¿Mdunäämp prekursoor ausilyaar?

1. ¿Tiko yˈoyëty nyajmëjwindëjkëmë Diosë tyuunk mä xëë poˈo kyëdaˈaky mä yajjamyatsäˈänyë Jesusë yˈoˈkën xëë?

¹ Nˈokˈyajmëjwindëjkëmë Diosë tyuunk mä xëë poˈo kyëdaˈaky mä yajjamyatsäˈänyë Jesusë yˈoˈkën xëë. Pes ja mbäät nwinmäˈäyëm wiˈixë Jyobaa ojts dyaˈixyëty mëjwiin kajaa tsyojkën ko tkejxyë yˈUˈunk parë ojts xyjuˈuybyëtsëˈëmëm (Fwank 3:16). Mëjwiin kajaa nmëjjäˈäwëm, pääty nˈawanëyäˈänëmë jäˈäy tijatyë Jyobaa tyukmëduumbyë naxwinyëdë jäˈäy (Is. 12:4, 5; Luk. 6:45). ¡Ets jantsy jotkujk nnayjäˈäwëm ko nwoˈowäˈänëmë mëjëmbäˈä mëdëjkpäˈä, jiiky mëguˈuk etsë pënaty nˈixyˈäjtëm mä yajjamyatsäˈänyë Jesusë yˈoˈkën xëë! Ets ok, ta net nnijëmbijtëm pënaty të yˈotstë. Pääty, ¿myajmëjwindëkëyaambyë Diosë tyuunk ko mdunët prekursoor ausilyaar marsë, abril o mayë?

2. ¿Tiko yˈoyëty nduˈunëm prekursoor ausilyaar marsë poˈo?

² Marsë yëˈë tuˈugë poˈo diˈib jëjpˈam. Mbäät marsë poˈo mduny prekursoor ausilyaar. Pënaty yajtuktujktëbë syolisitud mbäät twinˈixtë pën tunandëp 30 oorë o 50 oorë. Ets pënë sirkuitë ja tkuˈixëyaˈany ja naymyujkënë, ta pënaty tuundëp prekursoor ausilyaar tpäädët tukëˈëyë ja reunyonk diˈibë sirkuitë myëdataampy mëdë prekursoor regulaar etsë espesial. Ets nan tsojk wyäˈkxäˈäny ja inbitasyonk parë jäˈäy nwoˈojëm mä yajjamyatsäˈänyë Jesusë yˈoˈkën xëë, martës 26 äämbë marsë, ja ogäˈän yajkëyakäˈäny 1 äämbë marsë. Tyäˈädë poˈo ja tmëminy mëgoxkë sääbëdë etsë domingë. Pääty, ¿tiko xykyatukniwinmayë parë mdunët prekursoor ausilyaar extëm tyunäˈändë mayë nmëguˈukˈäjtëm mä tyäˈädë poˈo diˈib mas jëjpˈam?

3. ¿Wiˈix mbäät xytyukniwitsë parë xyajmëjwindëkëdë Diosë tyuunk?

³ Tukniwitsë desde tyam. Tyamën mbäät xyˈixy wiˈix mbäädë mdiempë xytyukniwitsë parë mdunët prekursoor. Nan jëjpˈam ets mëdë mfamilyë xynyimaytyäˈäktët, pääty juudë tiempë mä mDiosˈawdaty mëdë mfamilyë parë xynyimaytyäˈäktët tijaty mdunandëp, ets ta net xyaˈoyëdët tuˈugë programë (Prov. 15:22). Ets pën kyaj mbäät mduny prekursoor ausilyaar, këdii mˈëxtëkëwaˈaky. ¿Mbäät xytyukniwitsë ets mas kajaa ndunët ko mnëjkxët tëjkˈayeˈebyë? O ¿Mbäät xywyinˈixy tuˈugë xëë sëmäänoty parë mnëjkxët käjpxwäˈkxpë?

4. ¿Wiˈix ndukˈoyˈatäˈänëm ko nyajmëjwindëjkëmë Diosë tyuunk marsë, abril ets mayë?

⁴ Ko nyajmëjwindëjkëmë Diosë tyuunk marsë, abril ets mayë, nëjkxëp mas jotkujk nnayjäˈäwëm ko nmëduˈunëmë Jyobaa ets ko nbudëjkëmë wiink jäˈäy (Fwank 4:34; Apos. 20:35). Per diˈib mas jëjpˈam, yëˈë ko nëjkxëbë Jyobaa jotkujk nyayjawëty ko nyajtuˈunëm ja jot mëjää (Prov. 27:11).