Prophetie Hoshéa aide nou pou marche avek Bondié

“Zot pou marche derriere Jéhovah.”—HOSHÉA 11:10.

1. Ki zistoire symbolik ena dan livre Hoshéa?

ESKI ou content bann zistoire interessant, kot ena bann bon acteur ki amenn bann joli role? Dan livre Hoshéa ena enn zistoire symbolik.a Sa zistoire-la concerne la vie famille enn prophete Bondié ki appel Hoshéa ek sa ena enn rapport avek mariage symbolik Jéhovah avek so peuple Israël, par moyen l’alliance la Loi mosaïk.

2. Ki nou koné lor Hoshéa?

² Dan Hoshéa chapitre 1, nou trouve contexte sa zistoire-la. Apparemment, Hoshéa ti vive dan territoire dix tribu Israël (ki ti appel aussi Éphraïm, dapré nom so tribu principal). Li ti prophetisé pendant règne sept dernier lé-roi Israël, ek pendant règne bann lé-roi Juda, Ouzziya, Yotham, Ahaz ek Hizqiya. (Hoshéa 1:1) Sa vedir ki Hoshéa ti prophetisé pendant 59 an. Mem si livre ki porte so nom finn completé enn tipé apré 745 a.n.l., li encore concerne nou lepok zordi, parski ena plusieurs million dimoune ki pé suive seki ti predire par sa bann parole-la: “Zot pou marche derriere Jéhovah.”—Hoshéa 11:10.

Enn resumé

3, 4. Faire enn ti resumé seki ena dan Hoshéa chapitre 1–5.

³ Si nou guette en resumé seki ena dan Hoshéa chapitre 1–5, sa pou faire nou encore plus determiné pou marche avek Bondié, pou ena la foi ek pou amenn enn la-vie ki en harmonie avek so volonté. Mem si bann Israélite ti commette l’adultere lor plan spirituel, Bondié ti pou ena misericorde pou zot si zot ti repenti. C’est seki nou trouvé par fason ki Hoshéa ti traite so madame, Gomer. Apré ki Gomer ti gagne enn zenfant avek Hoshéa, kitfois li ti gagne encore deux zenfant illegitime. Pourtant, Hoshéa ti accepté pou reprend li kot li, pareil couma Jéhovah ti disposé pou ena misericorde envers bann Israélite ki ti repenti.—Hoshéa 1:1–3:5.

⁴ Jéhovah ti poursuive nation Israël en justice parski dan zot pays, pa ti ena ni la verité, ni l’amour fidel, ni connaissance Bondié. Li ti pou faire sa nation ki ti pé adore bann zidole-la, ek aussi nation Juda, rann Li compte. Seulement, kan peuple Bondié ti “dan enn situation critik,” lerla zot ti pou rod Jéhovah.—Hoshéa 4:1–5:15.

Deroulement zistoire-la

5, 6. (a) Ki quantité fornication ti ena dan royaume dix tribu Israël? (b) Kifer sa l’avertissement ki Israël ti gagné-la, concerne nou?

⁵ Bondié ti donne sa l’ordre-la Hoshéa: “Allé, al prend enn femme fornication ek bann zenfant fornication, parski vrai-mem, a cause fornication, sa pays-la pé detourne-li ar Jéhovah.” (Hoshéa 1:2) Ki quantité fornication ti ena en Israël? Livre Hoshéa dire nou: “L’esprit fornication finn faire [bann Israélite ki ti dan dix tribu] eloigné, ek a cause fornication, zot finn quitte zot Bondié. . . Zot tifi pé commette fornication, ek zot prop belle-fille pé commette l’adultere. . . . Bann zom, zot cachiette pou al avek bann prostitué, ek c’est avek bann prostitué ki dan temple, ki zot faire sacrifice.”—Hoshéa 4:12-14.

