Jyobaa kyunuˈkx ja kuˈookytyoxytyëjk diˈib Sarepta mët ko tmëdäjtyë mëbëjkën

TUˈUGË kuˈookytyoxytyëjk diˈib ayoop, jantsy jotkujk nyayjawëty, ta tmëneny ets tmëtxiˈiky ja yˈuˈunk diˈib jeˈeyë tukpäjk. ¡Kyaj tmëbëkäˈäny ti të tyuny të jyatyëty! Pes të ja yˈuˈunk jyukypyeky. Tyäˈädë kuˈookytyoxytyëjk jantsy jotkujk nyayjawëty. Ets ta yˈanëˈëmxëty ja yetyëjk diˈib të dyajjäjtaˈaky: “Okˈix, të jyukypyeky ja mˈuˈunk”.

Tam nyëjkxkojnë naa tëgëk mil jëmëjt mä duˈun jyukypyejkyë tyäˈädë mixyuˈunk ets jap yajpääty kujayë mä Biiblyë mä 1 Reyes kapitulo 17. Tyäˈädë yetyëjk diˈib jäjtak, yëˈë Elías, ja Diosë kyugajpxy, ets ja uˈunktääk yëˈë tuˈugë kuˈookytyoxytyëjk diˈib Sarepta, kyaj yajnijawë ti txëˈaty. ¡Mëjwiin kajaa kyëktëjkë myëbëjkënë ko tˈijxy ja yˈuˈunk të jyukypyeky! Min nˈokˈijxëm tuk pëky majtsk pëky ti xytyukniˈˈijxëmë tyäˈädë toxytyëjk.

ELÍAS TˈIXYˈATY JA KUˈOOKYTYOXYTYËJK DIˈIB MYËDÄJTYPYË MËBËJKËN

Ja tiempë mä ojts yˈaneˈemy ja rey Acab diˈib mëk axëkjäˈäy, Jyobaa ojts tnaskäjpxë mët yëˈëgyëjxmë Elías ko kyaj nyekytyuˈujäˈäny jam Israel. Ta netë Jyobaa tˈyuˈtsyë Elías parë Acab kyaj wiˈix tyunëdët, ets mëjˈäjtëngyëjxm ojts dyajkay ko tkejxyë yëk joon parë myoˈoyëdët ja tsäjpkaaky etsë tsuˈutsy. Ta Jyobaa yˈanmääyë: “Pëdëˈëk, nëjkx Sarepta diˈib yajpatp Sidón ets jam mwëˈëmët. ¡Okˈix! Jamëts tuˈugë kuˈookytyoxytyëjk ndukˈanaˈamäˈäny parë myajkay myaˈuugëdët” (1 Rey. 17:1-9).

Ko Elías jyajty Sarepta, ta tpaty tuˈugë kuˈookytyoxytyëjk diˈib jantsy ayoop diˈibë netyë jäˈäxy jam kyäjpmujkypy. ¿Yëˈëdaa ja toxytyëjk diˈibë nety mmoˈoyanëp ja käˈäy ukën? ¿Wiˈix myoˈoyëdët ets pën mëk ayoop? Elías ta ojts tmëgajpxyë tyäˈädë toxytyëjk, oyë nety yajxon tkanijawë pën yëˈë diˈib moˈoyanëp ja käˈäy ukën. Ta tˈanmääy: “Tunë mayˈäjtën, mëmin waanë nëë mä tuˈugë tasë parëts nˈuugët.” Ets ko nety tninëjkxy ja nëë, ta Elías yˈakˈanmääyë: “Tunë mayˈäjtën, mëmin mgëˈëjoty tuk pedasë tsäjpkaaky” (1 Rey. 17:10, 11). Ja kuˈookytyoxytyëjk kyaj wiˈix jyënany ko yaˈˈamdooy waanë nëë, per diˈib myëjjotmaybyat, yëˈë ko yaˈˈamdooy ja käˈäy ukën.

Pääty yˈatsooy: “Duˈun extëm tyëyˈäjtënëty ko jyukyˈatyë Jyobaa diˈib mijts mDiosˈäjtypy, kyajts nmëdatyë tsäjpkaaky, yëˈëyë waanë arinë mä abëjkënë mëjpë ets waanë aseytë mä abëjkënë mutskpë. Tyam yëˈëjëts ngäjpmujkypy tuˈuk majtskë jäˈäxy, ets tajëts nëjkxäˈäny parëts ti nyaˈoyëyaˈany parë ëjts ets parëtsë nˈuˈunk. Kojëtsë nety të ngääytyaˈaytyë, tajëts nˈooganëdë” (1 Rey. 17:12). ¿Ti xytyukniˈˈijxëm extëm myaytyaktë?

