Moisés myëdäjtë mëbëjkën
¿TI YˈANDIJPY MËBËJKËN? Biiblyë jyënaˈany ko yëˈë yˈandijpy ko ti njantsy myëbëjkëm mët ko tyëyˈäjtëndëkë. Diˈib myëbëjkypyë Dios, seguurë yˈity ko adëwäämp tijatyë Dios të twandaˈaky.
¿WIˈIXË MOISÉS DYAˈIJXË MËBËJKËN? Ja dyaˈijxë mä tijaty tyuun ko jyukyˈajty, yëˈë myëbëjk tijatyë Dios wyandak (Génesis 22:15-18). Kyaj twinˈijxy jyukyˈatäˈäny jantsy oy Egipto ets myëkjäˈäyˈatäˈäny, yëˈë wyinˈijx parë “axëëk yajtunët mët ja Diosë jyaˈayëty, es këdiinëmxyëp ko tuk tsojk pekyoty xyondäˈägët” (Ebreeʉsʉty 11:25). ¿Waˈan kyaj tniwinmäˈäyë? ¿Myëkjäˈäwë ok? Kyaj, Biiblyë jyënaˈany ko yëˈë “dyajˈyoˈoy ja tyuˈu extëm jyawë tˈixy ja Dios” (Ebreeʉsʉty 11:27). Yëˈë ninäˈä ok tkamëkjäˈäwë tijaty tyuun mët ko myëdäjtë mëbëjkën.
Moisés tyuunë mëjää parë tpudëjkë myëguˈuktëjk ets kyëktëkëdë myëbëjkën. Extëm ko ja israelitëty yajnadujkëdë faraon mët ja tsyiptuumbëty mä ja mejnyë Tsaptspë, ta ojts tjantsy myëgäjpxtë Jyobaa etsë Moisés. ¿Ti Moisés tyuun?
Waˈanë Moisés kyaj ttimwinmääy ko Dios dyajnaywyäˈkxäˈänyëty ja mejny parë nyaxtët windëˈëtstuuy. Per ijt seguurë ko Dios mbäät ti ttuny parë yaˈˈawäˈätspëtsëmëdët ets nan tsyojk parë ja myëguˈuktëjk yˈittët seguurë. Biiblyë jyënaˈany: “Ta ja Moisés ojts yˈëtsowëtë: Këdii mtsëˈëgëdë. Ittë amëk jotmëk. Yëˈë Dios yëˈë duˈun të ttuknibëjktäägë, ets tyam duˈun ënet xyˈixtëty, wiˈix ënet yam xyajtsokmëtyën” (Éxodo 14:13, Mʉgoxpʉ ja̱ noky mʉdiˈibʉ jyaayʉn Moisés [MNM]). ¿Ojts ja israelitëty kyëktëkë myëbëjkën? Ojts, pesë Biiblyë jyënaˈany: “Mëbëjkëngyëjxm ja israelitë jäˈäyëty [ets ja Moisés] ttuknäjxtë ja Tsapts Jikymyejyny extëm jyawë windëˈëtstuuy” (Ebreeʉsʉty 11:29). Moisés tyukˈoyˈäjt ko tmëdäjtyë mëbëjkën ets nanduˈun pënaty panëjkxë yˈijxpajtën.
¿TI XYTYUKNIˈˈIJXËMË YˈIJXPAJTËN? Ko tsojkëp nmëbëjkëm tijatyë Dios wyandakypy ets nyajnigëxëˈkëm mä tijaty nduˈunëm. Tuk pëky diˈib wyandakypy, yëˈë ko xymyoˈoyäˈänëm tijaty nyajtëgoyˈäjtëm ko jawyiin nbëjtakëmë Jyobaa mä jukyˈäjtën (Matewʉ 6:33). Kom mayë jäˈäy yëˈë pyëjtaktëp jëjpˈamë jukyˈäjt madakën, pääty xytsyiptakxëm njëjpkudijëm, per mbäät nˈijtëm seguurë ko Jyobaa xymyoˈoyäˈänëm tijaty nyajtëgoyˈäjtëm pën adëyë njukyˈäjtëm ets pën nbëjtakëm aduˈugë winmäˈäny mä tyuunk. Yëˈë twandaˈaky: “Ninäˈä nganaˈixët, es ninäˈä ngamastuˈudët” (Ebreeʉsʉty 13:5).
Nan tsojkëp nduˈunëmë mëjää parë nbudëjkëm pënaty mëët nyajpatëm ets kyëktëkëdë myëbëjkën. Extëm nˈokpëjtakëm, uˈunktääk uˈunkteety yëˈë diˈib mbäät tpudëkëdë yˈuˈunk yˈënäˈk parë tmëbëktëdë Dios. Tsojkëp ttukniˈˈixëdët desde mutsknëm ko tamë Dios yajpääty ets ko yëˈë pyëjtakypyë anaˈamën mä ti oy ets ti axëëk. Nan tsojkëp tjaygyukëdët ko diˈib mas oy, yëˈë ko tmëmëdowdëdë tadë anaˈamën (Isaías 48:17, 18). ¡Mëjwiin kajaa diˈibë uˈunktääk uˈunkteety tyukumääytyëbë yˈuˈunk yˈënäˈk ko tpudëkëdë parë “tmëbëkët ko jyaaty ja Dios es ko kyuniˈxypy diˈibaty yˈëxtääytyëp”! (Ebreeʉsʉty 11:6.)
[Dibujë diˈib mä pajina 4]
[Dibujë diˈib mä pajina 4]