⁶ Partout en Israël ti ena la fornication lor plan physik ek spirituel, toulé-deux. Alors, Jéhovah ti pou faire bann Israélite “rann compte.” (Hoshéa 1:4; 4:9) Sa l’avertissement-la ena enn signification pou nou, parski zordi aussi Jéhovah pou faire bann dimoune ki pé pratik l’immoralité ek ki pé adore bann fausse bondié, rann Li compte. Mais bann ki marche avek Bondié, ki suive so bann principe dan fason ki bizin adore Li, koné ki “okenn fornicateur . . . pena l’heritage dan royaume Christ ek Bondié.”—Éphésiens 5:5; Jacques 1:27.

7. Ki mariage Hoshéa ek Gomer ti representé?

⁷ Kan Hoshéa ti marié ar Gomer, surement Gomer ti enn vierge, ek li ti fidel ar so mari kan li ti “gagne enn garson avek li.” (Hoshéa 1:3) Couma nou trouvé dan sa zistoire symbolik-la, apré ki Bondié ti libere bann Israélite dan l’Égypte en 1513 a.n.l., Li ti faire enn l’alliance avek zot, ek sa ti pareil couma enn contrat pou enn mariage ki pur. Israël ti d’accord avek sa l’alliance-la, ek li ti promette pou reste fidel ar so “mari ek proprietaire,” Jéhovah. (Isaïe 54:5) Oui, mariage pur entre Hoshéa ek Gomer, ti represente mariage symbolik entre bann Israélite avek Bondié. Mais apré, situation ti vrai-mem changé!

8. Couma royaume dix tribu ti commencé, ek ki nou kapav dire lor l’adoration ki ti ena la-bas?

⁸ Femme Hoshéa “ti retombe enceinte, ek li ti gagne enn tifi.” Kitfois, c’est kan li ti commette l’adultere ki li ti gagne sa tifi-la ek enn lot zenfant encore. (Hoshéa 1:6, 8) Parski Gomer represente nation Israël, alors ou kapav demandé: ‘Couma nation Israël ti pratik prostitution?’ En 997 a.n.l., dix tribu Israël ti separé ar deux tribu Juda ek Benjamin, ki ti dan le sud. Dan royaume le Nord kot sa dix tribu-la ti été, le roi ti faire deux veau en or pou le peuple adoré, pou ki zot pa al en Juda pou al adore Jéhovah dan temple Jérusalem. Partout dan pays, bann dimoune ti pé adore fausse bondié Baal, ek zot ti pé commette enn grand l’immoralité sexuel parski sa ti forme partie dan sa l’adoration-la.

9. Dapré Hoshéa 1:6, ki ti arrive nation Israël?

⁹ Kan Gomer ti gagne so deuxieme zenfant, ki kitfois ti enn zenfant illegitime, Bondié ti dire Hoshéa: “Appel li Lo-Rouhama [sa vedir, “Pa finn ena Misericorde pou li”], parski mo nepli pou ena misericorde pou nation Israël, parski vrai-mem mo pou tire zot [dan zot pays].” (Hoshéa 1:6) Jéhovah ti “tire zot” dan zot pays kan bann Assyrien ti amenn bann Israélite en captivité en Assyrie, en 740 a.n.l. Seulement, Bondié ti manifesté misericorde envers deux tribu royaume Juda, ek Li ti sauve zot, mais pa avek l’arc, l’epée, la guerre, cheval ou-soit cavalier. (Hoshéa 1:7) Pendant enn sel la-nuit, en 732 a.n.l., enn sel ange ti touye 185,000 soldat assyrien ki ti pé menace Jérusalem, capital Juda.—2 Rois 19:35.

Jéhovah poursuive Israël en justice

10. Ki l’adultere Gomer ti representé?

¹⁰ Gomer ti quitte Hoshéa ek li ti vinn “enn femme fornication,” parski li ti al vive dan l’adultere avek enn lot zom. Sa ti montré ki royaume Israël ti faire bann l’alliance politik avek bann nation ki ti pé adore bann zidole, ek zot ti commence compte lor sa bann nation-la. Au lieu ki Israël ti loué Jéhovah pou so prosperité materiel, li ti plutot loué bann fausse bondié sa bann nation-la. Sa finn faire li casse contrat mariage ki li ti ena avek Bondié. Li pa etonnant ki Jéhovah ti poursuive en justice sa nation ki’nn commette l’adultere lor plan spirituel-la!—Hoshéa 1:2; 2:2, 12, 13.

