Parole Jéhovah vivant

VRAI l’adoration inn preské disparette dan royaume dix tribu Israël ki dan le nord. Pendant règne Yarobam II, Israël vinn riche lor plan materiel, mais dé-trois lé-temps apré so la-mort, sa prosperité-la diminué. Zis apré, ena enn lepok agité kot situation politik pa stable. Quatre parmi sa six lé-roi ki dirigé-la mort assassiné. (2 Rois 14:29; 15:8-30; 17:1-6) C’est dan sa lepok troublé-la ki Hoshéa ti prophetisé. Li ti vinn prophete en 804 a.n.l. ek li ti reste prophete pendant 59 an.

Seki arrive Hoshéa dan so la-vie mariage montré nou bien bann sentiment ki Jéhovah ena pou nation Israël ki rebelle. Message Hoshéa expose peché Israël ek bann jugement prophetik kont zot ek kont royaume Juda. Hoshéa inn ecrire tousala dan enn livre ki porte so nom ek li’nn servi bann parole rempli ar l’affection ki prend compte bann sentiment, ek aussi parole ki fort ek ki bien vivant. Parski sa livre-la forme partie dan Parole Bondié ki inspiré, so message li vivant ek li puissant.—Hébreux 4:12.

“ALLÉ, AL PREND ENN FEMME FORNICATION”

(Hoshéa 1:1–3:5)

Jéhovah dire Hoshéa: “Allé, al prend enn femme fornication.” (Hoshéa 1:2) Hoshéa obeir ek li gagne enn garson avek Gomer. Mais apré Gomer gagne deux lezot zenfant,apparemment en dehors so mariage. Zot appel Lo-Rouhama ek Lo-Ammi ek signification zot nom montré ki Jéhovah refuse faire misericorde pou Israël ek Li rejette So peuple ki infidel.

Ki Jéhovah vrai-mem ressenti envers so peuple ki rebelle? Li dire Hoshéa: “Al encore enn fois, content enn femme ki enn lot zom content, ek ki pé vive dan l’adultere, pareil couma l’amour ki Jéhovah ena pou bann garson Israël alors ki zot pé tourne-zot vers lezot bondié.”—Hoshéa 3:1.

Reponse pou bann question biblik:

1:1—Kifer Hoshéa mentionne toulé-quatre lé-roi ki ti regné lor Juda pendant ki li ti prophete alors ki li mentionne enn sel lé-roi en Israël? C’est parski en general ti reconette zis bann lé-roi ki ti descendant David couma bann ki ti ena droit pou dirige peuple ki Bondié ti’nn choisir. Bann lé-roi royaume le nord pa ti bann descendant David, alors ki bann lé-roi Juda ti dan descendance David.

1:2-9—Eski Hoshéa ti marié vrai-mem avek enn femme fornication? Oui, Hoshéa ti vrai-mem marié avek enn femme ki plitar ti vinn enn femme adultere. Prophete Hoshéa pa dire nanyin ki montré ki seki li ti raconté concernant so la-vie mariage ti enn rêve ou-soit enn vision.

1:7—Kan eski Jéhovah ti montré misericorde envers lakaz Juda ek ti sap li? Sa ti arrivé en 732 a.n.l., dan lepok le roi Hizqiya. Bann Assyrien ti pé menace Jérusalem ek Jéhovah ti envoye enn ange pou touye 185,000 soldat ennemi dan enn sel la-nuit. (2 Rois 19:34, 35) C’est coumsa ki Jéhovah ti sap Juda, pa “par l’arc, ni par l’epée, ni par la guerre, ni par bann cheval, ni par bann cavalier,” mais par enn ange.

1:10, 11—Couma bann descendant Israël ti “rassemblé dan l’unité” avek bann descendant Juda, alors ki royaume le nord Israël ti tombé en 740 a.n.l.? Beaucoup Juif ki ti reste dan royaume le nord ti’nn vinn Juda avant ki bann habitant sa pays-la al en exil dan Babylone en 607 a.n.l. (2 Chroniques 11:13-17; 30:6-12, 18-20, 25) Kan bann Juif ki ti en exil, ti retourne dan zot pays en 537 a.n.l., parmi zot ti ena aussi descendant bann Juif ki ti sorti dan royaume le nord.—Ezra 2:70.

