WIˈIX NJUKYˈÄJTËM ETS NDIOSMËDUˈUNËM
Jat wiˈix oy xytyunëdë Diosë tyuunk: Käjpxwäˈkx mä telefënë
TIKO JYËJPˈAMËTY. Tuk pëky wiˈix nˈëwäˈkx ngäjpxwäˈkxëm “kajabäät ja oybyë ayuk”, yëˈë ko nmëgäjpxëmë jäˈäy mä telefënë (Hech. 20:24, TNM).a Wiˈixëm näˈäty nyaˈijx nyajpatëm ets kyaj mbäät ninëjkxëm ja jäˈäy mä jyëën tyëjk, per mbäät nmëtmaytyakëm mä telefënë.
WIˈIX MBÄÄT NDUˈUNËM
Nayjyëjpˈixëdë kontiempë. Winˈix ti mbäät ja jäˈäy xytyukmëtmaytyaˈaky. Ta net xyjyaaybyëtsëmët wiˈix xyˈanëëmëyaˈany. Ets ko mˈatsowëdët tuˈugë aparatë, nan mbäät xynyiwinmayë wiˈix ja ääw ayuk xynyikaˈagäˈäny mä tiko xymyëgajpxy ja jäˈäy. Nan oy ko xymyëdatët meesëkëjxy ti nety të xyjyaaybyëtsëmy ets tijaty myajtunaampy, extëmë mdabletë o mselulaar mä awäˈäts xymyëdatëdë JW Library® o jw.org®.
Këdii mtsëˈëgë. Käjpx mmaytyäˈäk extëm xëmë mgajpxy mmaytyaˈaky. Xiˈik xon ets naybyëjtäˈägëdë extëmxyëp ja jäˈäy xywyindanë. Këdii jeky xynyiboˈkxë ja mˈääw mˈayuk ets oyxyëp ko kyaj naytyuˈuk xymyëgajpxy ja jäˈäy. Ets ko ti myajtëwëdët, nikäjpxëmbit mëk parë ja mëguˈuk tmëdowët net mbudëkëdët parë xyˈatsoowëmbitët.
Yajwëˈëm awäˈäts ja nëˈë tuˈu parë jatëgok xymyëgäjpxët. Pën ja jäˈäy yˈoymyëdoopy, mbäät jam ti xyyajtëy diˈib mˈatsoowëmbitaampy ko jatëgok xymyëgäjpxët. Mbäät xyˈawanë tuˈugë ëxpëjkpajn ets xyˈanëëmët ko xytyuknigaxäˈäny mä korree, mä Internet o xymyënëjkxanë këˈëm. Nan mbäät xytyuknigexy mä korree elektronikë o mä mensaje tuˈugë bideo o tuˈugë artikulo. Ets pën mbäät, anëëmë parë tyëkët mä sitio diˈib nmëdäjtëm ets jap ti tˈixët.
a Pën mä mtsëënë mbäät mˈëwaˈkxy mgäjpxwaˈkxy mä telefënë, tsojkëp xywyingutsëˈëgët ja ley diˈib kuwanëp ja jäˈäyë xyëëw, dyireksion etsë nyumero.