Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w05 1/12 p. 17-21
  • “Chemin Jéhovah, li droite”

Pena video ki disponib pou seki ou finn swazir.

Sori, enn erer inn anpes sa video-la zwe.

  • “Chemin Jéhovah, li droite”
  • La Tour de Garde pé annonce Royaume Jéhovah—2005
  • Soutit
  • Lor Mem Size
  • Jéhovah attann ki nou pa hypocrite kan nou adore Li
  • Bondié manifesté l’amour fidel envers so peuple
  • Garde touletan l’espoir en Jéhovah
  • Chemin Jéhovah, li toujours droite
  • Bann dimoune ki’nn faire peché kapav retourne vers Jéhovah
  • Contigne marche dan chemin droite ki Jéhovah inn tracé
  • Point biblik interessant dan livre Hoshéa
    La Tour de Garde pé annonce Royaume Jéhovah—2007
  • Prophetie Hoshéa aide nou pou marche avek Bondié
    La Tour de Garde pé annonce Royaume Jéhovah—2005
  • Marche avek Bondié, ek recolté seki bon
    La Tour de Garde pé annonce Royaume Jéhovah—2005
  • Swiv Lexanp Bann Profet​—Hoshéa
    Ministere du Royaume—2013
Rod Plis
La Tour de Garde pé annonce Royaume Jéhovah—2005
w05 1/12 p. 17-21

“Chemin Jéhovah, li droite”

“Chemin Jéhovah, li droite, ek c’est bann dimoune juste ki pou marche ladan.”—HOSHÉA 14:9.

1, 2. Ki qualité depart Jéhovah ti donne bann Israélite, mais ki ti arrive zot?

DAN lepok Moïse, Jéhovah ti donne bann Israélite enn bon depart. Mais au commencement huitieme siecle avant nou lepok, zot situation ti’nn vinn tellement mauvais ki Jéhovah ti trouve zot coupable bann peché grave. C’est seki nou trouvé dan Hoshéa chapitre 10–14.

2 Leker bann Israélite ti’nn vinn hypocrite. Bann habitant dan royaume dix tribu ti’nn “plante seki mauvais” ek zot finn recolté l’injustice. (Hoshéa 10:1, 13) Jéhovah ti dire: “Kan Israël ti encore jeune, mo ti content li, ek mo’nn faire mo garson sorti dan l’Égypte.” (Hoshéa 11:1) Mem si Bondié ti’nn delivré bann Israélite dan l’esclavage en Égypte, zot pa finn remercié Li couma bizin, parski zot finn koz menti ek zot finn trahir Li. (Hoshéa 11:12) A cause sa, Jéhovah ti donne zot sa conseil-la: “To bizin retourne vers to Bondié, ek garde l’amour fidel ek la justice.”—Hoshéa 12:6.

3. Ki ti pou arrive nation rebelle Samarie, mais couma bann Israélite ti pou kapav gagne misericorde Jéhovah?

3 Sa ti pou fini bien mal pou nation rebelle Samarie, ek pou so lé-roi. (Hoshéa 13:11, 16) Mais dernier chapitre Hoshéa commence avek sa supplication-la: “Ah Israël, retourne vers Jéhovah to Bondié.” Si bann Israélite ti repenti ek ti demann Jéhovah pardon, Bondié ti pou ena misericorde envers zot. Bien-sur, zot ti pou bizin reconette ki “chemin Jéhovah, li droite,” ek zot ti pou bizin marche ladan.—Hoshéa 14:1-6, 9.

4. Ki bann principe nou pou examiné dan prophetie Hoshéa?

4 Dan sa partie prophetie Hoshéa-la, ena beaucoup principe ki kapav aide nou pou marche avek Bondié. Anou examine dé-trois: (1) Jéhovah attann ki nou pa hypocrite kan nou adore Li, (2) Bondié manifesté l’amour fidel envers so peuple, (3) nou bizin garde touletan l’espoir en Jéhovah, (4) chemin Jéhovah, li toujours droite, ek (5) bann dimoune ki’nn faire peché, kapav retourne vers Jéhovah.

