Matamanai Baibul ai O Diba Hahediba ese Doini be Durumumu, A?

1. Oi ese hereva momokani o diba neganai, Baibul ese oi be ede e durumu toma?

ITA ESE gunaguna eda Baibul stadi ai ta diba herevadia ese eda mauri na e haidau. Heḡereḡere, Dirava ladana na Iehova na ita ese ta dibaia neganai, ita na Dirava turana ai tala. (Isa. 42:8) Mase taudia ediai be dahaka e varamu na ita ese ta dibaia neganai, hari idia garidia na vada asita garimu. (Had. 9:10) Bona Dirava ese tanobada na Paradaiso ai baine halaoa sivaraina ta dibaia neganai, ita ese vaira negana na hari vada asita lalohekwarahilaiamu. Ita ese vada ta abia daeva ita na dia laḡani 70 eiava laḡani 80 mo baita nohomu, lasi, to ita na baita maurimu ela bona hanaihanai.—Sal. 37:29; 90:10.

2. Edena dala ai Pita ese e hahedinaraia, lo Keristani taudia ese Baibul ai e diba ḡaudia bae lalodia tao na namo? (2 Pita 1:​12, 13)

² Namona na ita ese baita laloatao, Baibul stadi ai ta diba ḡaudia na doini mai anidia bada. Apostol Pita ese ena revareva iharuana amo e tore henidia Keristani taudia mani aita lalodia. Idia na ‘hereva momokani ai e gini tutuka-tutukava’ taudia. (2 Pita 1:​12, 13 ba duahidia.) To una negai, kongrigeisin ai taunimanima haida na e urava tadikaka lalodia bae ani, hereva momokani bae dadarai. (2 Pi. 2:​1-3) Pita na e ura tadikaka bona taihu baine durudia unu taunimanima edia hereva koikoidia bae dadaraidia. Una dainai, Pita ese idia e hamaorodia loulouva, idia ese matamanai Baibul amo e dibadia herevadia bae lalodia tao na namo. Badina unu hereva ese idia na bae durudia Iehova bae badinaia noho totona.

3. Dahaka dainai Keristani taudia ese Baibul amo e dibadia guna herevadia bae lalodia dobu hanaihanai na namo? Haheitalai ta ba gwauraia.

³ Ena be ita na laḡani momo Iehova ta hesiai heniamu, to matamanai eda Baibul stadi amo ta diba herevadia ese ita na dounu be durudamu. Haheitalai: Sina ta be kiapa turi mai dibana bona kekeni be sinana e ḡaukaralaimu varodia amo kiapa e turimu. To laḡani momo lalodiai, sina na unu varo amo kiapa matamatadia ma haida be turimu. Una heḡereḡerena, laḡani momo Iehova e hesiai heniamu taudia na Baibul ai ḡau matamatadia ma haida e dibamu, a stiudent matamatadia be dounu Baibul e stadilaiamu. Ita bapatiso ta abia negana amo, eda noho dalana bona Iehova ta hesiai henia dalana na e idau. Ita ese Baibul stadi ai ta diba ḡaudia ginigunadia bona harihari ta dibamu ḡaudia ta haheḡereḡeremu neganai, ita ese dala matamata ma haida ta dibamu bona ta badinamu. Baibul ena hahediba toi ese lo Kristen taudia baine durudia dalana mani aita herevalai.

IEHOVA NA ḠAU IBOUDIAI E HAVARA

4. Iehova ese ḡau iboudiai e karadia sivaraina na ita ese ta dibaia neganai, una ese ita be ede e duruda toma?

⁴ Ita na mai dibada tanobada bona ḡau iboudiai na aonega bona siahu idoinai Diravana ese e karadia. Baibul eto: “Ḡau iboudiai ikaradia be Dirava.” (Heb. 3:4) Ina hereva momokani amo ita na ḡau momo baita dibamu. Ia ese ita e karada dainai, ita na e dibada ḡoevaḡoeva. Danu, ia ese ita na e laloda badamu bona ia na mai dibana ita be ede baine duruda toma. Momokani, Iehova ese ḡau iboudiai e karadia sivaraina ta diba neganai, una ese eda mauri na e haidaua namo herea bona hari eda mauri na mai anina bada.

