Jat wiˈix oy xytyunëdë Diosë tyuunk: ko xyˈawanëdë liibrë ¿Ti tukniˈijxëbë Biiblyë?

Tiko jyëjpˈamëty. Tyäˈädë liibrë ¿Ti tukniˈijxëbë Biiblyë?, yëˈë diˈib mas nyajtuˈunëm mä ngäjpxwäˈkxëm. Per tsojkëp jawyiin nmoˈoyëmë jäˈäy pën yëˈë nyajtunäˈänëm parë ndukniˈˈijxëmë Biiblyë. Pääty, oy ko nduˈunëmë mëjää parë nnijäˈäwëm wiˈix ngëyäjkëm mä ngäjpxwäˈkxëm (Prov. 22:29). Taaˈäjtp kanäk pëky wiˈix mbäät nduˈunëm, ets mbäät yëˈë nwinˈijxëm diˈib oybyëtsëmëp mä ngäjpxwäˈkxëm.

Wiˈix nduˈunëm:

Yajtëw ja jäˈäy diˈib mbäät tˈoymyëdoy diˈib miimp mä tuˈugë kapitulo. Mbäät yëˈë xywyinˈixy diˈib miimp mä tsyondaˈaky tuˈuk tuˈugë kapitulo. Ko nety ja jäˈäy të tˈatsoowëmbity, ta xykyäjpxët tuˈugë tekstë ets xytyukˈixët ja parrafo mä tˈatsoowëmbity ets waanë mëët xynyimaytyäˈägët.
Ja tuk pëky, yëˈë xytyukˈixët ja yajtëˈëwën diˈibaty miimp mä pajina 3 parë ja jäˈäy tnijawëyäˈänët, ta net xytyukˈixëdë pajina 4 ets 5 mä wiˈixë Biiblyë tˈatsoowëmbity. Extëm nˈokpëjtakëm ko nety të xynyigajpxy tuˈugë ayoˈon diˈib të tyuny të jyatyëty, mbäät xyˈanëëmë ko mayë jäˈäy duˈun nyayajtëwëdë extëm myiny mä pajina 3. O mbäät xyˈanëëmë ko yëˈë nguˈijxëmë jäˈäy parë ndukmëtmaytyäˈägäˈänëm wiˈix myiny kyëdaˈaky ja oyˈäjtën. Tukˈixë dibujë diˈib miimp mä pajina 4 ets 5, ta xyajtëwët: “Mä tukëˈëyë diˈib yä Dios wyandakypy, ¿diˈibë mtsojkënyëˈajtypy yˈadëwët?”. Nan mbäät xyˈanëëmë ko yëˈë jäˈäy mguˈijxëp parë xytyukmëtmaytyäˈägäˈäny wiˈix yaˈˈatsoowëmbity tijaty nnayajtëˈëwëm. Tukˈix diˈib miimp mä jyëjpkëxyë pajina 6 ets yajtëw diˈib mas yˈoymyëdoopy.
Awanë netyë ja ëxpëjkën. Mbäät xyˈanëëmë: “Yëˈëjëts tyamë jäˈäy nˈawäˈänëbë tyäˈädë liibrë parë tˈëxpëktëdë Biiblyë. ¿Të xyˈokˈijxpë? [Waˈan tˈatsoowëmbity.] Pën mnasˈijxëp waanë mdiempë, yëˈë njatukˈixaampy wiˈix mbäät xyajtuny parë xyˈëxpëkëdë mgëˈëm Biiblyë”.

Tiko duˈun xykyatuny mä tyäˈädë poˈo:

Tuundäˈäktë mä mDiosˈawdattë mëdë mfamilyë.
Ko mgäjpxwäˈkxët mëdë wiinkpë nmëguˈukˈäjtëm, anëëmë wiˈixë maytyaˈaky xyajtsondäˈägäˈäny (Prov. 27:17). Pën mˈijxypy ko kyaj yˈoybyëtsëmy, ta xyajtëgatsët.