Marche avek Bondié, ek recolté seki bon
“C’est di-vent ki zot pé contigne semé, ek c’est enn cyclone ki zot pou recolté.”—HOSHÉA 8:7.
1. Couma nou kapav marche avek Bondié?
SI NOU pé traverse enn l’endroit dangereux, li pli prudent ki nou accompagné par enn guide ki ena l’experience. Oui, li pou pli sage ki nou suive enn bon guide, au lieu ki nou choisir nou prop chemin. Dan certaine fason, sa l’exemple-la decrire bien nou situation zordi. Dan enn sens, Jéhovah inn propose pou guide nou a travers sa mauvais lé-monde kot nou pé vive-la, ki couma enn grand desert. Nou montré ki nou ena la sagesse si nou marche avek Li plutot ki nou essaye dirige nou par nou-mem. Mais couma eski nou kapav marche avek Bondié? C’est kan nou suive direction ki Li donne nou dan so Parole.
2. Ki nou pou examiné dan sa lartik-la?
2 Dan lartik avant, nou finn examine enn zistoire symbolik ki trouve en Hoshéa chapitre 1–5. Couma nou finn trouvé, ena bann leson dan sa zistoire-la ki kapav aide nou pou marche avek Bondié. Asterla, anou examine dé-trois point interessant ki trouve dan Hoshéa chapitre 6–9. Li pou bon si nou commence par enn resumé sa quatre chapitre-la.
Enn resumé
3. Faire enn ti resumé Hoshéa chapitre 6–9.
3 Jéhovah ti envoye Hoshéa prophetise surtout dan royaume dix tribu Israël, dan le nord. Sa nation-la ti appel aussi Éphraïm, parski so tribu principal ti appel coumsa, ek li ti’nn rejette Bondié. Hoshéa chapitre 6–9, montré ki le peuple ti vinn infidel kan zot ti casse l’alliance ki Jéhovah ti’nn faire avek zot, ek zot ti pé pratik bann mauvais kitsoz. (Hoshéa 6:7) Zot ti mette zot confiance dan bann l’alliance ki zot ti faire avek bann lezot nation, au lieu ki zot ti retourne vers Jéhovah. Parski zot ti contigne sème seki mauvais, zot ti pou recolté seki mauvais. Oui, c’est jugement Bondié ki ti pou vinn lor zot. Mais dan prophetie Hoshéa, ti ena aussi enn message encourageant. Le peuple ti gagne l’assurance ki zot kapav retourne vers Jéhovah, ek Li ti pou ena misericorde envers zot, si zot repenti avek sincerité.
4. Ki bann leson pratik nou pou examiné dan prophetie Hoshéa?
4 Dan sa quatre chapitre prophetie Hoshéa-la, nou kapav aprann lezot leson ki pou aide nou marche avek Bondié. Anou examine ensam quatre leson pratik: (1) Nou manifesté enn repentance sincere par bann action, pa zis par bann parole; (2) bann sacrifice tousel pa faire Bondié plaisir; (3) Jéhovah bien chagrin kan so bann serviteur quitte Li; ek (4) pou nou recolté seki bon, nou bizin sème seki bon.
Couma manifesté enn repentance sincere
5. Ki point principal ki trouve dan Hoshéa 6:1-3?
5 Prophetie Hoshéa enseigne nou beaucoup lor repentance ek lor misericorde. Hoshéa 6:1-3 dire: “Vini, anou retourne vers Jéhovah, parski Li finn dechire nou, mais Li pou gueri nou. Li finn contigne batte nou, mais Li pou faire enn pansement lor nou bann plaie. Li pou redonne nou la vie apré deux jour. Lor troisieme jour Li pou releve nou, ek nou pou vive devant Li. Et nou envie koné, nou envie faire tou pou konn Jéhovah. Pareil couma nou sur ki soleil pou levé, nou sur ki Li pou sorti. Et Li pou vinn vers nou couma enn gros la-pluie, couma enn la-pluie printemps ki rafraichi la terre.”
6-8. Ki pa ti bon avek repentance bann Israélite?