5. Iehova ese ḡau iboudiai e karadia sivaraina ese ita e hadibadamu, dahaka baita kara be namo? (Isaia 45:​9-12)

⁵ Iehova ese ḡau iboudiai e karadia sivaraina ese e hadibadamu ḡauna ta be ina: Namona na ita na baita manau. Heḡereḡere, nega ta ai, Job na ia bona ma haida sibodia maorodia e gwauraiva. To, Iehova ese Job e hadibaia ia na ḡau iboudiai e karadia bona ia na siahu idoinai Diravana. (Job 38:​1-4) Una amo Job e laloparara, nega iboudiai Iehova e karamu ḡaudia iboudiai na mamaoro-mamaoro. Danu gabeai, peroveta tauna Isaia na eto: “Raro ese iḡaukaralaina tauna e gwau heniamu a? E tomu ‘Dahaka o karamu?’”—Isaia 45:​9-12 ba duahidia.

6. Bema ita ese baita lalotaomu Iehova na ḡau iboudiai e karadia, una ese ita be ede be duruda tomamu? (Laulau danu baita itaia.)

⁶ Laḡani momo Iehova e hesiai henia tauna na ena diba dainai sibona ena lalohadai ai be tabekaumu, to Iehova bona Baibul ai basine tabekaumu. (Job 37:​23, 24) To bema ia ese be lalotaomu, Iehova na ḡau iboudiai e karadia bona Ia ena aonega bona siahu na bada herea be ede bamona? (Isa. 40:22; 55:​8, 9) Una ese ia be duruamu be manaumu bona ia sibona ena lalohadai ai basine tabekaumu.

7. Rahela ese orea e karaia senisi e abia dae badina be dahaka?

⁷ Slovenia ai, taihu Rahela na e abia dae Iehova na ḡau iboudiai e karadia Diravana dainai una ese e durua orea ese e karaia senisi ta na e abia dae. Ia eto: “Nega haida ai, lau egu ai na auka orea ese e karamu disisin haida baina abi dae. Heḡereḡere, lau ese 2023 Gavanin Bodi Update #8 ena vidio na itaia murinai, launa na hoa badina nega ginigunana vidio ai na itaia tok e heniva tadikakana aukina na mai huina. To, lau ese Iehova na ḡuriḡuri henia, baine durugu una senisi baina abia dae.” Rahela dibana, Iehova na guba bona tanobada e karadia dainai ia ese ena orea na hanaihanai dala maorona ai e hakauamu. Bema oi danu orea ese e karamu senisi matamatadia bavabi dae na auka, namona na ba manau bona bavabia dae Dirava ena aonega bona siahu na bada herea.—Rom. 11:​33-36.

DAHAKA DAINAI DIRAVA ESE HISIHISI SE KOUAMU

8. Dirava ese hisihisi se kouamu sivaraina ese ita be ede be duruda tomamu?

⁸ Dahaka dainai Dirava ese hisihisi se kouamu? Haida na una henanadai ena haere asi dibadia dainai, idia ese Dirava e badu heniamu eiava e laloamu Dirava na lasi! (Prov. 19:3) Oi dibamu be, ita na dia Iehova dainai, to kara dika bona dia ḡoevadae tauda dainai, baita hisihisimu bona baita masemu. Danu oi dibamu, Iehova e haheaukamu bona hisihisi do se haorea dainai, una ese dala e kehoamu taunimanima momo herea ese Iehova bona ia ese hisihisi baine haorea dalana na bae dibaia. (2 Pi. 3:​9, 15) Dirava ese hisihisi se kouamu sivaraina ese oi e hadibamu bona e durumu Iehova turana ai baola.

9. Iehova ese hisihisi se kouamu badidia baita laloa lou na namo. To ededia negai unu baita kara toma na mai anina bada?

⁹ Iehova ese hisihisi baine haorea negana ta nariamu lalonai, namona na ita na baita haheauka. Turada ta e masemu, eiava ita o eda ruma taudia edai metau ta e varamu, eiava ta ese ita e hahisidamu neganai, ita na ta badumu badina Iehova ese hisihisi na se haorea haraḡamu. (Hab. 1:​2, 3) Nega unu bamodia ai, namona na Iehova ese hisihisi se kouamu badidia baita laloa lou.a (Sal. 34:19) Danu ita ese baita laloa ḡauna ta na, Iehova na e uramu hisihisi na baine haorea vaitani.

