Nˈoknayjyëjpˈijxëm desde tyam mä yajjamyatsäˈänyë Jesusë yˈoˈkën xëëw

1. ¿Tiko jëmëjt jëmëjt yajjamyetsyë Jesusë yˈoˈkën xëëw? (Lukʉs 22:​19, 20).

NINUˈUN nDiosmëduˈunëm, jëmëjt jëmëjt njamyajtsëmë Jesusë yˈoˈkën xëëw mët ko yëˈë duˈun ojts tniˈanaˈamë (käjpxë Lukʉs 22:​19, 20). ¡Njantsy jyëjpˈijxënëp parë tpäädëdë mä yajjamyatsäˈänyë Jesusë yˈoˈkën xëëw! Min nˈokˈijxëm tuk pëky majtsk pëky tiko njantsy jyëjpˈijxëm.

2. ¿Tiko njantsy nyëjkxäˈänëm mä yajjamyetsyë Jesusë yˈoˈkën xëëw?

² Ko nëjkxëm mä yajjamyetsyë Jesusë yˈoˈkën xëëw, xypyudëjkëm parë nˈijxëm nuˈunën tsyobääty ko ojts nyajkuˈoˈk nyajkutëgoˈoyëm. Ets jap nanduˈun nyajtukjamyajtsëm wixatyën mbäät nyajnigëxëˈkëm ko nguˈëˈëw ngukäjpxëm (2 Kor. 5:​14, 15). Xypyudëjkëm nanduˈun parë tuˈugyë nyajpatëm mët ja nmëguˈukˈäjtëm ets nnaymyëjääwmoˈoyëm nixim niyam (Rom. 1:12). Ko jëmëjt jëmëjt yajjamyetsyë Jesusë yˈoˈkën xëëw, nëjkxtëp nimayë nmëguˈukˈäjtëm mëdiˈibë kyaj yˈokDiosmëduunëdë, ets nääk, ta tnijëmbittë jatëgokë Jyobaa mët ko oy të yaˈˈagëˈë të yaˈˈaxäjëdë. Nanduˈun mayë jäˈäy tyëkëdë ëxpëjkpë ko jam ti të tˈoyˈixtë o të tˈoymyëdowdë. Päätyën njantsy nyëjkxäˈänëm mä yajjamyetsyë Jesusë yˈoˈkën xëëw.

3. Ko yajjamyetsyë Jesusë yˈoˈkën xëëw, ¿wiˈix ja nmëguˈukˈäjtëm tuˈugyë nyayaˈitëdë abëtsëmy nyaxwinyëdë? (Ix nanduˈunë dibujë).

³ Jantsy nëjkxäˈänëm mä yajjamyetsyë Jesusë yˈoˈkën xëëw mët ko tuˈugyë nyajpatëm nmëguˈukˈäjtëm abëtsëmy nyaxwinyëdë. Mä tuˈuk tuˈugë lugäär, ja nduˈukmujkëm ko ja xëëw kyëdaknë, nmëdoowˈijtëm ja diskursë mä yajnimaytyaˈaky wiˈix ndukˈoyˈäjtëm ko Jesus ojts xykyuˈoˈkëm, nˈëˈëwëm majtskˈok ets ta net yajkëëynyaxy ja tsäjpkaaky mëdë binë. Taxkˈok ja nuˈkxtakën yajtuny ets niˈamukë njënäˈänëm amenk. Duˈunën ja nmëguˈukˈäjtëm ttundë abëtsëmy nyaxwinyëdë. Seguurë ko jantsy agujk jotkujk nyayjyawëtyë Jyobaa mëdë Jesus ko duˈun nduˈukmujkëm.

4. ¿Ti nnimaytyäˈägäˈänëm mä yäˈädë artikulo?