Ja kuˈookytyoxytyëjk yˈëxkäjp ko Elías yëˈë tuˈugë israelitë diˈib myëduumbyë Dios. Pääty jyënany: “Duˈun extëm tyëyˈäjtënëty ko jyukyˈatyë Jyobaa diˈib mijts mDiosˈäjtypy”. Tyäˈädë yëˈë xytyukˈijxëm ko waˈanë nety tˈixyˈaty ja Dios diˈib Israel, per kyaj nety tmëduny, pääty ko tmaytyakyë Jyobaa, ta jyënany, “diˈib mijts mDiosˈäjtypy”. Yëˈë, japë nety tsyëënë Sarepta, mä tuˈugë siudad diˈib yajpatp fenicia jam Sidón. Waˈanë nety ja jäˈäyëty diˈib Sarepta tˈawdattë Baal. Perë Jyobaa të nety tˈixy ko oyë jyot kyorasoonë tyäˈädë toxytyëjk.

Oyë nety tsyëënë mä tuˈugë lugäär mä mayë jäˈäy tˈawdattë awinax, myëbëjk ja Diosë tëyˈäjtënbë. Jyobaa ta tkejxyë Elías parë pyudëkëdët ja kuˈookytyoxytyëjk ets parë nanduˈun yëˈë yajpudëkët. Tyäˈädë maytyaˈaky mbäät kajaa tijaty xytyukniˈˈijxëm.

Jam Sarepta yëˈë netyë jäˈäy yˈawdäjttëbë Baal, per kyaj nety niˈamukë yëˈë tˈawdattë. Ko Jyobaa tkejxyë Elías mä tyäˈädë kuˈookytyoxytyëjk, yëˈë yaˈijxë ko pyëjkypyë kuentë pënaty myëdäjtypy oyë jyot kyorasoon, oy kyamëdunëty. Duˈunë duˈun, Jyobaa kyupëjkypy “oytyim pën jäˈäyëty diˈibë wintsëˈkëdëp es [mëduunëdëp]” (Apos. 10:35).

¿Jadaa mayë jäˈäy mä territooryë diˈib duˈun extëmë tyäˈädë kuˈookytyoxytyëjk diˈib Sarepta? Waˈan nääk tˈëxtäˈäytyë oyˈäjtën, oy yajpäättë mëdë jäˈäyëty diˈib pyanëjkxtëbë relijyonk diˈib kyaj tyëyˈäjtënëty. Waˈan tnijawëdë wanaty pënën Jyobaa o waˈan kyaj ttimnijawëdë, pääty jyëjpˈamëty ets pën pyudëkëdët parë tˈaxäjëdët ja tëyˈäjtën. ¿Nˈëxtäˈäyëmë duˈumbë jäˈäy ets nbudëjkëm?

“TIM JAWYIIN YAˈOYËTS TUˈUGË NTSÄJPKAAKY NAA MUTSK”

Minë net nˈokˈijxëm ti diˈibë Elías yˈamdoojë tyäˈädë kuˈookytyoxytyëjk. Të nety yˈanëˈëmxëty ko jeˈeyë ja käˈäy ukën tˈakmëdattë parë ja tuk tëgok tˈakkaytyët mët ja yˈuˈunk, ets ko nety të kyaaytyaˈaytyë, ta yˈooganëdë. Perë Elías ta yˈatsooy: “Këdii mtsëˈëgë. Tëkë ets tun extëm të xynyigajpxy. Per tim jawyiin, yaˈoyëts tuˈugë ntsäjpkaaky naa mutsk diˈib pik diˈib jap mmëdäjtypy, ets mëmin. Ta net ok xyaˈoyëdë mjaˈa etsë mˈuˈungë jyaˈa. Yëˈko duˈun jyënaˈanyë Jyobaa diˈib Diosˈäjttëbë Israel: Ja abëjkënë mëjpë mä arinë xyaˈity kyaj tyukwäˈätsäˈäny, ets ja abëjkënë mutskpë mä aseytë xyaˈity kyaj tyëgoyˈatäˈäny axtë koonëmë Jyobaa dyajtuˈujët yä naxwiiny” (1 Rey. 17:11-14).

Mbäät njënäˈänëm: per wiˈix, ¿tmoˈoyët ja käˈäy ukën diˈib jeˈeyë yˈakmëdäjttëp parë tuk tëgok? Kyajëdaa nety tyëyˈäjtënëty extëm jyënaˈany. Per ¿wiˈix yˈatsooy ja kuˈookytyoxytyëjk? Yëˈë, kyaj nety nëgoo tˈixyˈatyë Jyobaa, per myëbëjk extëmë Elías yˈanmääyë ets tyuun ti yajtukˈanaˈam. ¡Mëjwiin kajaa yaˈijxmäjtsyë myëbëjkën! Ets oy diˈib tyuun.

