Dekemu ai Mimia Ḡaudia Ba Moalelai Karana ‘Vada O Manadalai’?

1. Edai mimia ḡaudia be ede baita lalodia toma?

OI BE dekemu ai e miamu ḡaudia o moalelaimu, a? Iehova ena gwauhamata iboudiai e lalomu tauna ese mauri na e moalelaiamu. Ena be ia na ḡau haida ai reana e dabumu, to ia na basine lalohisihisimu eiava basine badumu. Herevana hari ita na dekeda ai mimia ḡaudia ta moalelaimu, to dounu baita hekwarahi dala idauidau ai Iehova baita hanamoa. Bona ita ese Iehova ihesiai henina karana baita habadaia na maoro. (Rom. 12:1; 1 Ti. 3:1) Danu, herevana ita ese ta ura heniamu hahenamona ta na do asita abia, to dounu baita moale.

2. Bema ita na dekeda ai mimia ḡaudia basita moalelaimu, dahaka be varamu?

² Bema ita na dekeda ai mimia ḡaudia basita moalelaimu, reana disisin kereredia vada baita kara matamamu. Heḡereḡere, haida na moni ḡaukara ai overtime momo e karamu, unu amo ḡau asi anidia bae hoi. Madi, Kristen taudia haida na moni bona e ura henimu ḡaudia ma haida e henaomu. Reana idia na sibodia ini e lalo tomava, ‘Ini na lau egu,’ ‘Ina ḡau na harihari na ura heniamu,’ o ‘Moni na harihari baina abia bona gabeai davana baina haloua.’ To, henaohenao karadia iboudiai na Dirava ese e inai henidiamu bona unu kara ese Iehova ladana na e hadikaiamu. (Prov. 30:9) Ma haida be dagi o hesiai maduna asie abi dainai e lalohisihisi bada bona Iehova ihesiai henina karana e hadokoa vaitani. (Gal. 6:9) Dahaka dainai Iehova ena hesiai tauna ta na unu baine kara toma? Badina reana ia na dekena ai mimia ḡaudia vada se moalelaimu.

3. Filipi 4:​11, 12 amo ita be dahaka ta dibamu?

³ Ita iboudai na dekeda ai mimia ḡaudia baita moalelai dibamu. Apostol Paulo eto: “Vada na manada, egu ai e miamu ḡaudia baina moalelai.” (Filipi 4:​11, 12 ba duahidia.) Ia ese unu hereva na ia dibura ruma ai e nohova neganai e toredia. Herevana dahaka, to ia na dounu e moaleva. Ia ese dekena ai mimia ḡaudia e moalelaiva karana na e manadalaia. Paulo ena hereva bona mauri sivaraina ese e hamomokaniamu, ita danu dekeda ai mimia ḡaudia na baita moalelai dibamu, herevana eda mauri dalana na edeheto. Namona na ita na basitato, ‘Egu noho maurina ai ḡau iboudiai na heḡereḡere.’ Unu na basita lalo toma, to edena dala ai ita na baita manada, dekeda ai mimia ḡaudia na baita moalelai? Mani kara namodia haida aita herevalai, badina unu ese ita na be durudamu dekeda ai mimia ḡaudia na baita moalelaimu.

NEGA IBOUDIAI BA TENKIU

4. Dahaka dainai Dirava e tenkiu heniamu tauna na ia dekena ai mimia ḡaudia be moalelaimu? (1 Tesalonika 5:18)

⁴ Dirava e tenkiu heniamu tauna na e moalemu. (1 Tesalonika 5:18 ba duahia.) Bema ita na dekeda ai mimia ḡaudia daidiai Dirava baita tenkiu heniamu, una ese be durudamu mauri ai ta ura henimu ḡaudia na basita lalo momo. Bema Iehova baita tenkiu heniamu badina dala idauidau ai ia ta hesiai heniamu, una ese be durudamu ta ura henimu hahenamo matamatadia basita lalo momomu to hari ta karaiamu hesiai ḡaukarana baita karaia namonamomu. Baibul ese ita e hagoadadamu, ḡuriḡuri ai Iehova baita tenkiu henia na maoro. Ita ese Dirava ta tenkiu heniamu neganai, “Dirava ena maino, eda diba idoinai e hereaiamu mainona” na baita mamiamu.—Flp. 4:​6, 7.