⁴ Mä yäˈädë artikulo tëgëk pëky yajnimaytyäˈägäˈäny: ¿Wiˈix mbäät desde tyam nnayjyëjpˈijxëm mä tkapäätynyëmë Jesusë yˈoˈkën xëëw?, ¿wiˈix mbäät nanduˈun nbudëjkëmë jäˈäyëty parë nyëjkxtët mä yajjamyatsäˈänyë Jesusë yˈoˈkën xëëw? ets ¿wiˈix mbäät nbudëjkëm pënaty kyaj yˈokDiosmëduunëdë? Ko nnijäˈäwëm, xypyudëkëyäˈänëm parë listë nyajpatëm ko nety yajjamyatsäˈänyë Jesusë yˈoˈkën xëëw.

¿WIˈIX MBÄÄT DESDE TYAM NNAYJYËJPˈIJXËM MÄ TKAPÄÄTYNYËMË JESUSË YˈOˈKËN XËËW?

5. 1) ¿Tiko mbäät nbawinmäˈäyëm nuˈunën tsyobääty ko ojts nyajjuuybyëtsëˈëmëm? (Salmo 49:​7, 8). 2) Nimaytyäˈäk ti të ndukniˈˈixëty ja bideo ¿Tiko yˈoˈkyë Jesus?

⁵ Tuk pëky mëdiˈibë xypyudëkëyäˈänëm, yëˈë ko nwinmäˈäyëm ko mëjwiin kajaa tsyobääty ko ojtsë Jesus xykyuˈoˈkëm, mët ko ëtsäjtëm kyaj nety mbäät këˈëm nnayaˈˈawäätspëtsëˈëmëm mä ja poky ets ja oˈkën (käjpxë Salmo 49:​7, 8; ixë nanduˈunë bideo ¿Tiko yˈoˈkyë Jesus?).a Päätyënë Jyobaa tkëyajky ja yˈUˈunk mëdiˈibë nety mëk tsyojkypy parë ojts xyaˈˈawäˈätspëtsëˈëmëm ets kajaajënë Jyobaa mëdë Jesus ojts xykyujuˈuyëm (Rom. 6:23). Ko niˈigyë nbawinmäˈäyëm wiˈixënë Jyobaa mëdë Jesus ojts xyjyuuybyëtsëˈëmëm, ta ngukäjpxëyäˈänëm. Min nˈoknimaytyakëm jawyiin tiko nety tsyokyëty parë nyajjuuybyëtsëˈëmëm ets ta net nˈijxëm ti Jyobaa mëdë Jesus tyuundë parë ojts xyaˈˈawäˈätspëtsëˈëmëm.

6. ¿Tiko nety tsyokyëty ets nyajjuuybyëtsëˈëmëm?

⁶ Ko Jesus ojts xykyuˈoˈkëm, ta Jyobaa ojts xyjyuuybyëtsëˈëmëm mä netyë Adán të xykyudoˈkëm. Jyobaa wäˈätsjäˈäy ojts dyajkojˈyë Adán parëxyëp jyukyˈaty xëmëkyëjxm. Per ko pyokytyuuny, ta dyajtëgooyë yäˈädë jukyˈäjtën ets nanduˈun ja poky kaytyey ttukninäjxy ja yˈuˈunk yˈënäˈk. Pääty ko Jesus ojts xykyuˈoˈkëm, ta mbäät jatëgok nbatëmë yäˈädë jukyˈäjtën. Nuˈun jyukyˈajtyë Jesus yä Naxwiiny, “kyaj pyekytyuuny es ninäˈä tkawinˈëˈëny pën” (1 Peed. 2:22). Ko yˈoˈky nanduˈunë nety wyäˈätsjäˈäyëty extëmë Adán, ets päätyën ojts yëˈë xyjyuuybyëtsëˈëmëm (1 Kor. 15:45; 1 Tim. 2:6).

