¿Të xyajtuny diˈibë La Atalaya myëmiimpy ëxkëˈëy?
¿Të xypyekyë kuentë ko jäˈäy nmoˈoyëmë rebistë jawyiin tˈixy winduuy ets ta net tˈixy ëxkëˈëy? La Atalaya diˈib yajmoobyë jäˈäy, tap tmëminy ëxkëˈëy kanäägë yajtëˈëwën ets tijaty mbäädë jäˈäy tˈoymyëdoy, nan tap myiny ti pajina tnimaytyaˈaky.
Tyäˈädë mbäät xypyudëjkëm parë nijäˈäjëm ti mbäädë jäˈäy nyajtëˈëjëm parë nyajtsondakëmë maytyaˈaky. Duˈuntsoo pën janäämëty ngäjxwäˈxëm mä ja lugäär, mbäät mä tuˈukpë poˈo tëgatsyaty nyajtsondakëmë maytyaˈaky etsë yajtëˈëwën. Nan mbäät nyajtuˈunëm ko nbatëmë jäˈäy diˈibë jap jantsy tuump, jeˈeyë ndukˈijxëm natuˈugënë yajtëˈëwën ets nˈanmäˈäyëm: “Pën mnijawëyaampy wiˈix yaˈˈatsoojëmbity, tyäts nyajweˈemyë tyäˈädë rebistë ets ja ok ngäjx nmaytyakëm ko tiempë xymyëdatët”. Ta nmëguˈukˈäjtëm diˈib jeˈeyë jäˈäy tyukˈijxypy tijaty yajtëˈëwën miimp ets dyajtëy diˈibë yˈoymyëdoopy. Ta net ttukˈixy ti pajina yaˈˈatsoojëmbity ets ttukwingugäjxë tuˈugë tekstë diˈibë naty të twinˈixy. Mijts nan mbäät kanäk nax xywyinmay wiˈix xyajtunët diˈib miimp rebistë ëxkëˈëy parë jäˈäy tˈoymyëdowët.