5. Israel taudia ese Dirava bae tenkiu henia badidia haida be dahaka? (Laulau danu ba itaia.)

⁵ Israel taudia edia sivarai mani aita laloa. Nega momo, idia ese Iehova e maumauraiava badina idia e ura heniva anianidia na Egypt ai. (Nam. 11:​4-6) Vaia, tano ḡaḡaena ai mauri na auka. Edena dala ai Israel taudia na dekedia ai mimia ḡaudia bae moalelaidia? Namona na Iehova ese idia daidiai e kara ḡaudia iboudiai na idia ese bae lalodia bona ia bae tenkiu henia. Namona na idia ese bae laloa tao, gunaguna Egypt taudia ese idia na hesiai taudia ai e halaodia bona e daḡedaḡe henidiava, to Iehova ese hisihisi iboudiai 10 amo Egypt taudia e hahisidia bona idia e hamauridia. Israel taudia na Egypt e rakatania neganai, Iehova ese idia e durudia dainai idia ese Egypt taudia edia silver, gold bona dabua momo herea e abi. (Eso. 12:​35, 36) Farao mai ena tuari oreana ida bona Davara Kakakakana bogaragidia ai Israel taudia e gini neganai, Iehova ese davara e hapararaia idia bae raka hanai totona. Danu tano ḡaḡaena ai, Iehova ese dina iboudiai mana amo idia e ubudiava. To, dahaka dainai Israel taudia na aniani daidiai e maumauva? Ena be Iehova ese e heniva anianidia na heḡereḡere, to idia ese una na asie laloava bona Iehova na asie tenkiu heniava.

6. Ededia dala haida ai baita hahedinaraia ita na dekeda ai mimia ḡaudia daidiai baita tenkiu?

⁶ Ededia dala toi ai oi ese ba hahedinaraia oi na dekemu ai mimia ḡaudia daidiai ba tenkiu? Ginigunana na, oi ese o moalelaimu ḡaudia na dina iboudiai ba lalodia. Reana oi ese o moalelaimu ḡaudia rua o toi na pepa ta ai ba toredia diho. (Lal. 3:​22, 23) Iharuana na, oi ese tenkiu herevana ba gwauraia hedinarai. Haida ese oi daimu ai e karamu ḡaudia daidiai, oi ese idia ba tenkiu henidia. To hereadaena be, nega iboudiai oi ese Iehova ba tenkiu henia. (Sal. 75:1) Ihatoina na, oi ese tenkiu e gwauraimu taudia ba bamodia. Maumau taudia e bamodiamu taudia na e maumau momomu danu, to tenkiu e gwauraimu taudia e bamodiamu taudia na unu e kara tomamu danu. (Deut. 1:​26-28; 2 Ti. 3:​1, 2, 5) Nega iboudiai bona dala idauidau ai ita ese tenkiu herevana baita gwauraiamu neganai, ita na basita badu momomu bona basita lalohisihisimu.

7. Dahaka dainai Aci na dekena ai mimia ḡaudia e moalelaiva?

⁷ Indonesia ai, Taihu Aci ena sivarai mani aita laloa. Ia eto: “COVID-19 pandemic negana ai, lau ese egu noho dalana na egu kongrigeisin taudia edia ida na haheḡereḡereva. Una dainai, lau na asina moaleva.” (Gal. 6:4) Dahaka dainai Taihu Aci ese ena lalohadai e haidaua? Ia eto: “Iehova ese dina iboudiai e heniva ḡau namodia na lau ese vada na lalodiava. Danu, Iehova ena orea lalonai lau ese na davari ḡaudia namodia iboudiai vada na lalodiava. Bena unu ḡau iboudiai daidiai lau ese Iehova na tenkiu henia. Una dainai, hari launa dekegu ai mimia ḡaudia na moalelaimu.” Bema oi na emu noho dalana dainai lalohisihisi ai o nohomu, namona na Taihu Aci ba tohotohoa, unu amo oi na dekemu ai mimia ḡaudia bo moalelaimu.

