Nˈokjëjpˈijxëm agujk jotkujk mä yajjamyatsäˈänyë Jesusë yˈoˈkën xëë
1. ¿Ti mbäät nyaˈijxëm mä yajjamyatsäˈänyë Jesusë yˈoˈkën xëë?
1 Mä tyäˈädë jëmëjt ja tpääty martës 26 äämbë marsë, ja mbäät ndukxondakëm ti Dios tyuun parë ojts xyaˈˈawäˈätspëtsëˈëmëm (Is. 61:10). Mä tkapäätynyëm, oy ko ndukxondakëm tijaty yajtunäämp net listë nyajpatëm mä tyäˈädë xëë. Min nˈokˈijxëm tiko.
2. ¿Tiko njëjpˈijxäˈänëm mëdë xondakën mä yajjamyatsäˈänyë Jesusë yˈoˈkën xëë?
2 Nˈokjëjpˈijxëmë tyäˈädë xëë. Adëyë yajtunyë nWintsënˈäjtëm yˈAˈux, per mëjwiin kajaa nyikejy. Pääty tsojkëp kontiempë tijaty yaˈijxtäˈäyët, net këdii yajninaxët tijaty jëjpˈam yajtunäämp (Prov. 21:5). Jëjpˈam ets kontiempë yajnijawët ti oorë tyunäˈänyëty ets mää. Tsojkëp yaˈixët diˈibë tsäjpkaaky ets diˈibë binë mbäät tyuny. Nan tsojkëp wyäˈätsët ja lugäär parë kontiempë yˈitët listë. Ja diˈib yajnaxaambyë diskursë tsojkëp yajxon tˈagäjpxët, etsë akomodadoor diˈib yajnaxandëp ja tsäjpkaaky etsë binë, tsojkëp yajxon nyaytyukniwitsëdët wiˈix tijaty ttunäˈändë. Seguurë ko të tyäˈädë yajtukniwijtsëtyaˈay. Nˈawijx njëjpˈijxëmë tyäˈädë xëë diˈib jëjpˈam mët ko nmëjjäˈäwëm ja wintsëˈkën diˈib xymyoˈoyäˈänëm ja nitsokën (1 Peed. 1:8, 9).
3. ¿Wiˈix mbäät nyaˈˈawatsëmë jot korasoon mä yajjamyatsäˈänyë Jesusë yˈoˈkën xëë?
3 Nˈokˈyaˈˈawatsëmë jot korasoon. Jëjpˈam ets nyaˈˈawatsëmë jot korasoon parë yajxon njaygyujkëm wiˈix nyikejy ja Jesusë yˈoˈkën xëë (Esd. 7:10). Pääty oy ko njuˈtëmë tiempë parë ngäjpxëmë Biiblyë diˈib yajkäjpxp ko tpäätyë Jesusë yˈoˈkën xëë. Ets nbawinmäˈäyëm wiˈixë Jesus tˈakˈyajnäjxyë jyukyˈäjtën ko nety wyingoonë ja yˈoˈkën. Ko nbawinmäˈäyëm tijatyë Jesus tyuun, yëˈë xypyudëkëyäˈänëm parë nbanëjkxëmë yˈijxpajtën (Gal. 2:20).
4. ¿Diˈib mas mdukxondakypy ko ojts myajjuuybyëtsëmy?
4 Ko Jesus yˈoˈky, yajmëjpëtsëëmë Jyobaa ets yajnigëxëˈk ko yëˈë myëdäjtypyë madakënë parë yˈanaˈamët, ets ojts xyaˈˈawäˈätspëtsëˈëmëm mä poky ets mä oˈkën. Nan ojts dyaˈˈawäˈätsyë nëˈë tuˈu parë nmëˈoybyëjkëmë Dios ets parë nbatëmë jukyˈäjtënë winë xëëbë (Kol. 1:21, 22; 1 Fwank 2:2). Nan xypyudëkëyäˈänëm parë njukyˈäjtëm extëm të ndukwandakëmë Jyobaa ets parë xëmë nbanëjkxëmë Kristë yˈijxpajtën (Mat. 16:24). ¡Nˈoktukxondakëm niˈigyë myentrës nnayjëjpˈijxëm mä yajjamyatsäˈänyë Jesus yˈoˈkën xëë!