7. Oknigäjpx tijaty jotmayë Jesus wyinguwäˈkë.

⁷ Ko Jesus jyukyˈajty yä Naxwiiny, myëmëdoow ja Tyeetyë tsäjpotmëdë oy nuˈun tpaty ja amay jotmay. Ko myutskˈäjty, myëmëdoow nanduˈun ja tyääk teety mëdiˈibë nety pokyjyaˈay yajpattëp oyë nety yëˈë wyäˈätsjäˈäyëty (Luk. 2:51). Ko yaˈkpëtsëëmy, waˈan tii tyuktunanëdë ja myëguˈuktëjk parë kyaj tmëmëdowëdë Jyobaa ets ja tyääk tyeety. Ets ko yaˈkˈabejty, ojtsë Satanás yˈijxmatsyëty parë tmëdëgoyëdë Jyobaa (Mat. 4:​1-11). Satanás mëktaˈaky tjayajtëgoyanyë Jesus parëxyëp kyaj ojts xyjyuuybyëtsëˈëmëm.

8. ¿Tijaty jotmayë Jesus yˈakpat?

⁸ Ko Jesusë tmëduuntsondakyë Tyeety yä Naxwiiny, pyatë wiinkpë jotmay. Extëm ko nyibëdëˈkë ja myëtsipëty ets jyayaˈooganëdë (Luk. 4:​28, 29; 13:31). Myëmaˈkxtujk ja yˈëxpëjkpëty oy näˈäty kyaj oy ti ttuundë mët ko pokyjyaˈay yajpäättë (Mar. 9:​33, 34). Ko ojts jyustisëpääty, ta yajtuknikäjpxpejtyë oˈkën, axëëk yajtuuny ets yajnëxiky yajtukxiky. Ok, duˈunë jäˈäy yaˈoˈkë extëmë axëkjäˈäy ets nëgooyë ojts yˈayoownë (Eb. 12:​1-3). Ets mä nety yˈooganë, ta Jyobaa yˈëxmäjtsë parë naytyuˈuk twinguwäˈägët ja oˈkën (Mat. 27:46).b

9. ¿Wiˈix xypyudëkëyäˈänëm ko nwinmäˈäyëm wiˈixë Jesus ojts xyjyuuybyëtsëˈëmëm? (1 Peedrʉ 1:8).

⁹ Ko Jesus ojts xyjuuybyëtsëˈëmëm, mëjwiin kajaa tkuˈayoˈowë. Ko nbawinmäˈäyëm wiˈix jyajty kyëbejty, yëˈë xypyudëkëyäˈänëm parë niˈigyë ntsojkëm (käjpxë 1 Peedrʉ 1:8).

10. ¿Wiˈixë Jyobaa nyayjyäˈäwë ko tkëyajkyë yˈUˈunk parë ojts xyjuuybyëtsëˈëmëm?

¹⁰ ¿Wiˈixë Jyobaa nyayjyäˈäwë ko tkëyajkyë yˈUˈunk parë ojts xyjuuybyëtsëˈëmëm? Extëm nnijäˈäwëm, Jyobaa mëdë yˈUˈunk jantsy oyë nety mët yˈity (Prov. 8:30). Pääty nˈokwinmäˈäyëm, ¿wiˈixënë Jyobaa nyayjyäˈäwë ko ja yˈUˈunk tpaty kanäk pëkyë amay jotmay yä Naxwiiny? Seguurë ko mëk tjäˈäwë ko tˈijxy wiˈix ja yˈUˈunk axëëk yajtuny, yajwingajpxy yajjëjpkajpxy ets ko yˈayoy.

11. ¿Wiˈixë Jyobaa nyayjyäˈäwë ko yˈoˈky tyëgooy ja yˈUˈunk? Oknimaytyäˈäk mët tuˈugë ijxpajtën.

