Nˈoktuˈunëm tijaty extëm mbäädë Dios yajmëjkugäjpxë
1. ¿Ti nanduˈun pudëkëyanëdëbë jäˈäy mä yajjamyatsäˈänyë Jesusë yˈoˈkën xëë?
1 ¿Näˈä? Ko yajjamyatsäˈänyë Jesusë yˈoˈkën xëë. Pääty, nˈoktuˈunëmë mëjää ets mayë jäˈäy nwoˈojëm. Per kyaj yëˈëyë pyudëkëyäˈänëdë ti myëdooˈijttëp, nanduˈun ti yˈijxtëp. Ko tuˈugë toxytyëjk yˈojtsy mä yajjamyetsyë Jesusë yˈoˈkën xëë, ta ojts tnigajpxy ko diˈibë naty të tˈixy, yëˈë ko niˈamukë ak ajiiky ak amëguˈuk ets ko jantsy oy jantsy wäˈäts dyaˈittë ja tëjk mä nyaymyukëdë. ¿Ti tyäˈädë xytyukniˈˈijxëm? Ko kyaj yëˈëyë tnikëjxmˈaty ja diˈib jamë diskursë yajnäjxypy parë oy yajnimaytyäˈägëdë Dios, niˈamukën nikëjxmˈäjtëm (Éfe. 4:16).
2. ¿Wiˈix mbäät ndukˈijxëm pënaty miindëp ko yëˈë Dios nmëduˈunëm?
2 Agëˈë axäjë tsuj yajxon pënaty miindëp. Ko nˈëboˈkx ngäjpxpoˈkxëm pënaty miindëp ets nmëtxik nmëtxoˈonëm, ta nyajnigëxëˈkëm ko yëˈë Dios nmëduˈunëm (Fwank 13:35). Ets oy xykyatimmëtmaytyaktäˈäyët niˈamukë, mbäät xykyäjpxpoˈkxy pënaty jam wingon yajpattëp (Ebre. 13:1, 2). Pën mˈijxypy ko tam tuˈugë jäˈäy jyaˈty ets kyëxeˈeky ko kyaj pën tˈixyˈaty, ta xynyinëjkxët. Waˈan ojts tˈaxäjë ja neky diˈib të nyajwäˈkxëm ko jäˈäy të nwoˈojëm. Ets mbäät xyajtëy: “Tyamnëm miny, ¿këdiijë?”. Anëëmë ets mëët mˈuˈunyët ets xyˈatsoojëmbitët tijaty nyijawëyaampy. Ets pën mä tadë tëjk tuˈukmukandëbë wiinkpë naymyujkën ets tsojkëp niˈamukë mbëtsëmdët, ta ja jäˈäy xyˈanëëmët: “Njanijawëyaambyëts wiˈix të xyˈixy të xymyëdoy. ¿Mä mbäät nbääty?”.
3. ¿Ti mbäät nduˈunëm parë oy nyayjawëdët diˈib kyaj yˈokpëtsëëmnë käjpxwäˈkxpë?
3 Nˈokˈaxäjëm oy pënaty kyaj yˈokkäjpxwäˈkxnë. Nëjkxandëp nanduˈunë nmëguˈukˈäjtëm diˈib kyaj yˈokpëtsëëmnë käjpxwäˈkxpë, ta nääk diˈib jeˈeyë nëjkxtëp jëmëjt jëmëjt mä yajjamyetsyë Jesusë yˈoˈkën xëë. Agëˈë axäjëdë tsuj yajxon ets duˈun tˈixtët ko njantsy tyukxondakëm ko të myindë (Rom. 15:7). Nan mbäät ok ja mëjjäˈäytyëjk tninëjkxtë mä jyëën tyëjk parë tpudëkëdët ets nyëjkxtët mä naymyujkën. Yajninuˈkxtakëdëp pënaty nëjkxtëp parë tmëjkugäjpxtëdë Dios mët tukëˈëyë ti yˈijxtëp ets ti myëdoodëp. Duˈuntsoo tˈixtët “ja oyˈäjtën” diˈibë nduˈunëm (1 Peed. 2:12).