LEKSION 10
¿Tiko yˈoyëty mnëjkxët mä yˈëxpëktë Jyobaa tyestiigëty?
¿Të näˈä mˈokˈyajwoobë mä yˈëxpëktë Jyobaa tyestiigëty? Pën kyaj mdimynyijkxynyëm, waˈan mnatsëˈëk mnajawë ets mnayajtëyëty: “¿Wiˈix jap yˈëxpëktë? ¿Tiko jëjpˈam tpëjktäˈäktë? ¿Oyëdaa kots nanduˈun nëjkxët?”. Mä yäˈädë leksion xynyijawëyaˈany wiˈix xytyukˈoyˈatäˈäny ko mëët mduˈukmuktët ets wiˈix mbudëkëyaˈanyëty parë xymyëwingonëdë Dios.
1. ¿Tiko Jyobaa tyestiigëty tyuˈukmuktë?
Niduˈuk mëdiˈibë jyaayë Salmo ojts tnigajpxy tiko jyëjpˈamëty nduˈukmujkëm, jyënany: “Mä mayjyaˈay tyuˈukmuktë jamëts nmëjkumayaˈanyë Jyobaa” (Salmo 26:12). Jyobaa tyestiigëty nanduˈun tyam tyuˈukmuktë ets agujk jotkujk jyantsy nyayjyawëdë. Koogoo tyuˈukmuktë, ta tmëjkumaytyë Dios, yˈëwdë ets tmënuˈkxtäˈäktë, ets duˈun ttundë abëtsëmy nyaxwinyëdë. Mä tuˈukpë jëmëjt, tuˈukmujktëp kanäkˈok jantsy nimay.
2. ¿Tijaty mjataampy ko mnëjkxët mäts nduˈukmuktë?
Mäts nduˈukmuktë yëˈë jap yaˈëxpëjkpë Diosë yˈAyuk ets yajnimaytyaˈaky yajxon wiˈix nyiwijy nyikejy (käjpxë Nehemías 8:8). Ko mnëjkxët, ta xyˈixyˈatäˈäny mas niˈigyë Jyobaa ets xynyijawëyaˈany wiˈix jantsy oy jyaˈayˈaty. Ko xynyijawët nuˈunën mtsokyëty, ta mas niˈigyë xymyëwingonäˈäny. Mnijawëyaampy nanduˈun wiˈix mbäät mbudëkëtyë Jyobaa parë mjukyˈatët agujk jotkujk (Isaías 48:17, 18).
3. ¿Wiˈix mbudëkëyaˈanyëtyë jäˈäy mëdiˈibë nanduˈun jap tuˈukmujktëp?
Jyobaa tsyojkypy parë “nnaybyudëjkëm nixim niyam”, “nmëdäjtëm waanë niˈigyë tsojkën”, “nduˈunëm diˈibë oy” ets kyaj ndëgoyˈäjtëm mä reunyonk (Ebreeʉsʉty 10:24, 25). Mäts nduˈukmuktë, jap xyˈixyˈatäˈänyë jäˈäy mëdiˈibë jyantsy yajnigëxëˈktëbë tsojkën ets mëdiˈibë yˈixyˈatandëp mas niˈigyë Dios duˈun extëm mijts. Mmëdoowˈitaampy jap nanduˈun wiˈixë Biiblyë yajnimaytyaˈaky (käjpxë Romanos 1:11, 12, TNM). Mbäät nanduˈun jap xyˈixyˈatyë jäˈäy mëdiˈibë wiˈixëm të twinguwäˈägëdë amay jotmay. Päätyënë Jyobaa ttsoky ets nreunyonkˈäjtëm jëjwitsë extëm yä të yajnigajpxy tuk pëky majtsk pëky.
AK NIJAWË NIˈIGYË
Min nˈokˈijxëm wiˈix yˈëxpëktë Jyobaa tyestiigëty ets wiˈix mbudëkëyaˈanyëty mëjwiin kajaa ko xytyunëdë mëjääw parë mnëjkxët.
4. ¿Wiˈix yˈëxpëktë Jyobaa tyestiigëty?
Pënaty tim jawyiin ojts tpanëjkxtë Jesus, xëmë tyuˈukmujktë parë tˈawdäjttë Jyobaa (Romanʉs 16:3-5). Käjpxtë Kolosʉ 3:16 ets nimaytyäˈäktë mëdiˈibë yä yajtëëpy:
Pënaty tim jawyiin ojts tpanëjkxtë Jesus, ¿wiˈix tˈawdäjttë Jyobaa?
Tyamë Jyobaa tyestiigëty xëmë nanduˈun tyuˈukmuktë. Parë xynyijawët wiˈix yˈëxpëktë, ixtë BIDEO. Ta net xyˈixtëdë dibujë ets xynyimaytyäˈäktët mëdiˈibë yä yajtëëpy:
Extëm jyënaˈanyë Kolosʉ 3:16, ¿tyuundëp nanduˈunë Jyobaa tyestiigëty?
Extëm të xyˈixy mä bideo o mä dibujë, ¿ti mas niˈigyë të xyˈoyˈixy?
Käjpxtë 2 Korintʉ 9:7 ets nimaytyäˈäktë mëdiˈibë yä yajtëëpy:
¿Tiko kyaj pënë meeny sentääbë yaˈˈamdoy mä yˈëxpëktë Jyobaa tyestiigëty?
