¿Tiko Jesús dyajnäjxy mëj ja Diosë xyëëw?

1, 2. 1) ¿Ti Jesús tyuun mä nety jakumbom yˈooganë? 2) ¿Ti nˈixäˈänëm mä yäˈädë artikulo?

JUEEBËS koots ko 14 äänyë nisán mä jëmëjt 33, ta Jesús yˈakˈaˈuxˈäjty mët ja yˈapostëlëtëjkëty. Ko yˈaˈuxˈäjtääytyë, ta ojts tjotmëkwingäjpxë ets ta nyuˈkxtaky. Jawaanë nety yˈaktëgoyˈaty mä Judas kyëyakäˈänyëty, yajpayeˈeyaˈany, yajtëytyunäˈäny ets ja jäˈäy yaˈoogäˈänyë. Ixtëmë Jesús nyuˈkxtaˈaky japë apostëlë Juan tkujäˈäyë mä Juan kapitulo 17.

² Mä yäˈädë artikulo nˈixäˈänëm ti xytyukniˈˈijxëm ixtëmë Jesús nyuˈkxtaky, tijaty myëmääy myëdäj mä nety yˈooganë ets ti mëdiˈibë jëjpˈam pyëjktak ko jyukyˈajty yä Naxwiiny.

“TËJËTS NDUKNIJAWËDË JA MXËËW”

3. ¿Ti Jesús myaytyäˈägan ko jyënany: “Tëjëts nduknijawëdë ja mxëëw”? (Juan 17:​6, 26, TNM).

³ Komë Jesús mëjë nety tˈixy ja Tyeetyë xyëëw, pääty majtskˈok jyënany: “Tëjëts nduknijawëdë ja mxëëw” (käjpxë Juan 17:​6, 26, TNM). ¿Yëˈë nety myaytyäˈägaampy ko të ttuknijawë ja yˈëxpëjkpëty ko Dios txëwˈaty Jyobaa? Kyaj. Pes ja yˈëxpëjkpëty judiyë jäˈäyë netyëty ets nyijäˈäwëdëp ko mä Escrituras Hebreas myiny kanäk milˈokë Diosë xyëëw. Pääty ko Jesús jyënany: “Tëjëts nduknijawëdë ja mxëëw”, yëˈë yˈandijan ko të nety ttukniˈˈixë ja yˈëxpëjkpëty wiˈix jyaˈayˈatyë Jyobaa, tijaty tyuknibëjktakëp ets wiˈix tijaty ttuny. Kom nipënë nety duˈun tkaˈixyˈatyë Jyobaa ixtëmë Jesús, päätyën yëˈë yajxon tnimaytyakyë Jyobaa.

4, 5. 1) Nimaytyäˈäk mët tuˈugë yˈijxpajtën wiˈix mbäät niˈigyë nyajtsobatëm ti tuˈugë jäˈäy txëwˈaty. 2) ¿Wiˈix ja apostëlëtëjk niˈigyë dyajtsobattë ja Diosë xyëëw?

⁴ Okpawinmay ko mä mijts mduˈukmuky tap tuˈugë nmëguˈukˈäjtëm mëdiˈibë xyëwˈäjtypy David, mëjjäˈäy tyuny ets doktoor. Tamë tiempë nyëjkxnë mä xyˈixyˈaty. Per ta ajotkumonë mˈayoˈonbääty ets myajmënëjkxy mä ja hospital mä tyunyë David, ta jap mbudëkëty ets mtsoˈoky. ¿Këdii mas niˈigyë xytsyokäˈänyë David? Koogoo mijts xymyëdowët ja xyëëwë David, ta xyjyamyatsäˈäny wiˈix të mbudëkëty. Ets kyaj jeˈeyë xynyekyˈixäˈäny ixtëm ja mëjjäˈäy nanduˈunën xyˈixäˈäny ixtëm ja doktoor mëdiˈibë të myajtsoˈogyëty. David jaˈayëm ja nmëguˈukˈäjtëm mëdiˈibë tuump mëjjäˈäy ets mëdiˈibë mijts tëëyëp mˈixyˈäjt, per tyam duˈun xyˈixy ixtëm ja doktoor mëdiˈibë të myajtsoˈogyëty.