6 Kisannla ki ti prononce bann parole ki mentionné dan sa bann verset-la? Certain dire ki c’est bann Israélite infidel ki ti dire sa, ki soit-disant zot ti pé faire semblant repenti, ek ki zot ti pé abuse misericorde Bondié. Lezot dire ki c’est prophete Hoshéa ki ti pé kozé, li ti pé supplie le peuple pou retourne vers Jéhovah. Mais, n’importe kisannla ti pé dire sa, question ki pli important c’est: eski la plupart bann Juif ki ti dan dix tribu Israël ti repenti sincerement ek ti retourne vers Jéhovah? Non. Jéhovah ti dire a travers Hoshéa: “Ki mo pou faire ar toi, Éphraïm? Ki mo pou faire ar toi, Juda, parski zot l’amour fidel pareil couma bann nuage dan gramatin, ek couma la rosée ki disparette bonne heure?” (Hoshéa 6:4) Sa ti montré ki quantité condition spirituel le peuple Bondié ti bien bas! Zot bonté de coeur ou-soit zot l’amour fidel ti’nn preské disparette—pareil couma brouillard disparette bien vite kan soleil levé. Mem si le peuple ti pé faire semblant repenti, Jéhovah pa ti trouve okenn raison pou manifesté so misericorde envers zot. Kifer?
7 Bann Israélite pa ti’nn vrai-mem repenti avek zot leker. Hoshéa 7:14 dire ki Jéhovah pa ti content maniere ki so peuple ti pé agir, nou lire: “Zot pa finn demann moi l’aide avek zot leker, mem si zot ti pé contigne crié lor zot lili.” Hoshéa Verset 16 ajouté: “Zot finn commence retourné, mais pa vers enn kitsoz ki haute”—setadir “vers enn forme l’adoration ki bon.” (Note) Le peuple pa ti disposé pou retourne vers l’adoration Jéhovah, ki ti bien haute. Zot pa ti oulé faire bann changement necessaire pou retabli zot relation avek Li. En realité, zot pa ti vrai-mem envie marche avek Bondié.
8 Ti ena enn lot problem avek repentance bann Israélite. Le peuple ti pé contigne pratik bann peché—avredir, zot ti pé faire tou sorte qualité peché couma fraude, crime, vol, l’idolatrie, ek zot ti pé faire bann l’alliance avek lezot nation. Hoshéa 7:4 compare le peuple ar “enn four,” setadir four enn boulanger, surement parski zot ti enflammé ar tou sorte qualité mauvais desir. Eski le peuple ti merité ki manifesté misericorde envers zot, alors ki zot ti dan enn mauvais condition spirituel coumsa? Non! Hoshéa dire sa bann rebelle-la ki Jéhovah pou “rappel zot faute” ek “pou prend compte zot bann peché.” (Hoshéa 9:9) Li pa ti pou ena misericorde pou zot!
9. Ki bann parole Hoshéa enseigne nou lor repentance ek lor misericorde?
9 Kan nou lire sa bann parole Hoshéa-la, ki nou aprann concernant repentance ek misericorde? Mauvais l’exemple sa bann Israélite infidel-la averti nou ki, pou nou kapav gagne misericorde Jéhovah, nou bizin manifesté enn repentance sincere. Couma? Nou pa kapav embete Jéhovah par bann larme ou-soit par bann parole. Nou montré enn repentance sincere par bann action. Pou ki Jéhovah donne so misericorde enn dimoune ki’nn faire enn peché, dimoune-la bizin arrete faire sa peché-la net, ek vive en accord avek bann So principe bien elevé.
Bann sacrifice tousel pa faire Jéhovah plaisir
10, 11. Couma nou trouvé dan cas bann Israélite, kifer bann sacrifice tousel pa ti faire Jéhovah plaisir?
10 Asterla, anou examine enn deuxieme leson ki kapav aide nou pou marche avek Jéhovah: bann sacrifice tousel pa faire Bondié plaisir. Hoshéa 6:6 dire: “C’est dan l’amour fidel ki mo [Jéhovah] finn prend plaisir, mais pa dan bann sacrifice; ek dan connaissance Bondié plutot ki dan bann sacrifice ki brulé.” Nou remarké ki Jéhovah prend plaisir dan bonté de coeur, ou-soit l’amour fidel—enn qualité ki sorti dan nou leker—ek Li prend plaisir kan nou gagne enn connaissance lor Li. Surement ou kapav demandé: ‘Kifer sa verset-la dire ki Jéhovah pa prend plaisir dan bann “sacrifice”? Eski la Loi pa ti demann bann Juif pou faire bann sacrifice?’
11 Oui, la Loi ti demann bann Israélite pou faire bann sacrifice, mais ti ena enn problem grave avek bann Juif dan lepok Hoshéa. Apparemment, certain ti pé faire bann sacrifice par devoir, zis pou lizié dimoune, pou faire croire ki zot ti content Bondié. Mais en mem temps, zot ti pé pratik bann peché. Sa ti montré ki zot pa ti ena l’amour fidel dan zot leker. Zot ti montré aussi ki zot finn rejette connaissance Bondié parski zot pa ti pé vive en accord avek sa. Si le peuple pa ti ena enn bon leker ek enn bon conduite, ki valeur zot sacrifice ti pou ena? Zot sacrifice ti pé plutot offense Bondié.