11. Ki ti arrive l’alliance la Loi mosaïk kan Jéhovah ti permette nation Israël ek Juda al en captivité?

¹¹ Ki punition nation Israël ti gagné parski li ti quitte so Mari ek Proprietaire? Bondié ti faire li “al dan desert” Babylone, pays ki ti attak l’Assyrie, kot deja bann Israélite dan dix tribu ti été depuis 740 a.n.l. (Hoshéa 2:14) Kan Jéhovah ti permette la fin dix tribu Israël, Li pa ti casse so contrat mariage ki Li ti faire au commencement avek douze tribu Israël. C’est vrai ki Bondié ti laisse bann Babylonien detruire Jérusalem en 607 a.n.l., ek Li ti permette ki peuple Juda al en captivité. Mais kan Li ti faire sa, Li pa ti aboli la Loi mosaïk ek l’alliance ki Li ti faire avek 12 tribu Israël, avek ki Li ti marié dan enn fason symbolik. Li ti aboli sa relation-la seulement kan bann chef religieux ti rejette Jésus Christ ek ti faire touye li en l’an 33 n.l.—Colossiens 2:14.

Jéhovah conseil bann Israélite

12, 13. Ki Hoshéa 2:6-8 dire, ek couma sa bann parole-la applik ar Israël?

¹² Bondié ti conseil bann Israélite pou ‘abandonne zot fornication,’ mais zot ti envie al ar bann ki ti content zot avek passion. (Hoshéa 2:2, 5) Jéhovah ti dire zot: “A cause sa, mo pé entoure to chemin avek bann pikan; ek mo pou monte enn muraille roche kont li, pou ki li pa trouve so chemin. Ek li pou galope derriere bann ki content li avek passion, mais li pa pou reussi joinde zot; oui, li pou rod zot, mais li pa pou trouve zot. Ek li pou bizin dire: ‘Mo envie allé ek retourne ar mo mari, premier-la, parski mo ti pli bien avant ki asterla.’ Mais, li pa finn reconette ki c’est moi ki ti donne li la grain, ek di-vin doux, ek de l’huile, ek ki mo ti faire li gagne beaucoup l’argent, ek l’or, ek zot finn servi sa pou Baal [ou-soit dapré la note: “ki zot finn servi pou faire enn zimage Baal”].”—Hoshéa 2:6-8.

¹³ Mem si nation Israël ti rod l’aide bann nation ki ti “content li avek passion,” personne parmi sa bann nation-la pa ti kapav aide li. Li ti entouré coumadir par enn touffe pikan kot personne pa ti kapav rentré pou aide li. Apré ki bann Assyrien ti entoure Samarie, capital Israël, pendant trois an, zot ti detruire sa la-ville-la en 740 a.n.l., ek sa dix tribu-la jamais pa finn retabli dan so pays. Parmi bann Israélite ki ti en captivité, zis certain ki ti pou realisé ki zot bann ancetre ti vrai-mem dan bien kan zot ti pé servi Jéhovah. Sa lé-reste-la ti pou rejette l’adoration Baal, ek ti pou rod renouvelé zot l’alliance avek Jéhovah.

Ré-guette sa zistoire-la

14. Kifer Hoshéa ti reprend Gomer ek ti revive avek li?

¹⁴ Pou nou comprend pli bien ki lien ti ena entre la vie mariage Hoshéa ek relation ki nation Israël ti ena avek Jéhovah, guette sa bann parole-la: “Jéhovah ti dire moi: ‘Al encore enn fois, content enn femme ki enn lot zom content, ek ki pé vive dan l’adultere.’ ” (Hoshéa 3:1) Hoshéa ti obeir sa l’ordre-la kan li ti ré-acheté Gomer ar sa missié avek ki Gomer ti pé resté-la. Apré sa, Hoshéa ti bien averti so madame: “To pou reste pou moi pou bien longtemps. Fodé pa ki to commette fornication, ek fodé pa ki to vinn pou enn lot zom.” (Hoshéa 3:2, 3) Gomer ti accepté sa discipline-la ek Hoshéa ti revive avek li. Couma sa concerne bann relation ki Bondié ti ena avek peuple Israël ek Juda?