2:21-23—Jéhovah ti dire: “Oui, pareil couma la grain, mo pou sème [Yizréel] pou moi lor la terre, ek mo pou montré misericorde envers li.” Ki sa bann parole Jéhovah-la ti annoncé? Premier garson Hoshéa ki Gomer ti gagné, ti appel Yizréel. (Hoshéa 1:2-4) Sa nom-la vedir “Bondié pou sème la grain,” ek li annoncé ki Jéhovah pou rassemblé enn reste Juif ki fidel en 537 a.n.l ek Li pou sème zot pareil couma la grain dan Juda. Sa pays ki ti’nn reste desolé pendant 70 an-la pou bizin asterla produire la grain, di-vin doux, ek de l’huile. Dan enn langage poetik, sa prophetie-la annoncé ki sa bann bon kitsoz-la pou demann la terre pou donne so bann element pou nourri bann plante, ek la terre pou demann le ciel faire la pluie tombé. Le ciel li, li pou demann Bondié pou donne bann nuage la pluie. Tousala pou ki kapav donne sa reste ki pé retourné-la tou seki zot bizin en abondance. L’apotre Paul ek l’apotre Pierre ti applik Hoshéa 2:23 ar rassemblement enn reste Israël spirituel.—Romains 9:25, 26; 1 Pierre 2:10.

Bann leson pou nou:

1:2-9; 3:1, 2. Mazinn sacrifice personnel ki Hoshéa ti faire kan li ti accepté pou reste avek so madame pou li obeir volonté Bondié! Kan nou bizin faire volonté Bondié, ziska ki point eski nou disposé pou mette enn coté nou bann preference personnel?

1:6-9. Jéhovah pa content l’adultere spirituel, pareil couma Li pa content l’adultere physik.

1:7, 10, 11; 2:14-23. Seki Jéhovah ti annoncé concernant Israël ek Juda ti realisé. Parole Jéhovah touletan realisé.

2:16, 19, 21-23; 3:1-4. Jéhovah disposé pou pardonne bann ki montré enn repentance sincere. (Nehémia 9:17) Pareil couma Jéhovah, nou bizin ena compassion ek misericorde dan nou relation avek lezot.

“JÉHOVAH PÉ POURSUIVE BANN HABITANT EN JUSTICE”

(Hoshéa 4:1–13:16)

“Jéhovah pé poursuive bann habitant sa pays-la en justice.” Kifer? Parski “pena ni la verité, ni l’amour fidel, ni connaissance Bondié dan sa pays-la.” (Hoshéa 4:1) Peuple Israël ki rebelle, inn commence trompe lezot pou kokin zot, zot inn touyé ek zot inn commette fornication lor plan physik ek spirituel. Au lieu ki zot tourne vers Bondié pou gagne l’aide, “zot inn appel l’Égypte; zot inn al l’Assyrie.”—Hoshéa 7:11.

Jéhovah annonce so jugement: “Israël pou bizin detruire.” (Hoshéa 8:8) Royaume Juda coupable. Hoshéa 12:2 dire: “Jéhovah pé poursuive Juda en justice, oui pou faire Jacob rann compte pou seki li’nn faire; Jéhovah pou rann li dapré so bann fason agir.” Mais pena doute ki pou ena enn retablissement parski Bondié promette: “Mo pou delivré zot dan la main shéol; mo pou tire zot dan la mort.”—Hoshéa 13:14.

Reponse pou bann question biblik:

6:1-3—Kisannla ki ti pé dire: “Vini, anou retourne vers Jéhovah”? Kitfois c’est bann Israélite ki ti infidel ki ti pé encourage zot camarade pou retourne vers Jéhovah. Dan sa cas-la, zot ti pé zis faire semblant. Zot l’amour fidel ti zis pou enn ti moment pareil couma “bann nuage dan gramatin ek couma la rosée ki disparette boner.” (Hoshéa 6:4) Lot coté, kitfois c’est Hoshéa ki ti pé kozé ek li ti pé suppliye le peuple pou retourne vers Jéhovah. N’importe kisannla ki ti pé dire sa bann parole-la, bann habitant rebelle royaume dix tribu Israël ti bizin montré ki zot ti ena vrai repentance ek zot ti bizin retourne vrai-mem vers Jéhovah.

7:4—Dan ki fason bann Israélite ki ti commette l’adultere ti couma “enn four ki’nn allumé”? Sa comparaison-la montré ki quantité bann desir ki bann Israélite ti ena dan zot leker, ti mauvais.

Bann leson pou nou:

4:1, 6. Si nou envie gagne faveur Jéhovah touletan, nou bizin contigne aprann konn Li ek mette en pratik seki nou aprann.

4:9-13. Jéhovah pou demann compte tou bann ki pratik l’immoralité sexuel ek ki participe dan l’adoration ki pa pur.—Hoshéa 1:4.

5:1. Bann ki prend la tête parmi peuple Bondié bizin rejette l’apostasie net. Sinon, zot kapav vinn ‘enn piege ek enn filet’ pou certain kan zot amenn bannla pou prend part dan fausse l’adoration.