Dios kyaj tmastutyë tyäˈädë kuˈookytyoxytyëjk. Ets duˈun extëmë Elías ojts tyukwandaˈagyëty, Jyobaa yëˈë diˈib xëmë mooyë käˈäy ukën ets kyaj tyëgoyˈajty. Elías kääy uktë mët ja kuˈookytyoxytyëjk ets ja yˈuˈunk, nuˈun ja tiempë nyajxy mä kyaj tyuuy. Duˈunë duˈun, ja “abëjkënë mëjpë mä yˈity ja arinë kyaj tyukwatsy, ets ja abëjkënë mutskpë mä yˈityë aseytë kyaj tyëgoyˈajty, duˈun extëmë netyë Jyobaa të jyënaˈany mët yëˈëgyëjxmë Elías” (1 Rey. 17:16; 18:1). Koxyëp ja kuˈookytyoxytyëjk kyaj ttuuny extëm yaˈˈanmääy, waˈanxyëp jatëgok jeˈeyë ojts yˈakkaytyë, pes jeˈeyë nety jawaanë yˈakwëˈëmy ja arinë ets ja aseytë. Per yëˈë myëdäjtë mëbëjkën, tyukˈijxpajtë Jyobaa ets jawyiin dyajkääyë Elías.

Tuk pëky diˈib xytyukniˈˈijxëmë tyäˈädë maytyaˈaky, yëˈko Dios kyunuˈkxypy pënaty mëbëjkëdëp. Ko nwinguwäˈkëmë jotmay mä yaˈijxmatsyë mëbëjkën, yëˈë diˈib xypyudëjkëm. Mbäät nmëmadakëm, pes yëˈë diˈib xymyoˈoyëm tijaty, xykyuentˈäjtëm ets nmëtnaymyaayëbëˈäjtëm (Éx. 3:13-15).

Mä jëmëjt 1898, tadë rebistë Zionˈs Watch Tower (Ja Potsy diˈib Kuentˈäjtp jam Sión) ojts tnimaytyaˈaky ti xytyukniˈˈijxëm ja yˈijxpajtënë tyäˈädë kuˈookytyoxytyëjk, duˈun jyënany ko mbäädë netyë Jyobaa pyudëkëty pën yaˈijxëp ja mëbëjkën ets pën myëmëdoopy ja Elías. Pën kyaj nety dyajnigëxëˈëky ko tyukˈijxpejtypyë Jyobaa, taxyëbë wiinkpë kuˈookytyoxytyëjk ojts yajwinˈixy parë Jyobaa pyudëkëdët. Ta tˈaknimaytyakyë tyäˈädë rebistë ko nanduˈunën tyam njäjtëm. Pën nmëdäjtëmë mëbëjkën, “ta nëjkx nyajkunuˈkxëm, ets pën kyaj, ta kyaj nëjkx nˈaxäjëmë kunuˈkxën”.

Ko nwinguwäˈkëmë amay jotmay, oy ko nˈëxtäˈäyëmë Diosë nyaybyudëkë mët yëˈëgyëjxmë Biiblyë etsë ëxpëjkpajn. Ta net nguytyuˈunëm extëmë Jyobaa xyˈanmäˈäyëm oy xytsyiptakxëm. Mbäät nˈijtëm seguurë ko nëjkxëp nyajkunuˈkxëm pën nmëmëdoˈojëmë tyäˈädë käjpxwijën: “Tukˈijxpatë Jyobaa amumduˈukjot, ets këdii mgëˈëm winmäˈäny xyajtuny. Mä tukëˈëyë mnëˈë mduˈu mëjpëjtäˈäk yëˈë, ets yëˈë yajtëyëp ja mnëˈë mduˈu” (Prov. 3:5, 6).

“TË MINY [...] PARËTS XYAˈOOGËDËTSË NˈUˈUNK”

Per ta jatëgok ja kuˈookytyoxytyëjkë myëbëjkën yaˈijxmäjtsy. Duˈun yˈakˈyajnimaytyaˈaky: “Ko duˈun yˈoknäjxtääy, ta ja toxytyëjk diˈib kudëjkˈäjtp pyäˈämbejty ja yˈuˈunk, ets jantsy mëjtak ja pyäˈäm axtë yˈoˈky”. Ja toxytyëjk jyanijawëyan tiko duˈun të tyuny të jyatyëty, ta Elías dyajtëëy: “¿Ti nmëdäjtypy mët ëjts, yetyëjk diˈib myëduumbyë Diosë tëyˈäjtënbë? ¿Të miny parëts xytyukjamyatsëdë nboky ngaytyey ets parëts xyaˈoogëdëtsë nˈuˈunk?”. (1 Rey. 17:17, 18.) ¿Tiko duˈun jyënanyë tyäˈädë toxytyëjk?

