Forme bann nouveau pou preché
1. Ki ou ti ressenti premier fois ki ou ti preché?
1 Eski ou rappel premier fois ki ou ti participe dan predication porte en porte? Surement ou ti bien stressé. Si ou ti pé preche avek sa kikenn ki faire ou l’etude-la ou-soit avek enn lot proclamateur, pena doute ki ou ti content pou gagne so l’aide. Asterla ki ou finn gagne l’experience en tant ki enn ministre la bonne nouvelle, ou dan enn position pou aide bann nouveau pou preché.
2. Ki bann nouveau proclamateur bizin aprann?
2 Bann nouveau proclamateur bizin aprann couma commence bann conversation avek bann dimoune, pou servi la Bible, pou faire bann nouvelle visite, ek pou commence ek conduire bann l’etude la Bible. Zot bizin aussi aprann couma preche dan different fason, par exemple, rann temoignage dan la rue ek dan bann quartier commercial. Ou kapav aide zot pou ameliore-zot dan sa bann domaine-la par ou l’exemple ek par ou bann suggestion.
3. Couma eski nou kapav aide lezot par nou l’exemple?
3 Enseigne par ou l’exemple: Jésus ti montré so bann disciple couma preché. (Luc 8:1; 1 Pierre 2:21) Kan ou faire l’arrangement pou travail avek enn nouveau proclamateur, prepare enn presentation simple ki proclamateur-la pou kapav imité. Kitfois ou kapav servi enn modele presentation ki trouve dan bann publication. Apré, propose pou faire premier ou-soit deux premier lakaz pou ki proclamateur-la kapav tann seki ou pou dire. Entre deux lakaz, ou kapav demann proclamateur-la seki li finn observé lor l’efficacité ou presentation. Sa pou aide li trouve l’importance pou preche avek lezot dan ministere ek li pou pli facile pou li accepté n’importe ki suggestion ki ou pou donne li apré ki li faire so presentation.
4. Couma nou kapav aide enn nouveau proclamateur apré ki nou finn ecoute so presentation?
4 Donne bann suggestion: Jésus ti aussi donne bann instruction so bann disciple lor fason ki zot ti bizin preché. (Mat. 10:5-14) Ou kapav aide enn nouveau proclamateur dan mem maniere. Kan inn arrive so tour pou kozé, ecoute bien. Apré, kan zot quitte lakaz-la, pa hesité pou felicite li dan enn fason sincere concernant bann kitsoz precis ki li’nn faire, mem si ou finn remark certain kitsoz ki li bizin amelioré dan so presentation. Avant ki ou donne enn suggestion, kitfois ou pou guetté si li finn amelioré dan sa domaine-la lor prochain la porte ki li faire. Kitfois li ti zis inpé stressé. Pa blié aussi ki tou bann proclamateur pena mem capacité, ek souvent pena zis enn sel fason pou faire enn kitsoz.—1 Cor. 12:4-7.
5. Ki nou kapav dire kan nou prend l’initiative pou donne bann suggestion?
5 Parfois enn nouveau proclamateur pou demann ou bann suggestion. Mais si li pa faire sa, prend l’initiative pou aide li. Couma faire sa avek tact? Certain proclamateur ki ena l’experience finn zis dire: “Eski mo kapav donne toi enn suggestion?” ou-soit, “Dapré toi, couma sa finn passé?” Enn lot kitsoz ki nou kapav dire, c’est: “Kan mo ti fek commence preché, mo ti trouve sa difficile pou . . . , mais sa ti bien aide moi kan . . . ” Parfois li bon ki zot examine livre Comment raisonner ensam. Pou ki nouveau proclamateur-la pa senti-li touffé ar bann suggestion, donne li suggestion zis lor enn l’aspect so presentation.
6. En rapport avek nou ministere, couma ferail fite ferail?
6 Ferail fite ferail: Timothée, ki ti enn predicateur ki ti ena l’experience, ti gagne l’encouragement avek Paul pou contigne faire zeffort pou enseigné ek pou faire progré. (1 Tim. 4:13, 15) Mem si sa faire longtemps ki ou pé preché, fodé jamais ki ou arrete faire zeffort pou ameliore ou capacité. Aprann avek bann proclamateur avek ki ou preché, mem avek bann ki ena moins l’experience dan ministere, ek reste toujours pré pou aide lezot avek bonté, surtout avek bann nouveau, pou ki zot vinn bann ministre qualifié pou annonce la bonne nouvelle.—Prov. 27:17.