⁵ Nanduˈunën jyajty mët ja Jesúsë yˈëxpëjkpëty, yëˈë nyijäˈäwëdëbë nety ko Dios txëwˈaty Jyobaa, per niˈigyë tˈixyˈäjttë ko Jesús pyudëjkëdë parë tnijawëdët pënën Jyobaa. Tukëˈëyë tijatyë Jesús tyuun ets wiˈix ojts kyajpxy myaytyaˈaky ja mä dyajnigëxëˈky yajxon wiˈixë Tyeety jyaˈayˈaty. Ko yˈijxëdë ja yˈëxpëjkpëty wiˈix yaˈëxpëjky ets wiˈix tpaˈˈayooyë jäˈäy, ta niˈigyë tˈixyˈäjttë Jyobaa (Fwank 14:9; 17:3).

“JA MXËËW, MËDIˈIBËTS TË XYMYOˈOY”

6. ¿Ti Jesús myaytyäˈägan ko jyënany: “Ja mxëëw, mëdiˈibëts të xymyoˈoy”? (Juan 17:​11, 12, TNM).

⁶ Ko Jesús tninuˈkxtakë ja yˈëxpëjkpëtëjk duˈun tˈanëmääyë Jyobaa: “Ijxˈit kuentˈat mët yëˈëgyëjxm ja mxëëw, mëdiˈibëts të xymyoˈoy” (käjpxë Juan 17:​11, 12, TNM). ¿Yëˈë yäˈädë ääw ayuk yˈandijpy ko Jesús mbäät nanduˈun yajtijy Jyobaa? Kyaj. Pes ko Jesús jyënany: “Mët yëˈëgyëjxm ja mxëëw”, yëˈë myaytyäˈägan ja Diosë xyëëw, Jyobaa. Pääty njënäˈänëm ko Jesús kyaj tyëgäjtsy ja xyëëw, kyaj net ojts yajtijnë “Jyobaa”. Per ¿ti myaytyäˈägan ko jyënany ja mxëëw mëdiˈibëts të xymyoˈoy? Tim jawyiin, yëˈë ko Jesús yëˈë kyudënääyë Jyobaa ets yëˈë yajkugajpxyˈäjtë. Kyëdaky yä naxwiiny ets ttuuny kanäägë miläägrë xyëëwgyëjxmë Tyeety (Fwank 5:43; 10:25). Jesús nanduˈunë xyëëw nyikejy “Jyobaa yëˈë mëdiˈibë yajnitsokp”. Ixtëm nˈijxëm, mä Jesúsë xyëëw yajkuwijtsëp nanduˈunë Jyobaa xyëëw.

7. Oknimaytyäˈäk mët tuˈugë ijxpajtën tiko nety mbäädë Jesús tnimaytyakë ja Diosë xyëëw, Jyobaa.

⁷ Parë njaygyujkëm yajxon, min nˈokpëjktakëm tuˈugë ijxpajtën. Tuˈugë presidentë mbäät ttuunkmoˈoy tuˈugë jäˈäy parë kyudanëdët ets tmëdatët ja kutujkën parë kyäjpxët xyëëwgyëjxm. Kom të duˈun yajtuunkmoˈoy, ta tmëdatäˈäny ja kutujkën ixtëm ja presidentë. Nanduˈunënë Jyobaa të ttuunkmoˈoyë Jesús ixtëm ja kyudënaabyë ets të tmoˈoy ja kutujkën parë nyigäjpx nyimaytyakëdët ja xyëëw (Mat. 21:9; Luk. 13:35).

8. Mä Jesús kyakëdaˈakynyëm yä Naxwiiny, ¿wiˈixën ja Diosë xyëëw yajpääty mä yëˈë? (Éxodo 23:​20, 21).

⁸ Biiblyë jyënaˈany ko Jesús yëˈë ja Ayuk. ¿Tiko? Yëˈko yëˈë Jyobaa yajkugajpxyˈäjtë mä anklëstëjk ets mä naxwinyëdë jäˈäy (Fwank 1:​1-3). Pääty waˈan yëˈëjëtyë Jesús, ja anklës mëdiˈibë Jyobaa yajtuun parë ojts tˈijxˈity tkuentëˈaty ja israelitëty mä ja lugäärë tëˈëtsˈitumbë. ¿Tiko nety mbäät ja israelitëty tmëmëdowdë yäˈädë anklës? Yëˈko Jyobaa duˈun jyënany: “Pes jamëts ja nxëëw yajpääty mä yäˈädë anklës” (käjpxë Éxodo 23:​20, 21, TNM).a Jesús yëˈë nety myënëjkxëbë Jyobaa xyëëw, pes yëˈë nety kyudënaapy, nyitsiptuumpy ets yaˈijtëp wäˈäts.