10. Ena be Anne na sinana e mase, to dahaka dainai ia na lalo-maino ai e nohova?

¹⁰ Dirava ese hisihisi se kouamu sivaraina ese baine duruda, nega iboudiai baita haheauka. Taihu Anne na eto: “Sinagu e mase neganai, launa na tai dikadika. Ena be laḡani haida vada e hanai, a launa dounu lalohisihisi ai na nohomu. To, lau ese nega ibounai na laloa taomu, Iehova ese hisihisi na se havaramu. Ia na e ura badamu hisihisi iboudiai na baine haoredia bona turada na mase amo baine hamauridia lou. Lau ese hereva unu bamodia na lalomu negadiai, unu ese lalo-maino e henigumu, ena be sinagu na dounu na laloamu.”

11. Dirava ese hisihisi se kouamu badidia haida be dahaka? Bona edena dala ai una ese ita baine duruda nega iboudiai baita haroro totona?

¹¹ Dirava ese hisihisi se kouamu sivaraina ese baine hagoadada, nega iboudiai ita na baita haroro. Apostol Pita eto, Iehova ese hisihisi se koua haraḡamu badina be ia na e uramu taunimanima na bae helalo kerehai bena bae mauri. Danu, Pita ese ita baita karaia ḡauna na e gwauraia, eto: “Emui kara iboudiai bema helaḡa; Dirava boma badinaia.” (2 Pi. 3:11) ‘Dirava baita badinaia’ karana ta na, haroro ḡaukarana. Ita Tamada, Iehova, heḡereḡerena, ita ese taunimanima baita lalokau henidia. Ita na ta uramu idia bona ita na Dirava ena tanobada matamatana ai baita noho hebou. Iehova na e haheaukamu badina e uramu eda hanua taudia na Ia bae toma henia diho. Oi na Dirava ida o ḡaukara heboumu bona ini dina gabedia ai taunimanima momo o durudiamu Iehova e dibaiamu na hahenamo ta!—1 Ko. 3:9.

ITA NA “DINA GABEDIA” AI TA NOHOMU

12. Ita na “dina gabedia” ai ta nohomu. Una ta dibaiamu ese ita be ede e duruda tomamu?

¹² Baibul ese e hahedinaraia ḡoevaḡoeva, “dina gabedia” ai taunimanima be dahaka bae kara. (2 Ti. 3:​1-5) Ita dekedai e nohomu taudia edia kara amo ta itaiamu Baibul ena hereva na momokani. Ita ese ta itaiamu taunimanima edia kara dikadia na e bada e laomu. Una dainai, ita na ta abia dae momokanimu, Dirava ena Hereva na momomo-kakani.—2 Ti. 3:​13-15.

13. Iesu ena sivarai ese ita be ede e duruda tomamu? (Luk 12:​15-21)

¹³ Luk 12:​15-21 ba duahia; NWT. Ita na dibada “dina gabedia” ai ta nohomu dainai, ita ese eda nega na baita ḡaukaralaia namonamo. Iesu ena sivarai ese e hadibadamu dahaka dainai unu baita kara toma na namo. Dirava ese taḡa tauna ‘kavana’ e gwauraia badina ena kohu be momo, a? Lasi, to badina be ia ese ḡau kereredia na e atodia gunava. Momokani, ia na ‘sibona totona dava bada kohudia e haboudiava, to Dirava matanai ia na ogoḡami tauna.’ Ia ese ena nega e ḡaukaralaia kerere na kavakava badina gabeai ia ena mauri na e kwadogi. Dirava ese taḡa tauna e hamaoroa, eto: “Hari hanuaboi [emu mauri] na emu amo baina abia oho.” Ina sivarai ese ita be ede e duruda tomamu? Nega na vada kwadogi herea bona nega sisina murinai Dirava ena dina badana vada be kaumu. Una dainai, ita siboda baita henanadai: ‘Lau be mai anina bada ḡaudia na ato gunamu amo na hahedinaraiamu, lau ese egu nega na ḡaukaralaia namonamomu, a? Lau ese natugu be na durudiamu mai anina bada ḡaudia bae ato guna totona, a? Lau ese egu goada, egu nega, bona egu moni o kohu be na ḡaukaralaimu, unu amo egu ḡau namodia na guba ai baina haboudia eiava launa sibogu egu namo mo na lalo badamu, a?’