15, 16. (a) Ki condition nation ki Bondié ti discipliné ti bizin respecté pou gagne so misericorde? (b) Couma Hoshéa 2:18 finn realisé?

¹⁵ Kan bann dimoune dan nation Israël ek Juda ti prisonnier dan Babylone, Bondié ti servi so bann prophete pou koz ‘avek zot leker.’ Pou zot kapav gagne misericorde Jéhovah, zot ti bizin repenti ek retourne ar zot Mari ek Proprietaire, pareil couma Gomer ti retourne ar so mari. Lerla, Jéhovah ti pou tire sa nation ki Li finn discipliné-la, dan “desert” Babylone, ek ti pou faire li retourne dan Juda ek dan Jérusalem. (Hoshéa 2:14, 15) Li ti realise sa promesse-la en 537 a.n.l.

¹⁶ Bondié ti aussi realise sa promesse-la: “Oui, sa jour-la, mo pou faire pou zot, enn l’alliance ki concerne bann zanimo sauvage, bann zoiseau ki dan le ciel ek bann zanimo ki rampé lor la terre; mo pou tire l’arc ek l’epée ek la guerre dan pays, ek mo pou faire zot reste en securité.” (Hoshéa 2:18) Bann Juif ki ti retourne dan zot pays ti vive en securité, zot pa ti bizin peur bann zanimo. Sa prophetie-la ti realisé aussi en 1919 n.l., kan enn reste l’Israël spirituel ti delivré dan “Babylone la Grande,” setadir l’empire mondial la fausse religion. Asterla, zot pé reste en securité ek zot pé profite enn paradi spirituel avek zot bann frere ek soeur ki ena l’espoir pou vive lor la terre. Sa bann vrai chrétien-la, pena bann defaut ki faire zot ressemblé bann zanimo sauvage.—Révélation 14:8; Isaïe 11:6-9; Galates 6:16.

Accepté bann leson avek zot leker

17-19. (a) Ki bann qualité Jéhovah nou encouragé pou imité ici? (b) Ki l’effet misericorde ek compassion Jéhovah bizin ena lor nou?

¹⁷ Bondié ena misericorde ek compassion, ek c’est coumsa ki nou bizin été. C’est enn leson ki nou tiré dan bann premier chapitre livre Hoshéa. (Hoshéa 1:6, 7; 2:23) Bondié ti disposé pou manifesté misericorde envers bann Israélite ki ti repenti ek sa c’est en accord avek sa proverbe-la: “Kikenn ki cachiette so bann peché, pa pou reussi, mais si li confesse ek arrete faire sa bann peché-la, li pou gagne misericorde.” (Proverbes 28:13) Ena aussi enn psaume ki encourage bann dimoune ki finn faire peché mais ki’nn repenti; sa psaume-la dire: “Bann sacrifice pou Bondié, c’est enn l’esprit ki dan la peine; enn leker ki’nn cassé ek ki dan la peine, ah Bondié, to pa pou rejette sa.”—Psaume 51:17.

¹⁸ Prophetie Hoshéa mette l’accent lor compassion ek misericorde nou Bondié ki nou adoré. Mem si certain dimoune detourne-zot ar so bann principe juste, zot kapav repenti ek retourne vers Li. Si zot faire sa, Jéhovah pou accueillir zot. Li ti manifesté misericorde envers bann membre nation Israël ki ti repenti, ek avek ki Li ti marié dan enn fason symbolik. Mem si zot ti desobeir Jéhovah ek zot ‘ti faire le Saint d’Israël souffert, Li ti ena misericorde envers zot, ek Li pa ti blié ki Li ti crée zot ar la chair.’ (Psaume 78:38-41) Sa qualité misericorde-la bizin pousse nou pou contigne marche avek Jéhovah, nou Bondié ki ena compassion.