12. Ki l’avertissement ena dan Hoshéa 6:6 pou bann dimoune zordi?
12 Parole Hoshéa donne enn l’avertissement bann dimoune zordi ki pretann ki zot chrétien. Zot faire bann sacrifice ar Bondié par bann kitsoz ki zot faire dan zot religion. Mais zot l’adoration pena vrai-mem enn grand l’influence lor zot conduite toulé-jour. Eski sa bann dimoune-la pé vrai-mem faire Bondié plaisir si zot leker pa pousse zot pou gagne enn connaissance exact lor Li, ek pou mette sa connaissance-la en pratik ek arrete faire peché? Fodé pa nou croire ki bann action religieux tousel kapav faire Bondié plaisir. Jéhovah pa approuve okenn dimoune ki essaye gagne so faveur par enn l’adoration superficiel au lieu ki li essaye vive en accord avek so Parole.—2 Timothée 3:5.
13. Ki qualité sacrifice nou offert, mais ki nou bizin rappel en rapport avek sa?
13 En tant ki bann vrai chrétien, nou conscient ki bann sacrifice tousel pa faire Bondié plaisir. Li vrai ki zordi, nou pa donne Jéhovah bann sacrifice zanimo. Seulement, nou “offert Bondié enn sacrifice louange, setadir fruit nou la-levre ki faire declaration publik pou so nom.” (Hébreux 13:15) Li bien important ki nou, bann Témoins de Jéhovah, nou pa vinn couma bann Israélite ki ti faire peché dan lepok Hoshéa, ek pensé ki nou kapav couvert nou bann peché si nou offert Bondié bann sacrifice spirituel. Par exemple, ti ena enn jeune fille ki ti commette l’immoralité sexuel en secret. Plitar, li ti reconette: “Mo ti participe plus dan predication; mo ti pensé ki sa ti pou couvert mo peché.” C’est seki bann Israélite rebelle ti essaye faire. Mais, Jéhovah pou accepté nou bann sacrifice louange seulement si nou ena bann bon mobile dan nou leker ek enn conduite ki en accord avek So volonté.
Jéhovah bien chagrin kan so bann serviteur quitte Li
14. Ki prophetie Hoshéa montré lor bann sentiment Bondié?
14 Enn troisieme leson ki nou aprann dan Hoshéa chapitre 6–9, concerne seki Jéhovah ressenti kan so bann serviteur quitte Li. Bondié ena bann bon sentiment ki en mem temps bien ferme. Li ressenti la joie ek compassion envers bann ki repenti ar zot peché. Mais kan so bann serviteur pa repenti, Li prend bann action bien ferme. Parski Bondié interessé sincerement avek nou, Li content kan nou marche avek Li avek fidelité. Dan Psaume 149:4, nou lire: “Jéhovah prend plaisir dan so peuple.” Mais ki Li ressenti kan so bann serviteur vinn infidel envers Li?
15. Dapré Hoshéa 6:7, couma certain Israélite ti pé agir?
15 Jéhovah dire lor bann Israélite infidel: “Mais zot, pareil couma sa zom ki’nn faire ar la poussiere-la, zot finn casse l’alliance [ki nou finn faire]. C’est coumsa ki zot finn faire traitre ar moi.” (Hoshéa 6:7) En hébreu, mot ‘faire traitre’ vedir aussi “trompé,” “agir avek infidelité.” Malaki 2:10-16 servi mem mot hébreu pou decrire l’infidelité bann Israélite envers zot missié ou-soit zot madame. Concernant sa l’expression ki trouve dan Hoshéa 6:7-la, enn livre dire ki c’est enn terme symbolik ki montré relation personnel ek proche ki Israël ti ena avek Jéhovah, pareil couma relation ki existé dan mariage, mais zot finn trahir sa l’amour ki Jéhovah ti ena pou zot-la.
16, 17. (a) Couma nation Israël ti agir en rapport avek l’alliance ki Bondié ti faire avek zot? (b) Ki nou bizin rappel en rapport avek nou bann action?
16 Jéhovah ti considere nation Israël coumadir so femme symbolik parski Li ti faire enn l’alliance avek zot. Alors, kan so peuple ti casse contrat sa l’alliance-la, coumadir zot ti pé commette l’adultere spirituel. Bondié ti couma enn mari fidel, mais so peuple ti abandonne Li!