Waˈan mdukniˈˈixëty ja mëdiˈibë myaˈëxpëjkëp ti naxäämp ja tuk sëmään mä reunyonk.
Tijaty yaˈëxpëkäämp ja tuk sëmään, ¿ti mbäät mbudëkëty o ti niˈigyë të xyˈoymyëdoy?
¿Mnijäˈäwëp?
Mä jw.org mbäät jap xypyaaty mäjatyëts nduˈukmuktë abëtsëmy nyaxwinyëdë ets näˈäjaty.
Mäts nduˈukmuktë, yajnimaytyakpë Biiblyë, yaˈˈaduunäjxp wiˈixëts mbäät nyaˈëxpëktë, ngäjpxwäˈkxtë ets näjxpë bideo. Ko tsyondaˈaky ets ko jyëjpkëxy, ëëw yaxtëbëts ets nuˈkxtaktëbëts.
Mä tyuˈuyeˈey ja ëxpëjkën, tap mä mbäädë jäˈäyë kyëˈë tkonëˈëktë ets yˈatsowdë.
Niˈamukë jäˈäy tsuj yajxon yaˈˈagëˈë yaˈˈaxäjëdë, yetyëjk toxytyëjk, mëjjäˈäytyëjk etsë ënäˈkuˈunk.
Mä yˈëxpëktë Jyobaa tyestiigëty kyaj yaˈˈajuytyuky ets kyaj pënë meeny yaˈˈamdoy.
5. Nimëjääwdakp nëjkxëm reunyonk
Nˈokwinmäˈäyëm ja Jesusë fyamilyë. Jamë nety tsyëënëdë Nazaret, ets parë nyëjkxtë jëmëjt jëmëjt jam Jerusalén mä ja templë, ja ijty tyuˈuyeˈeytyë naa tëgëk xëëw tunoty kopkoty. Käjpxtë Lukʉs 2:39-42 ets nimaytyäˈäktë mëdiˈibë yä yajtëëpy:
Wiˈix mˈokwinmay, ¿yajnimëjääwdaktëdaa ko ijty nyëjkxtë Jerusalén?
Ets mijts, ¿tijaty mbäät mˈanäjxtukyëty parë kyaj mnëjkxët reunyonk, ets ti mbäät xytyuny parë kyaj ti myajtuˈuwëˈëmëdët?
Wiˈix mˈokwinmay, ¿mdukˈoyˈataambyëdaa ko mnëjkxët reunyonk oy nuˈun xyajnimëjääwdäˈägët? ¿Ets tiko duˈun mwinmay?
Biiblyë jyënaˈany ko jëjpˈam nduˈukmujkëm parë nˈawdäjtëmë Jyobaa. Käjpxtë Ebreeʉsʉty 10:24, 25 ets nimaytyäˈäktë mëdiˈibë yä yajtëëpy:
¿Tiko yˈoyëty xëmë nëjkxëm reunyonk?
NÄÄGË JÄˈÄY JYËNÄˈÄNDË: “Kyaj tyim jëjpˈamëty nëjkxëm muum mä yaˈˈawdatyë Dios. Nëgoo ko ngäjpxëmë Biiblyë jënoty tëgoty”.
¿Mëdiˈibë tekstë o ijxpajtën xytyukˈijxëm ko Jyobaa tsyojkypy nduˈukmujkëm?
TI TË NJÄJTËM
Ko mnëjkxët reunyonk mbudëkëyanëp parë mas niˈigyë xyˈixyˈatëdë Jyobaa, xymyëwingonët ets xyˈawdatët mëdë wiink jäˈäy.
Ajamyatsë
¿Tiko Jyobaa xyˈanmäˈäyëm ets nëjkxëm reunyonk?
¿Tijaty mjataampy ko mnëjkxët mä yˈëxpëktë Jyobaa tyestiigëty?
¿Mbäät wiˈixtsoow mˈakpudëkëty ko mnëjkxët reunyonk?
AK PAYEˈEY
¿Mnatuktëjkëbë tsëˈëgë ko xywyinmay mnëjkxët reunyonk? Tuˈugë yetyëjk duˈunë nety nyayjyawëty, per ko yˈojtsy reunyonk extëm ojts ttimˈoyˈijxnë. Nijawë tiko.
¡Ninäˈäts ngajäˈäytyëgoytyët wiˈixëts ojts xyˈëboˈkx xykyäjpxpoˈkxtë! (4:16)
Ixyˈat tuˈugë mixy mëdiˈibë jyantsy yˈoyˈijxë reunyonk ets ti tyuun parë kyaj tyëgoyˈajty.
Nijawë wiˈix näägë jäˈäy tˈixtë reunyonk.
“¿Tidaa ko yˈoyëty nëjkxëm mä yˈëxpëktë Jyobaa tyestiigëty?” (Myiny mä jw.org)
Nijawë wiˈix tuˈugë axëkjäˈäy dyajtëgäjtsyë jyukyˈäjtënë ko ojts yeˈeytsyondaˈaky reunyonk.
“Xëmëtsë nety nmëjëdityë nbistolë” (Myiny mä Diˈib Xytyukˈawäˈänëm)