¹⁹ Mem si partout en Israël ti ena bann peché couma crime, vol, ek l’adultere, Jéhovah ti ‘koz avek leker bann Israélite.’ (Hoshéa 2:14; 4:2) Kan nou medite lor misericorde ek compassion Jéhovah, sa bizin touche nou leker ek fortifié nou l’attachement personnel avek Jéhovah. Alors, anou demann nou-mem: ‘Couma eski mo kapav imite misericorde ek compassion Jéhovah pli bien dan mo relation avek lezot? Si enn chrétien ki finn offense moi, vinn demann moi pardon, eski mo pou pré pou pardonne li pareil couma Jéhovah?’—Psaume 86:5.

20. Donne enn l’exemple pou montré ki nou bizin ena confiance dan l’espoir ki Jéhovah donne nou.

²⁰ Bondié donne nou enn vrai l’espoir. Par exemple, Li ti faire sa promesse-la: “Mo pou donne li . . . la plaine Akor couma enn l’entrée ki faire li gagne l’espoir.” (Hoshéa 2:15) L’organisation Jéhovah sa lepok-la, ki ti couma enn femme pou Li, ti ena l’esperance sur pou retourne dan so pays, kot “la plaine Akor” ti été. Sa promesse-la ti realisé en 537 a.n.l., ek sa donne nou enn bon raison pou ena la joie a cause l’esperance sur ki Jéhovah donne nou.

21. Ki l’importance la connaissance ena si nou envie marche avek Bondié?

²¹ Pou nou contigne marche avek Bondié, nou bizin contigne gagne la connaissance lor Li ek mette sa en pratik dan nou la-vie. Connaissance Jéhovah ti bien manké en Israël. (Hoshéa 4:1, 6) Pourtant, certain ti accorde enn grand valeur ar l’enseignement Bondié, zot ti agir en accord avek sa l’enseignement-la, ek Bondié ti bien beni zot. Hoshéa ti parmi sa bann dimoune-la, ek ti ena aussi parmi zot, 7,000 dimoune ki pa ti prosterne devant Baal dan lepok Éliya. (1 Rois 19:18; Romains 11:1-4) Nou reconnaissance pou l’enseignement ki Bondié donne nou, pou aide nou contigne marche avek Li.—Psaume 119:66; Isaïe 30:20, 21.

22. Couma nou bizin considere l’apostasie?

²² Jéhovah attann ki bann zom ki dirige so peuple rejette l’apostasie. Pourtant dan Hoshéa 5:1, nou lire: “Ecoute sa, bann pretre, prend compte, nation Israël, ek zot ki dan lakaz le roi, ecouté, parski sa jugement-la concerne zot; parski zot finn vinn enn piege pou Mitspa ek couma enn filet lor Tabor.” Bann dirigeant apostat ti couma enn piege ek enn filet pou bann Israélite, zot ti tente bannla pou pratik l’idolatrie. Montagne Tabor ek enn place ki ti appel Mitspa ti surement bann centre kot ti pratik sa fausse l’adoration-la.

23. Ki bienfait ou finn tiré ar l’etude Hoshéa chapitre 1–5?

²³ Ziska là, prophetie Hoshéa finn montré nou ki Jéhovah Li enn Bondié ki ena misericorde ek ki donne l’espoir bann dimoune ki mette en pratik so bann instruction ek ki rejette l’apostasie ek aussi ki Li beni zot. Pareil couma bann Israélite dan le passé, anou rod Jéhovah ek faire zeffort pou faire Li toujours plaisir. (Hoshéa 5:15) Si nou faire sa, nou pou recolté seki bon, ek nou pou ena la joie ek la paix ki bann dimoune fidel ena kan zot marche avek Bondié.—Psaume 100:2; Philippiens 4:6, 7.

[Note]

Couma ou pou reponn?

• Ki mariage Hoshéa avek Gomer representé?

• Kifer Jéhovah ti poursuive bann Israélite en justice?

• Ki leson dan Hoshéa chapitre 1–5 finn touche ou?

[Zimage, page 9]

Eski ou koné kisannla madame Hoshéa representé?