17 Ki nou kapav dire lor nou? Bondié prend compte si nou marche avek Li ou non. Li bon ki nou rappel ki “Bondié Li l’amour” ek ki nou bann action ena enn l’effet lor Li. (1 Jean 4:16) Si nou ena enn mauvais conduite, nou kapav faire Jéhovah chagrin ek surement nou pa pou faire Li plaisir. Si touletan nou rappel sa, sa pou empeche nou pou tombe dan tentation.
Couma eski nou kapav recolté seki bon
18, 19. Ki principe nou trouvé dan Hoshéa 8:7, ek couma sa principe-la finn realisé lor bann Israélite?
18 Anou examine enn quatrieme leson dan prophetie Hoshéa—couma nou kapav recolté seki bon. Concernant bann Israélite, Hoshéa ti dire ki zot finn faire enn betise kan zot finn agir avek infidelité, li ti ecrire: “C’est di-vent ki zot pé contigne semé, ek c’est enn cyclone ki zot pou recolté.” (Hoshéa 8:7) Ici, nou trouve enn principe ki fodé pa nou blié: tou seki nou faire zordi ena enn l’effet lor seki pou arrive nou dan l’avenir. Couma sa principe-la finn realisé lor bann Israélite infidel?
19 Kan bann Israélite ti contigne faire peché, zot ti pé sème seki mauvais. Eski zot ti pou kapav contigne faire sa sans ki zot recolté bann mauvais consequence? Zot pa ti pou sapé kan Jéhovah ti pou juge zot. Hoshéa 8:13 dire: “Li [Jéhovah] pou rappel zot faute ek Li pou faire zot rann compte pou zot peché.” Ek dan Hoshéa 9:17 nou lire: “Mo Bondié pou rejette zot, parski zot pa finn ecoute Li, ek zot pou vinn bann dimoune ki bizin sauvé ek cachiette parmi bann nation.” Jéhovah ti pou faire bann Israélite rann compte pou zot peché. Parski zot ti sème seki mauvais, zot ti pou recolté seki mauvais. Jéhovah ti faire so jugement vinn lor zot en 740 a.n.l., kan bann Assyrien ti attak royaume dix tribu Israël ek ti amenn so bann habitant en captivité.
20. Ki nou aprann par l’experience ki bann Israélite inn faire?
20 Seki finn arrive sa bann Israélite-la enseigne enn verité important: nou recolté seki nou semé. Parole Bondié donne nou sa l’avertissement-la: “Pa laisse-zot trompé: Pa badine ar Bondié. Seki enn dimoune semé, sa-mem ki li pou recolté.” (Galates 6:7) Si nou sème seki mauvais, nou pou recolté seki mauvais. Par exemple, bann ki amenn enn la-vie immoral pou recolté bann consequence bien amer. Bann dimoune ki faire peché ek ki pa’lé repenti pou bizin payé.
21. Couma nou kapav recolté seki bon?
21 Mais alors, couma eski nou kapav recolté seki bon? Nou kapav reponn sa question-la par enn l’exemple simple. Si enn planteur envie recolté di-riz, eski li pou plante maïs? Non! Li bizin plante seki li envie recolté. Li pareil pou nou, si nou envie recolté seki bon, nou bizin sème seki bon. Eski ou envie contigne recolté seki bon, setadir enn la-vie ki donne ou satisfaction asterla, avek l’espoir pou gagne la vie eternel dan le monde nouveau ki Bondié inn promette? Si oui, ou bizin contigne sème seki bon. Ou kapav faire sa si ou marche avek Bondié ek si ou vive en accord avek so bann principe juste.
22. Ki leson nou finn aprann dan Hoshéa chapitre 6–9?
22 Nou finn aprann quatre leson dan Hoshéa chapitre 6–9 ki kapav aide nou pou marche avek Bondié: (1) Nou manifesté enn repentance sincere par bann action; (2) bann sacrifice tousel pa faire Bondié plaisir; (3) Jéhovah bien chagrin kan so bann serviteur quitte Li; ek (4) pou nou recolté seki bon, nou bizin sème seki bon. Couma eski cinq dernier chapitre ki ena dan sa livre la Bible-la kapav aide nou pou marche avek Bondié?
Couma ou pou reponn?
• Couma nou kapav manifesté enn repentance sincere?
• Kifer bann sacrifice tousel pa faire Bondié plaisir?
• Ki Bondié ressenti kan so bann serviteur quitte Li?
• Ki nou bizin semé si nou envie recolté seki bon?
[Zimage, page 15]
Kifer Jéhovah ti rejette sacrifice so peuple?
[Zimage, page 16]
Pou recolté seki bon, nou bizin sème seki bon