxy wiˈixë naxwinyëdë jäˈäy yaˈixy yajpääty (Markʉs 6:33, 34). Per oy mëk tjajäˈäwë, kyaj dyajmujkyë jyaˈay parë dyajjëjptëgoyëdë ayoˈon, oy ja jäˈäy tjatsojktë ets ttuktëkët ja amay jotmay diˈib myëdäjttë.
Tyäˈädë tëgëëkpë ijxpajtën yëˈë xytyukˈijxëm ko Jesus kyaj ojts ttuktëk ttukwäˈägë politikë. ¿Ets tyamë Dios mëduumbë? ¿Wiˈix nyayaˈitëdë?