¹¹ Pënaty të yˈooktë yˈuˈunk yˈënäˈk, jyaygyujkëdëp wiˈixënë Jyobaa nyayjyäˈäwë ko yˈoˈky ja yˈUˈunk. Oy njanijäˈäwëm ko jukypyëkandëbë oˈkpë, duˈunyëm njäˈäwëm ja jäj jëmuˈumën ko pën yˈooky tyëgoy. Yäˈädë yëˈë xytyukˈijxëm wiˈixënë Jyobaa nyayjyäˈäwë mä jëmëjt 33 ko tˈijxy wiˈix ja yˈUˈunk yˈayooy ets yˈoˈky tyëgooy (Mat. 3:17).c

12. ¿Tijaty mbäät nduˈunëm mä tkapäätynyëmë Jesusë yˈoˈkën xëëw?

¹² Mä tkapäätynyëmë Jesusë yˈoˈkën xëëw, oyxyëp ko xyˈëxpëky naytyuˈuk o mëdë mfamilyë wiˈixë Jesus ojts xykyuˈoˈk xykyutëgoˈoyëm. Yajtunë foyetë Naybyudëkë parë tijaty tpayoˈoytyëdë Jyobaa tyestiigëty o wiinkpë ëxpëjkpajn mëdiˈibë nyimaytyakypy wiˈix ojts nyajjuuybyëtsëˈëmëm.d Ix nanduˈun ja tekstë mëdiˈibë yajkäjpxp mä yajjamyatsäˈänyë Jesusë yˈoˈkën xëëw, mëdiˈibë miimp mä Wiˈix njukyˈäjtëm ets nDiosmëduˈunëm. Ix nanduˈunë bideo mä ja tekstë mëdiˈibë jopy jopy yajkäjpxp Betel, mä yajjamyetsyë Jesusë yˈoˈkën xëëw. Ko duˈun nduˈunëm, duˈunë nety nnayjyëjpˈijxëm mä yajjamyatsäˈänyë Jesusë yˈoˈkën xëëw ets mbäät nbudëjkëmë wiinkpë parë nanduˈun ttukˈoyˈattët (Esd. 7:10).

NˈOKPUDËJKËMË WIINKPË PARË NANDUˈUN TTUKˈOYˈATTËT

13. ¿Wiˈix mbäät nbudëjkëmë wiinkpë parë nanduˈun ttukˈoyˈattët ko Jesus ojts xykyuˈoˈkëm?

¹³ ¿Wiˈix mbäät nbudëjkëmë wiinkpë parë nanduˈun ttukˈoyˈattët ko Jesus ojts xykyuˈoˈkëm? Ko nwoˈow nwijtsëm parë nyëjkxtët. Mbäät nyajwäˈkxëmë inbitasionk, per oy ko nanduˈun ngujäˈäyëm pënatyën nwowäˈänëm. Extëmë njëëkyˈäjt nmëguˈukˈäjtëm, pënaty mëët nduˈunëm, nˈeskuelëˈäjtëm o oytyim pënëty. Pën këjxp ja inbitasionk, mbäät nduknigajxëmë link mä myiny ja inbitasionk. Kyaj nnijäˈäwëm ninääk nyëjkxäˈändë, ¡per oy ko nwoˈowëm! (Ecl. 11:6).

14. ¿Wiˈix wyimbëtsëmy ko jäˈäy këˈëm ndimymyoˈoyëm tuˈugë inbitasionk? Oknimaytyäˈäk.

¹⁴ Ko tuˈugë jäˈäy këˈëm ndimymyoˈoyëm ja inbitasionk, mbäät nyëjkxy mä yajjamyatsäˈänyë Jesusë yˈoˈkën xëëw. Tëgok, tuˈugë nmëguˈukˈäjtëm kyaj tmëbëkany ko ja myëmëjjäˈäy yˈanmääyë ko nëjkxäämp mä yajjamyatsäˈänyë Jesusë yˈoˈkën xëëw, pes të nety jantsy kanäkˈok tˈokwoowbë ets kyaj nyëjkxy. Per ¿tiko net jyënany ko nyëjkxäˈäny? Yëˈko tuˈugë nmëguˈukˈäjtëm mëdiˈibë tuump mëjjäˈäy ets yˈixyˈajtypy, yëˈë nety të wyoyëty ets të myoˈoyëty tuˈugë inbitasionk. Ja myëmëjjäˈäy xëmë ojts nyëjkxnë jëmëjt jëmëjt mä yajjamyetsyë Jesusë yˈoˈkën xëëw.

