Miitsëty mbäät xymyëmadäˈäktë

KO Andrea tyëjkë ëxpëjkpë, ta ja nyaˈay mëk jyantsy jyotˈambëjky.a Ets yˈanmääyë ko kyaj nyekynyëjkxët mä naymyujkën ets ko kyaj tmëdowanë Diosë xyëë. Ko ijty tmëdoyë Diosë xyëë Jyobaa, ta jyantsy jyotˈambëky.

Andrea, nan ojtsë nyaˈay yˈanëˈëmxëty ko kyaj ttseky etsë yˈuˈunk yˈënäˈk ttukniˈˈixëdë Dios ets ko nan kyaj twoownëjkxët mä naymyujkën. Mëjwiin kajaa ojts tsyiptakxëty, pes ayuˈutsyë ijty ja yˈuˈunk yˈënäˈk ttukniˈˈijxë pënën Dios.

¿Të näˈä duˈumbë jotmay xypyaaty? Waˈanë mfamilyë mdukmëtsipˈatyëty ko Jyobaa xymyëduny. O waˈan jeky kujk xymyëmadaknë tuˈugë päˈäm, o të yˈoogyë mˈuˈunk, mnyaˈay o mnëdoˈoxy. O waˈan tuˈugë mjiiky mëguˈuk të yaˈëxkexy mä naymyujkën. Mä duˈumbë jotmay, ¿ti mbäät xytyuny parë xymyëduunˈadëˈëtsëdë Jyobaa?

Apostëlë Pablo jyënany: “Mmëdattë miitsëty ja maˈxtujkën” (Ebreeʉsʉty 10:36). ¿Ti mbäät xypyudëjkëm parë nmaˈkxtujkëm o nmëmadakëm?

AMDOWË JYOBAA NYAYBYUDËKË

Ko xyajnaxëdë ayoˈon jotmay, amdowë Jyobaa naybyudëkë parë xymyëmadäˈägët. Duˈunë Ana ttuuny ko nyaˈay yˈoˈky ajotkumonë. Ja nety kujk kyasäädëˈattë 30 jëmëjt. Ana jyënaˈany: “Tuumbë ojts nyijkxy ets kyaj nyekyjëmbijty. Jeˈeyënëmë netyë jyëmëjt 52”.

Ana ta tyëjkë tuun ayoobë parë kyaj tjawët ja jäj jëmuˈumën, per kyaj jyotkujkmooyë. ¿Ti net tyuun? Yëˈë jyënaˈany: “Ndukmëtmaytyakëtsë Jyobaa ets nˈamdoow nbëjktsoowëts parëts xymyëjämoˈoyët”. Ana ijtp seguurë ko Jyobaa pudëjkë, pes ko ijty nyuˈkxtaktäˈäy, ta kyaj ti tnekymyëmay tnekymyëdäjy. Yëˈë jyënaˈany: “Ijtpëts seguurë ko Jyobaa yajjukypyëkaambyëts ja nyaˈay” (Filipʉs 4:6, 7).

Jyobaa tyukwandakypy pënaty mëduunëp ko myëdoowˈijtëbë nyuˈkxtakën (Salmo 65:2). Ets ko myoˈoyaampy tijaty yajtëgoyˈäjttëp parë myëduunˈadëˈëtsëdët. Jyobaa mbudëkëyanëp parë kyaj mˈëxtëkëwäˈägët oy ti jotmay xypyäädët.

NAYAˈITËDË TUˈUGYË MËDË NMËGUˈUKˈÄJTËM

Ja tuk pëky wiˈixë Jyobaa xypyudëjkëm parë nmëmadakëmë ayoˈon jotmay, yëˈë ko dyajjaˈˈatyë nmëguˈukˈäjtëm mä naymyujkën. Extëm ko tëëyëp ja Dios mëduumbëty diˈib Tesalónica nyibëdëˈkëdë jäˈäy, ta nyaymyëjämooyëdë nixim niyam parë tmëmadaktë ja jotmay ets kyaj tmastuttë Jyobaa (1 Tesalónikʉ 2:14; 5:11). ¿Ti tyuundë? Xëmë tyuˈukmujktë ets jantsy oy nyaymyaayëdë. ¿Wiˈix mbäät nbanëjkxëmë yˈijxpajtën?

Tsojkëp nmëdäjtëmë oybyë mëtnaymyaayëbë mä naymyujkën ets nnaymyëjämoˈoyëm nixim niyam. Per niˈigyë mä nwinguwäˈkëmë ayoˈon jotmay (Romanʉs 14:19). Apostëlë Pablo ojts tkuˈayowë ko jäˈäy pyajëdijtë ets ko tpatyë wiinkpë jotmay, perë Jyobaa ojts myëjämoˈoyëty mët yëˈëgyëjxm ja myëguˈuktëjk diˈib mä naymyujkën. Pablo jyënany ko mëjwiin kajaa jyotkujkmooyëdë (Kolosʉ 4:10, 11). Duˈun ja myëguˈuktëjk dyajnigëxëˈktë ko mëkë nety ttsoktë ja Pablo. Waˈan nanduˈun mijts xyjamyetsy ko ojts tëgokë mmëguˈuktëjk mmëjämoˈoyëdë mëdë yˈää yˈayuk o jam tii mdukmëduunëdë.