NEGA IBOUDIAI BA MANAU

8. Baruku enai be dahaka e vara?

⁸ Nega ta ai, peroveta tauna Jeremaia ena seketere, Baruku, na lalohisihisi ai e nohova. Ia na ḡaukara badana o aukana e huaiava—Ieremia ena ḡaukara iduruna totona, Baruku ese maumau Israel taudia e hamaorodiava idia ediai na dika baine vara badina idia ese Iehova e gwau-edeede heniava. Nega ta ai, Baruku na sibona ena ura e atoa guna, bona Iehova ena ura e laloa boio. Iehova ese, Jeremaia ena amo, Baruku e hereva henia, eto: “Oi ese ḡau hereadia o tahudiamu sibomu emu. Basio tahudia.” (Jer. 45:​3-5) Una na heḡereḡere, Iehova na ini e gwau tomava: “Namona na oi na dekemu ai mimia ḡaudia hari a moalelai.” Baruku ese Iehova ena hereva e kamonai, bona ia na Dirava turana namo hereana ai ela.

9. 1 Korinto 4:​6, 7 amo ita be dahaka ta dibamu? (Laulau danu ba itadia.)

⁹ Nega haida ai, reana tadikaka ta na be laloamu, orea ai ia ese maduna ta baine huaia na maoro. Ia na unu be lalo tomamu badina reana ia na ḡaukara momo mai dibana, mai goadana, bona laḡani momo Iehova e hesiai henia. To, ia ese e ura heniamu hahenamona na reana elda ese ma haida e henidia. Dahaka ese ia baine durua basine lalohisihisi totona? Ia ese apostol Paulo ena sisiba baine laloa diba. (1 Korinto 4:​6, 7 ba duahidia.) Ita ese ta abimu hahenamodia iboudiai bona aonega iboudiai na Iehova ena amo e maimu. Dia ita na spesol o ma haida ta hereadia dainai Iehova ese ini hahenamo e henidamu, lasi, to Iehova ese unu e henidamu badina e lalokau henidamu bona ia na harihari-bada Diravana.—Rom. 12:​3, 6; Efe. 2:​8, 9.

10. Edena dala ai manau karana baita hahedinaraia diba?

¹⁰ Ita ese manau karana na baita hahedinaraia diba bema Iesu ena haheitalai baita laloamu. Hanuaboi ai Iesu ese apostol aedia e huri sivaraina mani aita laloa. Jon eto: “Iesu danu dibana [1] Tamana ese ḡau idoidiai ia imana ai vada e henia, dibana danu [2] Dirava ena amo vada ema bona [3] Dirava dekena ma bainela. . . . bena ena hahediba aedia e huri matama.” (Jon 13:​3-5) Iesu na reana ini bema lalo toma, ‘Apostol ese lau aegu bae huri be namo.’ To Iesu na tanobada ai e nohova neganai, nega ta ai ia na ini se gwau toma: ‘Lau na Dirava natuna dainai, ruma namona ai baina noho, moni momo baina abi, bona mauri namona baina moalelaia.’ (Luk 9:58) Lasi, to Iesu na e manau, bona ia dekena ai mimia ḡaudia e moalelaiva. Ia ena haheitalai ḡoevadaena baita tohotohoa na namo.—Jon 13:15.