6:1-4; 7:14, 16. Si enn dimoune repenti zis en parole, sa li hypocrite ek li pa servi nanyin. Pou enn dimoune ki’nn faire le mal gagne pardon Jéhovah, li bizin montré ki li’nn repenti sincerement, ek li montré sa kan li retourne vers enn kitsoz ki “haute,” setadir vers enn forme l’adoration ki pli haute. So bann action bizin en accord avek bann principe Bondié ki enn niveau bien haute.—Hoshéa 7:16, note.

6:6. Kan enn dimoune pratik peché, sa montré ki li mank l’amour pou Jéhovah, ek n’importe ki quantité sacrifice spirituel ki li faire, pa kapav remplace sa l’amour-la.

8:7, 13; 10:13. Principe ki dire ki “seki enn dimoune semé, sa-mem ki li pou recolté” ti vrai-mem arrivé dan cas bann Israélite ki ti adore zidole.—Galates 6:7.

8:8; 9:17; 13:16. Bann prophetie concernant royaume le nord ti realisé kan bann Assyrien ti prend so capital, Samarie. (2 Rois 17:3-6) Nou kapav ena l’assurance ki Bondié pou faire seki Li’nn dire.—Nombres 23:19.

8:14. Jéhovah ti envoye ‘difé dan bann la-ville Juda’ en 607 a.n.l. par la main bann Babylonien, pou amenn destruction lor Jérusalem ek pays Juda pareil couma Li ti annoncé. (2 Chroniques 36:19) Parole Bondié touletan realisé.—Josué 23:14.

9:10. Mem si bann Israélite ti voué ar Jéhovah, zot “ti al vers Baal Péor, ek zot ti voué-zot ar sa kitsoz ki faire honté-la.” Li bon ki zot mauvais l’exemple servi nou couma enn l’avertissement ek ki nou faire attention pou pa blié ki nou’nn voué nou la-vie ar Jéhovah.—1 Corinthiens 10:11.

10:1, 2, 12. Nou bizin adore Bondié avek enn leker ki pa hypocrite. Kan ‘nou sème dan la justice, nou recolté en accord avek l’amour fidel Bondié.’

10:5. Beth-Avèn (ki vedir “Lakaz le mal”) li enn nom ki’nn donne Béthel (ki vedir “Lakaz Bondié”) pou abaisse li. Kan ti amenn en exil sa zidole dan forme enn veau ki ti ena dan Beth-Avèn-la, bann habitant Samarie ti ploré a cause zot ti perdi sa zidole ki zot ti adoré-la. Nou pou couma enn dimoune ki pa raisonné si nou mette nou confiance dan enn zidole ki pena la vie ek ki pa kapav protege li-mem, pa vrai?—Psaume 135:15-18; Jérémie 10:3-5.

11:1-4. Jéhovah touletan agir avek amour envers so peuple. Nou soumission ar Bondié jamais pa pese lourd lor nou.

11:8-11; 13:14. Parole Jéhovah concernant so peuple ki ti pou retabli vrai l’adoration ‘pa ti retourne vers Li sans resultat.’ (Isaïe 55:11) En 537 a.n.l., l’exil dan Babylone ti fini ek enn reste Israélite ti retourne Jérusalem. (Ezra 2:1; 3:1-3) Nou sur ki tou seki Jéhovah inn dire par moyen so bann prophete pou arrivé.

12:6. Nou bizin bien determiné pou montré l’amour fidel, pou ena la justice, ek pou garde toujours l’espoir en Jéhovah.

13:6. Bann Israélite “ti vinn satisfait ar seki zot ti’nn gagné ek zot leker ti commence prend grandeur. A cause sa zot ti blié [Jéhovah].” Nou bizin faire attention kont n’importe ki tendance ki nou ena pou faire vantard.

“CHEMIN JÉHOVAH, LI DROITE”

(Hoshéa 14:1-9)

Hoshéa suppliyé le peuple: “Ah Israël, retourne vers Jéhovah to Bondié, parski peché inn faire toi tombé.” Li encourage zot pou dire Jéhovah: “Pardonne nou peché; ek accepté seki bon, ek en retour nou pou offert bann jeune taureau nou la-levre.”—Hoshéa 14:1, 2.

Enn dimoune ki faire le mal mais ki repenti bizin vinn vers Jéhovah, accepté so chemin, ek offert Li bann sacrifice louange. Kifer? Parski “chemin Jéhovah, li droite; c’est bann dimoune juste ki pou marche ladan.” (Hoshéa 14:9) Nou bien content ki ena encore beaucoup ki “pou vinn avek la crainte vers Jéhovah ek vers so bonté, dan period final bann jour”!—Hoshéa 3:5.

[Zimage, page 15]

La vie famille Hoshéa ti montré bien bann fason ki Jéhovah ti agir avek Israël

[Zimage, page 17]

Kan Samarie ti detruire en 740 a.n.l., royaume dix tribu Israël ti arrete existé