AMDOWË NAYBYUDËKË MËJJÄˈÄYTYËJK

Ja tuk pëky wiˈixë Jyobaa xypyudëjkëm, yëˈë ko dyajtunyë mëjjäˈäytyëjk diˈib mä naymyujkën. Yëˈë yajtuundëbë Biiblyë parë xypyudëjkëm ets xymyoˈoyëmë käjpxwijën. Biiblyë jyënaˈany ko yëˈëjëty duˈun “extëm tuˈugë yuˈtstakn ko myinyë mëk poj, tuˈugë yuˈtstakn ko myinyë komduu, extëmë nëë diˈib pëyëˈkp mä naxë tëˈëtspë, extëm yaˈˈanikë tuˈugë mëj tsäägaats mä naxë äänëˈëk tëtsëˈëkpë” (Isaías 32:2). Jantsy jotkujk nnayjäˈäwëm ko tyäˈädë nmëguˈukˈäjtëm yˈittë listë parë xypyudëkëyäˈänëm. Pääty, ko xywyinguwäˈägëdë amay jotmay, amdowë naybyudëkë. Pes mbudëkëyanëdëp parë xymyëduunˈadëˈëtsëdë Jyobaa.

Mëjjäˈäytyëjk kyaj mbäät dyaˈoˈoyëtyaˈayë amay jotmay mët ko pokyjyaˈay nanduˈun yajpäättë (Apostʉlʉty 14:15). Per mbäät xynyinuˈkxtakëm, ets yëˈë diˈib xyajnayjawëyäˈänëm jotkujk (Santya̱ˈa̱gʉ 5:14, 15). Jap Italia tap tuˈugë nmëguˈukˈäjtëm diˈib jeky kujk pyëjkënë. Per tapën tmëmadaˈaky. ¿Ti pudëjkëp? Yëˈë jyënaˈany: “Kojëtsë nmëguˈuktëjk xytsyoktë ets kojëts xëmë xykyuˈixëdë, yëˈëjëts xypyudëjkëp parëts nmëmadaˈaky”. Pääty, pën mijts jam xyajnaxyë ayoˈon jotmay, Jyobaa mˈanmääyëp etsë mëjjäˈäytyëjk xyˈamdowëdë naybyudëkë.

PËJTÄˈÄGË MWINMÄˈÄNY MÄ JYOBAA TYUUNK

Oy nyajnäjxëmë ayoˈon jotmay, Jyobaa xypyudëkëyäˈänëm pën jamë winmäˈäny nbëjtakëm mä tyuunk. Duˈun ttuuny tuˈugë nmëguˈukˈäjtëm diˈib xyëˈäjtypy John. Ko netyë jyëmëjt 39, ta yaˈˈanmääy ko yëˈë myëdäjtypyë kanser. Yëˈë wyinmääy ko kyajxyëp tiko yëˈë duˈun jyaty mët ko ënäˈknëm. Mëk ojts tmëmay tmëdäjy ja nyëdoˈoxy ets ja myäänguˈunk diˈib tëgëëgë jyëmëjt. John jyënaˈany: “Ja nnëdoˈoxyëts kyaj nety yëˈëyë tnekykyuentˈaty ja nmäänguˈungëts, nanduˈuntsë nety ëjts xykyuentˈaty ets xyajnëjkxyëts mä doktoor”. Ja tratamientë diˈibë John yajmoopy parë kanser, jantsy yaˈˈanuˈkxëp ets yaˈëëtsanëp. Per tamë nety jatuˈugë jotmay, ojts tnijawë ko ja tyeety tam yˈooganë ets ko tsojkëp pën kyuentˈatëdët.

¿Ti pudëjkë John mëdë fyamilyë ko tpattë tyäˈädë jotmay? Oyë netyë John kyaj oy nyayjawëty, xëmë tpudëjkë fyamilyë ets duˈunyëm tmëdundëdë Jyobaa. Yëˈë jyënaˈany: “Ojtsëts näˈäty xytsyiptakxëdë, per xëmëts ojts nëjkxtë mä naymyujkën, käjpxwäˈkxpë etsëts nDiosˈawdattë tuk familyë”. John ojts tpëkyë kuentë ko jëjpˈam ets oy yˈittët mëdë Jyobaa, ojts yˈatsëˈëgëtyë tyäˈädë jotmay, per jyäˈäwë ko pudëjkë Jyobaa, mooyë ja nikˈäjt xeemyˈäjtën ets ja jot mëjää diˈib yajtëgoyˈajtypy. Yëˈë jyënaˈany ko Jyobaa mbäät tmoˈoyë jot mëjää pënaty mëduunëp duˈun extëm yëˈë yajmooy. Jyobaa nan mbäät mijts mbudëkëty ko ti xymyëmay xymyëdäjët o xyjëjptsëˈëk xyjëjpjawët.

Ko xypyäädëdë ayoˈon jotmay, jamyats extëmë apostëlë Pablo jyënany: “Mëdattë miitsëty ja maˈxtujkën” o mmëmadäˈäktë. Pääty mënuˈkxtäˈägë Jyobaa, nayaˈitëdë tuˈugyë mët ja nmëguˈukˈäjtëm diˈib mä naymyujkën, amdowë naybyudëkë mëjjäˈäytyëjk ets pëjtäˈägë mwinmäˈäny mä Jyobaa tyuunk. Tyäˈädë yëˈë mbudëkëyanëp oy diˈibë jotmay xypyäädët tyam o mä tiempë myiny kyëdaˈaky.