“TATË YAJMËJPËTSËM JA MXËËW”

9. ¿Wiˈixë Jesús dyajnigëxëˈky ko mëj ojts dyajnäjxë ja Tyeetyë xyëëw?

⁹ Ixtëm të nˈijxëm, mä netyë Jesús kyakëdaˈakynyëm, mëj ojts dyajnäjxë ja Tyeetyë xyëëw ets nanduˈun ko yajpaty yä Naxwiiny. Mët tukëˈëyë tijaty tyuun, yajnigëxëˈk ko mëjë nety dyaˈity ja Diosë xyëëw. Mä netyë Jesús dyajkëjxnë ja Diosë tyuunk, ta tˈanëmääy: “Tatë yajmëjpëtsëmë mxëëw”. Netyë ja Tyeety yˈatsoowëmbijtë desde tsäjpotm: “Tëjëts nyajmëjpëtsëmy, ets nyajpëtsëmaambyëts jatëgok” (Juan 12:​28, TNM).

10, 11. 1) ¿Wiˈixë Jesús dyajnigëxëˈky ko ak oyë netyë Jyobaa tijaty të ttuny? (Ix nanduˈunë dibujë). 2) ¿Tiko jyëjpˈamëty ets nyigëxëˈëgët ko ak oyë Jyobaa tijaty ttuny ets ko wäˈäts ja xyëëw?

¹⁰ Jesús yajmëjpëtsëëm nanduˈun ja Tyeetyë xyëëw. Tuk pëky wiˈix ttuuny, yëˈë ko tnimaytyaky wiˈixë Jyobaa jyaˈayˈaty ets wiˈix tijaty ttuny, per kyaj yëˈëyë ttuuny parë dyajmëjpëtsëëmy ja Tyeetyë xyëëw. Yëˈë nyijäˈäwëbë nety ko tsojkëp dyajnigëxëˈëgët ko ak oyë netyë Jyobaa tijaty të ttuny ets ko wäˈäts ja xyëëw. Jesús yajnigëxëˈk ko jëjpˈam duˈun yajtunët, pääty ttukniˈˈijxë ja yˈëxpëjkpëty ets duˈun nyuˈkxtäˈäktët: “NDeetyˈäjtëm mä mˈity jam tsäjpotm, waˈanë mxëëw twäˈätsy” (Mat. 6:​9, TNM).

¹¹ ¿Tiko jyëjpˈamëty nyigëxëˈëgët ko ak oyë netyë Jyobaa tijaty të ttuny ets ko wäˈäts ja xyëëw? Yëˈko jam Edén, Satanás nyiwäämbajtë Jyobaa, jyënany ko yëˈë winˈëˈëmp ets ko kyaj tnasˈijxë ttundët ja Adán mëdë Eva mëdiˈibë mbäät ttukˈoyˈattë (Gén. 3:​1-5). Ja Mëjkuˈu nanduˈun dyajjaygyukëyanë ko kyaj yˈoyëty ixtëmë Jyobaa tijaty ttuny. Ko duˈun tniwäämbejty, ta ojts dyaˈˈaxëëgë ja Diosë xyëëw, Jyobaa. Ets mä Job jyukyˈajty, Satanás jyënany ko päätyë naxwinyëdë jäˈäy tmëdundë Jyobaa mët ko tam ti tsyojktëp. Yäˈädë Mëjkuˈu nanduˈun jyënany ko mëdiˈibë myëduumbyë Jyobaa, mbäät tmäjtstuˈuty ko tpäädëdë amay jotmay mët ko kyaj ttimytsyoky (Job 1:​9-11; 2:4). Pääty, tsojkëbë nety ja tiempë nyaxët parë nyigëxëˈëgët pën ja tëyˈäjtën myëdäjtypy: pën yëˈë Jyobaa o Satanás.

“NYAKÄˈÄNYËTS JA NJIKYˈÄJTËN”

12. ¿Ti Jesús tyuun mët ko tjantsy tsyojky ja Tyeetyë xyëëw?