11. Dahaka dainai Dennis na e manau bona dekena ai mimia ḡaudia e moalelai?

¹¹ Netherlands ai, Tadikaka Dennis na e urava Iesu ena manau karana baine tohotohoa, to unu baine kara toma na taina auka. Ia eto: “Lau ese na ura heniva ḡaukarana na elda ese tadikaka ma ta e heniamu negadiai, nega haida ai na lalohisihisimu, badina na laloamu una na lau ese nama abia ḡauna. Una lalohadai e varamu negadiai, lau na manau e herevalaimu topik na stadilaimu. Nega momo, JW Library^® app ai manau karana e herevalaia siridia na makadiamu, unu amo gabeai baina davaridia haraḡa bona baina duahidia lou. Danu manau karana e herevalaia tok haida na lau ese na daonloud egu fon ai, bona nega momo unu tok na hakala henidiamu.a Lau ese na dibaia ḡauna ta na, namona na ḡau iboudiai baina kara Iehova baina imodaia totona, a dia lau ladagu baina abia isi. Iehova ese ita ta ta na ḡaukara e henidamu, to ia ese ḡaukara e hanamoamu dainai ta kwalimumu.” Bema oi na o lalohisihisimu badina be o ura heniamu hahenamona na so abiamu, namona na ba hekwarahi manau karana ba hahedinaraia. Unu amo oi na Iehova turana ai baola bona dekemu ai mimia ḡaudia ba moalelai.—Jei. 4:​6, 8.

EMU HELARO BA LALOA DOBU

12. Vaira nega ai edena helaro ese ita be durudamu dekeda ai mimia ḡaudia baita moalelai? (Isaia 65:​21-25)

¹² Iehova ese e gwauhamatalaia vaira negana namona ena helaro baita laloa dobumu neganai, ita na dekeda ai mimia ḡaudia baita moalelaimu. Isaia bukana ai, Iehova ese ita e hamaorodamu, ia na e lalopararamu hari ina negai ita na hekwakwanai momo ta davarimu. To danu ia na gwauhamatamu, ia ese ini hekwakwanai iboudiai na be haorediamu. (Isaia 65:​21-25 ba duahidia.) Ita na ruma namodia ai baita nohomu. Ita ese ḡaukara namodia baita karamu, bona aniani ḡoevadia idauidau baita animu. Ita eiava natuda ihadikadia ḡaudia na ita ese basita lalohekwarahilaimu. (Isa. 32:​17, 18; Esek. 34:25) Momokani, Dirava ena gwauhamata anidia iboudiai na vaira negana ai be ḡuḡurumu.

13. Ededia negai ita ese eda helaro baita laloa bada na namo?

¹³ Dahaka dainai nega iboudiai ita ese eda helaro baita laloa bada na namo? Badina ita na “dina gabedia” bona “nega dikadia” lalodiai ta nohomu dainai, hekwakwanai momo na be varamu. (2 Ti. 3:1) Dina iboudiai baita haheauka totona, Iehova ese ita na e hakaudamu, e hagoadadamu, bona e durudamu. (Sal. 145:14) Danu, eda helaro dainai metau negadiai ita na baita haheaukamu. Reana oi na moni ḡaukara o karaia goadagoadamu badina o uramu aniani ba hoi, dabua ba hoi, bona ruma ta ba hoia bena emu ruma taudia ese bae noholaia. Una anina be, oi be ogoḡami ai bo noho hanaihanaimu, a? Lasi! Iehova na e gwauhamata ia ese e dabumu taudia na hari—bona Paradaiso lalonai—baine durudia. (Sal. 9:18; 72:​12-14) Reana dina iboudiai oi na o hisihisimu, o lalometaumu, eiava gorere badana ta o haheaukalaiamu. To oi be unu bo hisihisi tomamu ela bona hanaihanai, a? Lasi. Dirava ena tanobada matamatana lalonai gorere bona mase na basie varamu. (Rev. 21:​3, 4) Una helaro dainai, ita na hari edai e varamu ḡauna basita lalohisihisilaiamu bona basita badulaiamu. Dahaka dainai ita na dounu baita moalemu, herevana ta ese ita be kara auka henidamu, turada ta be masemu, eiava eda mauri lalonai ḡau dikana ma ta be varamu? Badina ita dibada eda “hisihisi na nega sisina ḡauna” bona nega sisina murinai tanobada matamatana ai hisihisi iboudiai vada be ore vaitanimu.—2 Ko. 4:​17, 18; NWT.