15. ¿Ti tsojkëp njamyajtsëm ko nwoˈowëm tuˈugë jäˈäy mä yajjamyatsäˈänyë Jesusë yˈoˈkën xëëw?

¹⁵ Ko nwoˈowëm tuˈugë jäˈäy mëdiˈibë kyajnëm tyim nëjkxy mä yajjamyetsyë Jesusë yˈoˈkën xëëw, waˈan tijaty dyajtëwäˈänët, pääty oy ko nwinmäˈäyëm wiˈix nˈatsoowëmbitäˈänëm (Kol. 4:6). Mbäät xyajtëˈëwëm extëm: “¿Wiˈix yajtunäˈäny? ¿Nuˈunën jyakäˈäny? ¿Nuˈun yaˈˈajuuytyukäˈäny? ¿Wiˈixëts nyayxyoxëdët, yaˈˈamdowäämbëts japë meeny sentääbë?”. Pääty oy ko nˈanmäˈäyëm ja jäˈäy pën jam ti dyajtëwäˈäny etsë net ndukmëtmaytyakëm. Mbäät ndukˈijxëmë bideo Nˈokjamyajtsëmë Jesusë yˈoˈkën xëë ets ¿Ti yajtuump mä tyuˈukmuktë Jyobaa tyestiigëty? O mbäät ndukmëtmaytyakëm tuk pëky majtsk pëky mëdiˈibë miimp mä liibrë Jukyˈat agujk jotkujk leksion 28.

16. ¿Tijaty mbäädë jäˈäy tˈaknijawëyaˈany ko nety të yˈotsy mä yajjamyetsyë Jesusë yˈoˈkën xëëw?

¹⁶ Ko netyë jäˈäy të yˈotsy mä të yajjamyetsyë Jesusë yˈoˈkën xëëw, mbäät tijaty tˈaknijawëyäˈänët. Extëm tiko kyaj ja tsäjpkaaky të yajkay ets ja binë të yaˈuuky. Winnäˈäjaty yajjamyetsyë Jesusë yˈoˈkën xëëw ets pën duˈunën nˈëxpëjkëm sëmään sëmään. Oy kanäk pëky të jyayajnimaytyaˈaky mä të nyaxy ja diskursë, per waˈan ja jäˈäy kyaj yajxon të tjaygyukë ets niˈigyë tˈaknijawëyaˈany. Pääty parë niˈigyë tjaygyukët, oy ko ndukmëtmaytyakëmë artikulo mëdiˈibë miimp mä sitio jw.org, mä jyënaˈany “¿Tiko Jyobaa tyestiigëty kyaj duˈun tjamyatstë Jesusë yˈoˈkën xëëw extëmë wiinkpë relijyonk?”. Nˈoktuˈunëm nuˈun nmadakëm mä tkapäätynyëmë Jesusë yˈoˈkën xëëw, ko nety tyunyëty ets ko nety të nyäjxnë. Duˈun nbudëjkëm “pënaty jënandëp ja yˈääw jyot” ets ttukˈoyˈattët ko Jesus ojts xyjuuybyëtsëˈëmëm (Hech. 13:​48, TNM).

NˈOKPUDËJKËM PËNATY KYAJ YˈOKDIOSMËDUUNËDË

17. ¿Wiˈix mbäädë mëjjäˈäytyëjk tpudëkëdë pënaty kyaj yˈokDiosmëduunëdë? (Ezequiel 34:​12, 16).