¹² Jesús mëk tjantsy tsyojky ja Tyeety, ets pääty ttunany tukëˈëyë parë dyajwäˈätsanë ja xyëëw ets dyajnigëxëˈëgäˈäny ko ak oy tijaty ttuny. Pääty jyënany: “Nyakäˈänyëts ja njikyˈäjtën” (Fwank 10:​17, 18). Ets duˈunë duˈun, kyuˈoogëyan ja Tyeetyë xyëëw.b Adán mëdë Eva, ja tim jawyiimbë ndääkˈäjt ndeetyˈäjtëm, wäˈätsjäˈäyë nety të kyojtë, per pyëjktaktë Jyobaa jagam jëxkëˈëm ets ta tpuwäˈkëdë Satanás. Perë Jesús këdak xondaˈaky ääw xondaˈaky jyot yä Naxwiiny ets yajnigëxëˈk ko tsyojkypyë Jyobaa, pes myëmëdoow nuˈun yä jyukyˈajty (Eb. 4:15; 5:​7-10). Myëmëdoowë Tyeety axtë nyaˈoˈky kepykyëjxy (Eb. 12:2). Duˈuntsow dyajnigëxëˈky nuˈunën ttsojkyë Jyobaa ets ja xyëëw.

13. ¿Tiko njënäˈänëm ko nipën mbäät tkayajnigëxëˈëky ko Satanás andakp duˈun ixtëmë Jesús? (Ix nanduˈunë dibujë).

¹³ Mët ja tyuˈunën kyäjpxën, Jesús yajnigëxëˈk ko mëdiˈibë nety andakp, yëˈë Satanás ets kyaj yëˈëjëtyë Jyobaa (Fwank 8:44). Nipën duˈun tkaˈixyˈajty yajxonë Jyobaa ixtëmë Jesús, pääty koxyëp tyëyˈäjtënëty oy jantsy yiˈinëm ixtëmë Satanás tniwäämbejtyë Jyobaa, ojtsxyëbë Jesús tnijawë. Per yëˈë pyëjtakë wyinmäˈäny parë dyajwäˈätsanë Tyeetyë xyëëw ets yajnigëxëˈëgäˈäny ko ak oy tijaty ttuny. Oogan tëgoyan ets kyaj jagam jëxkëˈëm tpëjktäˈägany ja Tyeety, oy tjäˈäwë ko waˈanë nety të myäjtstuˈutyëty (Mat. 27:46).c

“TËTS NGUYTYUUNDÄˈÄY TËGEKYË DIˈIBËTS MIJ XYTYUKˈANAˈAM”

14. ¿Wiˈixë Jesús ojts yajkunuˈkxy mët ko myadaky?

¹⁴ Mä netyë Jesús yˈooganë jakumbom, ta tˈanëmääy ja Tyeety: “Tëts nguytyuundäˈäy tëgekyë diˈibëts mij xytyukˈanaˈam”. Jesús yˈëwxijt jyëjpˈijx ets ja Tyeety kyunuˈkxëdët mët ko nety të myadaˈaky (Fwank 17:​4, 5). Ets jantsy yajkunuˈkx, pesë Jyobaa kyaj tnasˈijxë ets ja nyiniˈkx kyëbäjk wyëˈëmët jutoty (Apos. 2:​23, 24). Jyobaa yajjukypyëjkë Jesús ets mas niˈigyë tmooy ja kutujkënë jam tsäjpotm (Filip. 2:​8, 9). Ko tiempë nyajxy, ta Jesús tyëjkë Rey mä ja Diosë yˈAnaˈam Kyutujkën. ¿Ti tyunaambyë yäˈädë Anaˈam Kutujkën? Jesús duˈun tnimaytyaky ko ojts xytyukniˈˈijxëm wiˈix nmënuˈkxtakëmë Jyobaa: “Waˈan tminyë mgobiernë. Waˈan dyajtuny ja mtsojkën, duˈun ixtëm jam tsäjpotm nanduˈun yä Naxwiiny” (Mat. 6:​10, TNM).

15. ¿Tijatyë Jesús yˈaktunaampy?