¿Waˈandaa ti poky kaytyey tjamyejtsy ja kuˈookytyoxytyëjk diˈib myëkjäˈäwë? ¿Waˈan wyinmääy ko yëˈë netyë Dios tëytyuunëp ko yˈoˈky ja yˈuˈunk ets ko päätyë Dios tkejxyë Elías? Biiblyë kyaj tnigajpxy, per diˈib nyigajpxypy, yëˈko ja kuˈookytyoxytyëjk kyaj tniwäämbejtyë Dios ko yˈaxëkjäˈäyëty.

Elías kyaj tmëbëkany ko yˈoˈky ja kuˈookytyoxytyëjkë yˈuˈunk ets waˈan wyinmääy ko päätyë nety duˈun të jyaty mët ko jam yajpääty. Ta ko tmëbatëjkë ja mixyuˈungë nyiniˈkx kyëbäjk mä ja tëjk diˈib anikëjxy, ta Elías nyuˈkxtaky: “Jyobaa Dios miyë, ¿ti ayoˈon jotmay myajmiimpy mä tyäˈädë kuˈookytyoxytyëjk mäjëts njäjtaˈaky ko xyaˈoˈkë yˈuˈunk?”. Ja kugajpxy Elías kyaj tmëmadäˈägany parë axëëk wyëˈëmëdë Diosë xyëë ko tnasˈixët etsë tyäˈädë toxytyëjk diˈib oyjyaˈay ets diˈib të yajjäjtaˈagyëty niˈigyë yˈayowët. Pääty nyuˈkxtaky: “Jyobaa Dios miyë, tunë mayˈäjtën, nasˈixë parë jatëgok jyëmbitëdë jyukyˈäjtënë tyäˈädë mixyuˈunk” (1 Rey. 17:20, 21).

“OKˈIX, TË JA MˈUˈUNK JYUKYPYEKY”

Jyobaa tamë nety tmëdooˈity. Ja kuˈookytyoxytyëjk të nety dyajkay dyaˈuuky ja kugajpxy, të nety dyajnigëxëˈëgyë myëbëjkën. Waˈanë Dios tnasˈijxë parë ja mixyuˈunk myëjtäˈägët, mët ko nyijäˈäwëbë nety ko yajjukypyëkaampy. Mä Biiblyë yëˈë tim jawyiin myaytyakypy mä jyukypyejkyë tyäˈädë mixyuˈunk, ets yëˈë diˈibë nety jotkujkmoˈoyanëdëbë jäˈäy nuˈunë tiempë myiny kyëdaˈaky. Ko Elías nyuˈkxtaktääy, ta Jyobaa dyajjukypyejky ja mixyuˈunk. Nˈokpawinmäˈäyëm wiˈix ja kuˈookytyoxytyëjk jyantsy xyondaky ko Elías yˈanmääyë: “Okˈix, të ja mˈuˈunk jyukypyeky”. Ta yëˈë yˈatsoojëmbijty: “Tyam njantsy nyijäˈäwëbëtsë net ko mijtsë Dios mjäˈäyˈäjtëp ets ko Jyobaa yˈayuk diˈib pëtsëëmp mä mˈää tëyˈäjtën” (1 Rey. 17:22-24).

Jabäät yajnimaytyaˈagyë tyäˈädë kuˈookytyoxytyëjk. Per komë Jesus oy tnimaytyakyë tyäˈädë toxytyëjk, mbäät njaygyujkëm ko myëduunë Jyobaa nuˈun ja xyëë jyukyˈäjtën (Luk. 4:25, 26). Extëm yajnimaytyaˈaky, yëˈë xytyukˈijxëm ko Dios kyunuˈkxypy pënaty oyjyaˈaytyaktëp mëdë Dios mëduumbëty (Mat. 25:34-40). Nanduˈun xytyukˈijxëm ko myoopy tijaty yajtëgoyˈajtypy pënaty kyaj myastuˈutyëty, axtë mä amay jotmay tpäättë diˈib mëjwiin kajaa (Mat. 6:25-34). Nanduˈun xytyukˈijxëm ko Jyobaa tsyojkënyëˈajtypy dyajjukypyëkäˈänyë oˈkpë ets mbäät duˈun ttuny (Apos. 24:15). Duˈunë duˈun, taaˈäjtp kanäk pëky tiko mbäät njamyajtsëmë tyäˈädë kuˈookytyoxytyëjk diˈib Sarepta.

[Dibujë diˈib mä pajina 29]

Mët ko tmëbëjkyë Jyobaa, diˈib Diosˈäjtë Elías, kyaj yˈoˈky ja kuˈookytyoxytyëjk mët ja yˈuˈunk