Kifer Ena sa Kantite Laenn-la?​—Ki Labib Dir lor La?

Dan bann linformasion, nou tann bann koze ki ranpli ar laenn, ek bann krim akoz laenn. Nou tann osi bann dimounn ki atak lezot zis parski zot sorti dan diferan ras, ek nou tann bann nouvel lor lager.

• “Zordi, akoz lager ki ena ant Izrael ek Gaza, bann dimounn pe poste bann kitsoz ki ranpli ar laenn lor bann rezo sosial ek sa pe ankouraz laviolans.”​—The New York Times, 15 Novam 2023.

• “Zame pa finn ena sa avan. Depi le 7 Oktob finn ena boukou plis violans ek bann koze ki ranpli ar laenn akoz bann prezize.”​—Dennis Francis, prezidan United Nations General Assembly, 3 Novam 2023.

Bann koze ki ranpli ar laenn, laviolans, ek lager pa bann kitsoz ki nouvo. Labib koz lor sertin dimounn dan lepase ki, “zot langaz blesan” ti kouma bann “fles ki touye.” Zot ti bien violan ek zot ti ankouraz bann lager. (Psom 64:3, Psom an Kreol Morisien, PKM; 120:7; 140:1) Me Labib explike ki sa laenn ki nou pe trouve azordi la ena enn sinifikasion inportan.

Laenn​—Enn sign dan nou lepok

Labib montre de rezon kifer ena boukou laenn zordi.

1. 1. Li ti predir ki ti pou ena enn lepok kot “lamour laplipar dimounn pou diminie.” (Matie 24:12) Olie ki zot montre lamour, bann dimounn ti pou montre laenn anver sakenn zot kamarad.​—2 Timote 3:1-5.

2. 2. Ena sa kantite laenn-la zordi akoz linflians Satan Lediab. Labib dir ki “lemond antie li dan pouvwar sa kikenn ki move la.”​—1 Zan 5:19; Revelasion 12:9, 12.

Selman, Labib dir osi ki Bondie pou tir tou bann kitsoz ki kree laenn. Me, Li pou fer plis ki sa, Li pou tir tou bann soufrans ki nou gagne akoz laenn. Labib promet ki:

• Bondie “pou souy tou larm dan zot lizie, ek lamor pou nepli existe, pou nepli ena ni dey, ni plore, ni douler. Bann kitsoz ki ti ena avan finn disparet.”​—Revelasion 21:4.