14. Miki ena sivarai amo ta itaiamu, dahaka dainai baita laloatao ita na “dina gabedia” ai ta nohomu?

¹⁴ Ita na dibada “dina gabedia” ai ta nohomu dainai, ita ese abia hidi maorodia baita kara na namo. Una na Taihu Miki enai e vara. Ia eto: “Hai skul ai na gradueit murinai, launa na urava iunivesiti bainala bona animal baina stadilaidia. To danu, launa na urava regula painia ḡaukara baina karaia bona pablisa dia momo gabudia ta bainala. Egu kongrigeisin taudia ese lau e hamaoroguva baina haeroa namonamo, lau be iunivesiti bainala eiava lauma ḡaudia baina atodia guna? Idia ese lau e hadibaguva, nega na vada kwadogi herea. Danu, idia ese lau e hamaoroguva, tanobada matamata ai lau ese animal idauidau baina stadilaidia ela bona hanaihanai. Una dainai, launa iunivesiti na dadaraia, to kosi kwadoḡina ta na abia hidi. Gabeai, lau na moni ḡaukara ta na davaria—una amo na abiava monina na heḡereḡere dainai, lau ese painia ḡaukara na karaiava bona gabeai pablisa dia momo gabuna ta nala, Ecuador ai.” Miki bona adavana ida una tano ai seket ḡaukarana e karaiamu.

15. Herevana taunimanima ese sivarai namona bae dadaraia, to dahaka baita kara na namo? Haheitalai ba gwauraia. (Laulau danu ba itadia.)

¹⁵ Taunimanima ese sivarai namona bae dadaraia neganai ita na basita lalomanoka. Badina taunimanima edia mauri na gabeai e idaumu. Iesu ena brada Jeims ena haheitalai mani aita laloa. Ia matana ai e itaia Iesu na e bada, Mesia ai ela, bona taunimanima e hadibadiava dalana na idau herea. Ena be laḡani momo lalodiai Jeims na Iesu murinai se rakava, to gabeai Iesu e tore-isi lou murinai, ia na apostol goadana ai ela!b (Jon 7:5; Gal. 2:9) Una dainai, ḡau badana na varavarada baita haroro henidia, herevana idia na doini sivarai namona e dadaraiamu. Danu, ena be gunaguna asie urava sivarai namona bae kamonai, to oi ese idia na ba haroro henidia lou. Baita helalo tao ita na dina gabedia ai ta nohomu dainai, baita haroro goadagoada. Taunimanima na hari oi ese idia ediai o harorolaia ḡauna na gabeai be laloamu bena ḡau ta be karaiamu, reana hisihisi bada hereana be matamaiamu murinai danu.c

IEHOVA ENA LAUMA ANIANI NA BA LALODIA TAO HANAIHANAI

16. Iehova ena lauma aniani ese oi be ede e durumu toma? (Maua ladana “Baibul Ena Hereva Momokani amo Ma Haida Ba Durudia” ba itaia.)

¹⁶ Orea ese e halasimu lauma aniani haida ese kamonai taudia na be durudiamu. Heḡereḡere, bema ta na dia Iehova ena Witnes, ia na pablik tok, jw.org ena vidio, atikol idauidau, bona magasin amo heduru baine abi diba. Danu, unu lauma aniani ese ita na e durudamu Iehova baita lalokau henia, Baibul baita abidadama henia, bona ma haida ediai sivarai namona baita harorolaia namonamo.—Sal. 19:7.

17. Ededia nega idauidau ai Baibul ena hereva ba lalodia tao na namo?

¹⁷ Laḡani momo Iehova ta hesiai heniamu dainai Baibul ena hahediba matamata ta e halasiamu neganai, ita na ta moalemu. To danu ita na ta moalemu badina gunaguna Baibul stadi ai ta diba herevadia na mai anidia bada bona una ese e duruda Iehova turana ai tala. Momokani, unu hereva ese hari ita na doini e durudamu. Orea ese hahekau herevana ta e halasiamu neganai, reana nega haida ai ita na baita laloamu eda lalohadai na maoro, to namona baita manau bona baita laloatao siahu idoinai Diravana, Iehova, ena aonega na bada bona ia ese ḡau iboudiai na e karadia. Ita eiava turada ta na hisihisi ta ta davariamu neganai, namona na baita haheauka bona Iehova ese hisihisi se kouamu badina baita laloa dobu. Bona namona na baita laloatao nega na kwadogi herea bona nega sisina murinai Dirava ena dina vada be kaumu, unu amo ita ese eda nega bona moni o kohu na baita ḡaukaralaidia namonamomu. Namona na Iehova ena lauma aniani ese nega iboudiai ita baine duruda, baine hagoadada, bona baine ha-aonegada.