Nˈokˈyajmëjwindëjkëm ja Diosë tyuunk mä yajjamyatsäˈänyë Jesusë yˈoˈkën xëë
1. ¿Tiko njënäˈänëm ko mbäät nyajmëjwindëjkëmë Diosë tyuunk mä tadë poˈo marsë, abril ets mayë?
1 ¿Këdii oyxyëp ko xyajmëjwindëkë Diosë tyuunk mä yajjamyatsäˈänyë Jesusë yˈoˈkën xëë? Mä mayë it lugäär pojëˈkp mä tadë tiempë ets kyaj tsojk kyootsë. Ets näägë nmëguˈukˈäjtëm diˈib mëduundëp ets diˈib nëjkxtëp eskuelë ja tmëdattë byakasyonk, mbäät dyajtundë tadë tiempë parë nyëjkxtët tëjkˈayeˈebyë. Ja yajwootsondäˈägäˈänyë jäˈäy 2 äämbë abril parë nyëjkxtët 17 äämp mä yajjamyatsäˈänyë Jesusë yˈoˈkën xëë. Ko naty të nyaxy, ta jatëgok nijëmbijtëm pënaty të yˈotstë, parë nwoˈojëm mä ja diskursë espesial diˈib näjxtsondäˈägäämp 25 äämbë abril. Jaaˈäjtp kanäk peky wiˈix mbäät nyajmëjwindëjkëmë Diosë tyuunk mä tadë poˈo marsë, abril ets mayë.
2. ¿Wiˈix mbäät nyajmëjwindëjkëmë Diosë tyuunk?
2 Prekusoor ausilyaar. Tuk peky wiˈix mbäät nyajmëjwindëjkëmë Diosë tyuunk, ja ko nduˈunëm prekusoor ausilyaar. Oy ko kontiempë ndukniwijtsëm ets nˈijxëm wiˈix tijaty ndunäˈänëm, mët ko niˈamukë nˈakmëdäjtëmë tuunk (Pro. 21:5). Waˈan të xytyukniwijtsënë tijaty xytyunäˈäny mä tadë xëë poˈo, per pën kyaj tyimjëjpˈamëty, mbäät ok xytyuny (Fili. 1:9-11). Pääty, ¿tiko xykyaˈˈanëëmë wiinkpë nmëguˈukˈäjtëm parë mëët mdunët prekusoor ausilyaar?
3. ¿Wiˈix mbäädë familyë ttukniwitsë parë niˈigyë tyundët?
3 Ko mDiosˈawdattë mëdë mFamilyë, oyxyëp ko xynyimaytyäˈäktë tijaty mduknibëjktakëdëp xytyunäˈändë (Pro. 15:22). Pën mˈëmujk mgäpxmujktëp mëdë familyë, mbäät niduˈuk o nimajtsk tyundë prekusoor ausilyaar tuk poˈo o majtsk poˈo. Per pën kyaj mbäät pën duˈun tyuny, mbäät xytyukniwitsëdë parë niˈigyë xyajmëjwindëkëdë Diosë tyuunk, mët ko mnëjkxtët tsuu tsuu tëjkˈayeˈebyë o xyjuuttët niˈigyë tiempë sääbëdë domingë.
4. ¿Wiˈix wyimbëtsëmäˈäny ko tyam nyajmëjwindëjkëmë Diosë tyuunk mä yajjamyatsäˈänyë Jesusë yˈoˈkën xëë?
4 Jyobaa pyejkypyë kuentë ets mëjwiin kajaa dyajtsobääty ko nduˈunëmë mëjää parë niˈigyë nyajmëjwindëjkëmë tyuunk (Ebre. 6:10). Ets agujk jotkujk nayjäˈäwëm ko Jyobaa nmëduˈunëm etsë nmëguˈukˈäjtëm (1 Cró. 29:9; Apos. 20:35). ¿Këdii oyxyëp ko xyajmëjwindëkë Diosë tyuunk mä yajjamyatsäˈänyë Jesusë yˈoˈkën xëë? Ko duˈun xytyunët, ta mëjwiin kajaa xypyäädëdë jotkujkˈäjtën etsë kunuˈkxën.