14. Eda helaro be ede baita hagoadaia toma?

¹⁴ Helaro dainai ita na dekeda ai mimia ḡaudia ta moalelaimu. To, oi ese una helaro be ede ba hagoadaia toma? Oi ese hari ba karaia ḡauna ta na ina: Oi ese lalomu ai ba piksaia oi na Paradaiso ai o nohomu. Moni ilalohekwarahilaidia e varamu negadiai, oi ese ba piksaia diba Paradaiso ai moni, abitorehai, bona ogoḡami na vada lasi. Kongrigeisin ai maduna ta so abiamu lalohisihisidia o badudia e varamu negadiai, oi ese ba piksaia diba Paradaiso ai oi na ḡoevadae dainai unu lalohadai dikadia vada so abimu, mauri namona o moalelaimu, bona laḡani tausen momo lalodiai Iehova isiaina o lao henimu. (1 Ti. 6:19) Vaia hari ina negai ḡau momo ta lalohekwarahilaimu daidiai vaira negana ai bae vara ḡau namodia baita lalodia na taidia auka. To, ita ese Iehova ena gwauhamata—vaira negana ai bae vara ḡaudia—baita lalohadailaidia louloumu neganai, una kara na taina ruana baita manadalaiamu.

15. Christa ena hereva amo ita be dahaka ta dibamu?

¹⁵ Helaro ese Christa e durua. Ia adavana Dennis sivaraina na paragraf 11 ai tame herevalaia. Christa eto: “Lau na gorere badana ta na abia bona asina raka dibava dainai wheelchair na ḡaukaralaiamu. Nega momo lau na bedi ai mo na hekuremu. Dina iboudiai launa na hisihisimu. Vanegai egu dokta ese e hamaorogu egu gorere na basine namomu. To lau na maoromaoro lalogu ai na gwauva: ‘[Dokta] ese vaira negana e itaiamu dalana na dia lau ese na itaiamu heḡereḡerena.’ Lau na egu helaro na laloa badamu, unu amo lalomaino na abiamu. Hari ina negai, ina tanobada ai lau na hisihisi momo na haheaukalaimu, to tanobada matamatana ai lau na mauri namo hereana ba moalelaiamu!”

“IA GARINA E GARIMU TAUDIA NA ASIE DABUMU”

16. Dahaka dainai King David eto, “[Dirava] garina e garimu taudia na asie dabumu”?

¹⁶ Iehova ena hesiai taudia na dounu hekwakwanai be davarimu, herevana idia na dekedia ai mimia ḡaudia be moalelaimu. King David ena sivarai mani aita laloa. Ia natuna tatoi na e mase. Ia na haida ese e samania koikoi, ia na turana haida ese taona e tore, bona laḡani haida lalodiai ia na king ta ese e tahuava baine alaia. Unu nega dikadia lalodiai, David na e haheaukava bona ia ese Iehova na ini e herevalaia toma, eto: “Ia garina e garimu taudia na asie dabumu.” (Sal. 34:​9, 10) Dahaka dainai David na unu e gwau toma? Badina ia dibana ena be ena mauri ai e varava hekwakwanaidia na Iehova ese se koudiava, to nega iboudiai ena dabu ḡaudia na Dirava ese e heniava. (Sal. 145:16) Ita danu dibada, hekwakwanai iboudiai lalodiai, Iehova ese ita na be durudamu. Herevana dahaka be varamu, to ita dekeda ai mimia ḡaudia na baita moalelaimu.

17. Dahaka dainai oi dekemu ai mimia ḡaudia ba moalelai na namo?

¹⁷ Iehova na e uramu, oi na dekemu ai mimia ḡaudia ba moalelai. (Sal. 131:​1, 2) Una dainai, oi na ba hekwarahi una mauri dalana ba badinaia ela bona ba manada. Bema oi na nega iboudiai ba tenkiu, nega iboudiai ba manau, bona emu helaro ba laloa dobu, oi na ini bo gwau tomamu: “Badina be vada na manada, egu ai e miamu ḡaudia baina moalelai.”—Flp. 4:11.