¹⁷ Mä yajjamyatsäˈänyë Jesusë yˈoˈkën xëëw, ¿wiˈix mbäädë mëjjäˈäytyëjk tpudëkëdë pënaty kyaj yˈokDiosmëduunëdë? Ko ttukˈixtët ko myëmääy myëdäjtëp ets ko tsyojktëp (käjpxë Ezequiel 34:​12, 16). Mëjjäˈäytyëjkëty, mä tkapäätynyëmë Jesusë yˈoˈkën xëëw, kuˈix kugäjpxëdë yäˈädë nmëguˈukˈäjtëm, anëëmëdë ko mmëmääy mmëdäjtëp ets ko mbudëkëyandëp. Wow witstë mä yajjamyatsäˈänyë Jesusë yˈoˈkën xëëw ets ko nyëjkxtët agëˈë axäjëdë tsuj yajxon. Ko nyaxët mä yajjamyetsyë Jesusë yˈoˈkën xëëw, ninëjkxtë ets pudëkëdë parë jatëgok tmëdundëdë Jyobaa (1 Peed. 2:25).

18. ¿Wiˈix mbäät niˈamukë nbudëjkëm pënaty kyaj yˈokDiosmëduunëdë? (Romanʉs 12:10).

¹⁸ Ko nety myindë pënaty kyaj yˈokDiosmëduunëdë mä yajjamyatsäˈänyë Jesusë yˈoˈkën xëëw, oy ko niˈamukë nbudëjkëm. ¿Wiˈixtsoow? Ko ndukˈijxëm ja oyjyot oywyinmäˈäny, nwingutsëˈkëm ets ko ntsojkëm (käjpxë Romanʉs 12:10). Nˈokjamyajtsëm ko yäˈädë nmëguˈukˈäjtëm, yëˈë nanduˈunë Jyobaa uˈunkˈäjt ënäˈkˈäjtëdëp ets waˈan të tsyiptakxëdë myindët mä yajjamyetsyë Jesusë yˈoˈkën xëëw, waˈan të tmëmay të tmëdäjtë wiˈix yˈokˈyaˈˈagëˈë yˈokˈyaˈˈaxäjëdët.e Pääty oy ko kyaj ti nyajtëˈëwëm o jam wiˈix nˈanmäˈäyëm mëdiˈibë axëëk yajnayjyawëdëp (1 Tes. 5:11). Kyaj mbäät wiˈix nˈijxëm mët ko duˈunyëm nmëguˈukˈäjtëm ets jotkujk nnayjyäˈäwëm ko jatëgok mëët tuˈugyë nˈawdäjtëmë Jyobaa (Sal. 119:176; Apos. 20:35).

19. ¿Wiˈix yajtukˈoyˈaty ko njamyajtsëmë Jesusë yˈoˈkën xëëw?

¹⁹ Extëm të nˈijxëm mä yäˈädë artikulo, të kanäk pëky yajnimaytyaˈaky tiko Jesus ojts tniˈanaˈamë ets yajjamyatsëdë yˈoˈkën xëëw. Ko duˈun njamyajtsëm, mëjwiin kajaa ndukˈoyˈäjtëm ets nanduˈunë wiinkpëty ttukˈoyˈattë (Is. 48:​17, 18). Xypyudëjkëm parë niˈigyë ntsojkëmë Jyobaa mëdë Jesus. Ets parë nyajnigëxëˈkëm ko nmëjjäˈäwëm tijaty ojts xytyukmëduˈunëm. Xypyudëjkëm nanduˈun parë tuˈugyë nˈijtëm mëdë nmëguˈukˈäjtëm ets nbudëjkëmë jäˈäy parë tnijawëdët ti mbäät ttundë ets tˈaxäjëdët ja kunuˈkxën mëdiˈibë nˈëwxijt njëjpˈijxëm mët ko Jesus ojts xykyuˈoˈkëm. Pääty, nˈoknayjyëjpˈijxëm desde tyam ets njamyajtsëm ja Jesusë yˈoˈkën xëëw mä yäˈädë jëmëjt.