¹⁵ Tim tsojkë Jesús tsyiptunäˈäny mët ja Diosë myëtsip ets dyajkutëgoyaˈany ja axëkjäˈäytyëjk mä Armajedon (Diˈibʉ Jat. 16:​14, 16; 19:​11-16). Ets ok, ta net tkujëbijpnaxäˈänyë Satanás mä ja “këkjut” ets jap yˈitäˈäny tsumy matsypyëm parë kyaj ti tnekytyunët (Diˈibʉ Jat. 20:​1-3). Ta netë Jesús yˈanaˈamäˈäny Tuk Mil Jëmëjt, ja mä jyaˈˈatäˈänyë agujkˈäjt jotkujkˈäjtën yä Naxwiiny, ets tpudëkëyaˈany ja naxwinyëdë jäˈäy parë jyëmbittët wäˈätsjäˈäy. Dyajjukypyëkäˈäny pënaty të yˈoˈknëdë ets dyajjëmbitäˈäny ja Naxwinyëdë ixtëm tuˈugë it lugäärë jantsy oybyë. ¡Ja mä yˈadëwäˈäny ti Jyobaa tyuknibëjktakë! (Diˈibʉ Jat. 21:​1-4).

16. ¿Wiˈix yˈixˈatäˈäny ja jukyˈäjtën ko nety të yˈabajnë Tuk Mil Jëmëjt?

¹⁶ ¿Wiˈix yˈixˈatäˈäny ja jukyˈäjtën ko nety të yˈabajnë Tuk Mil Jëmëjt? Ja naxwinyëdë jäˈäy, të nety nyiwatstäˈäyëdë ja poky kaytyey, ets kyaj nëjkx tˈokˈyajtëgoyˈatanëdë parë pën jyuuybyëtsëmëdët o pyudëkëdët ets tmëwingondëdë Jyobaa. “Es ja okpë mëtsip [ . . . ], ja oˈkën” të nety kyutëgooynyë. Pënaty të yˈoˈknëdë të nety jyukypyëjktäˈäytyë, ets niˈamukë pënatyë nety jam yajpattëp ak wäˈätsjäˈäy netynyë (1 Kor. 15:​25, 26).

17, 18. 1) ¿Ti tunan jatanëp ko nety të yˈabety Tuk Mil Jëmëjt? 2) ¿Ti Jesús tyunaampy ko nety të yˈaneˈemy 1,000 jëmëjt? (1 Korintʉ 15:​24, 28; ix nanduˈunë dibujë).

¹⁷ Ko yˈabatët Tuk Mil Jëmëjt, të nety nyigëxëˈëky ko Jyobaa ak oy tijaty ttuny. Pes nˈokjamyajtsëm ko jam Edén, Satanás jyënany ko Jyobaa winˈëˈëmp, ko kyaj oy yˈaneˈemy ets ko kyaj naxwinyëdë jäˈäy ttsoky. Desde mä taabë tiempë, duˈunyëm ja Diosmëduumbëty dyajwäˈätstë ja Diosë xyëëw. Pääty ko yˈabatët 1,000 jëmëjt të nety wyaˈatsy ja Diosë xyëëw ets të nyigëxëˈëky ko Jyobaa xyjyantsy tsyojkëm.

¹⁸ Abëtsëmy nyaxwinyëdë yajnijawëyaˈany ko ixtëmë Satanás tniwäämbejtyë Jyobaa, kyaj tyëyˈäjtënëty. ¿Ti Jesús tyunaampy ko nety yˈabety Tuk Mil Jëmëjt? Myoˈoyaambyë Tyeety jatëgok ja anaˈamën ets ta tkapxykyupëkäˈäny, ets ttunäˈäny duˈun mët ko ttsoky (Käjpxë 1 Korintʉ 15:​24, 28). Jesús kyaj tnibëdëˈëgäˈänyë Jyobaa ixtëm yˈadëtsyë Satanás.

19. ¿Tiijën yˈandijpy ko Jesús tmënëjkxë ja Tyeetyë xyëëw?

¹⁹ Ixtëm nˈijxëm, päätyënë Jyobaa tkëyajky ja xyëëw ets tmooy ja yˈUˈunk parë kyudanëdët, etsë Jesús jantsy oyën të tkudanë. Per ¿tiijën yˈandijpy ko tmënëjkxë ja Tyeetyë xyëëw? Yëˈë ko nitii duˈunë Jesús mëj tkayajnaxy ixtëm ja Tyeetyë xyëëw, kyuˈoˈkë yäˈädë xëëw ets ko yˈabatët Tuk Mil Jëmëjt mä nety të yˈaneˈemy, ta ttukëdëkëyanë Jyobaa ja Anaˈam Kutujkën. ¿Wiˈix mbäät nbanëjkxëmë yˈijxpajtën? Yëˈë nnijawëyäˈänëm mä ja tuˈukpë artikulo.