Jéhovah attann ki nou pa hypocrite kan nou adore Li

5. Ki qualité l’adoration Bondié attann ki nou donne Li?

5 Jéhovah attann ki nou servi Li dan enn fason pur, ki pa hypocrite. Mais, Israël ti vinn couma enn ‘pié raisin sauvage,’ ki ti pé produire bann mauvais fruit. Zot ti’nn ‘augmente bann l’autel’ ki zot ti pé servi dan fausse l’adoration. Sa bann apostat-la ti mem faire monte bann colonne, kitfois bann obelisque, setadir bann longue colonne pointe ki zot ti servi dan fausse l’adoration. Jéhovah ti pou detruire sa bann l’autel ek sa bann colonne-la.—Hoshéa 10:1, 2.

6. Pou nou kapav marche avek Bondié, ki l’attitude nou bizin rejeté?

6 Fodé pa ki parmi bann serviteur Jéhovah ena ki hypocrite. Pourtant, ki finn arrive bann Israélite? Eh bien, ‘zot leker ti vinn hypocrite’! Mem si zot ti enn peuple ki ti voué ar Jéhovah ek zot ti faire enn l’alliance avek Li, Li ti trouve zot coupable parski zot ti hypocrite. Ki sa montré nou? Si nou finn voué nou la-vie pou servi Jéhovah, fodé pa ki nou hypocrite. Proverbes 3:32 donne nou sa l’avertissement-la: “Jéhovah detesté enn dimoune hypocrite, mais Li intime avek bann dimoune ki droite.” Pou nou kapav marche avek Bondié, nou bizin manifesté enn l’amour “ki motivé par enn leker pur ek enn bon conscience, ek enn la-foi ki pa hypocrite.”—1 Timothée 1:5.

Bondié manifesté l’amour fidel envers so peuple

7, 8. (a) Ki condition nou bizin rempli pou ki Bondié traite nou avek l’amour fidel? (b) Ki nou bizin faire si nou finn commette enn peché grave?

7 Si nou adore Jéhovah dan enn fason ki pa hypocrite ek ki droite, Li pou traite nou avek bonté de coeur, setadir l’amour fidel. Bann Israélite rebelle ti gagne sa conseil-la: “Kan zot semé, sème dan la justice, recolté en accord avek l’amour fidel. Travail enn la-terre ki kapav cultivé, pendant ki ena le temps pou rod Jéhovah, ziska ki Li vini ek Li enseigne zot la justice.”—Hoshéa 10:12.

8 Si seulement bann Israélite ti repenti ek ti rod Jéhovah! Lerla, Li ti pou “enseigne zot la justice” avek plaisir. Si nou finn faire enn peché grave, anou rod Jéhovah, prié Li pou pardonne nou ek rod l’aide bann ancien dan congregation. (Jacques 5:13-16) Anou rod aussi direction l’esprit saint Bondié, parski “celui ki pé sème pou faire plaisir so lekor, pou recolté seki faire li di-tort, mais celui ki pé sème pou l’esprit, pou recolté la vie eternel.” (Galates 6:8) Si nou “sème pou l’esprit,” nou pou contigne gagne l’amour fidel Bondié.

9, 10. Couma Hoshéa 11:1-4 ti applik ar bann Israélite?

9 Nou kapav sur ki Jéhovah toujours traite so peuple avek amour. Nou trouve sa en Hoshéa 11:1-4, ki dire: “Kan Israël ti encore jeune, mo ti content li, ek mo’nn faire mo garson sorti dan l’Égypte. . . . Zot finn faire sacrifice ar bann zimage Baal, ek zot finn faire la fumée monté pou bann zidole. Mais moi, mo ti tale mo lé-bras pou montré Éphraïm [bann Israélite] couma marché, ek zot pa ti reconette ki mo ti gueri zot. Mo finn contigne riss zot avek bann la-corde, oui avek bann cordon l’amour, ziska ki mo’nn vinn pou zot pareil couma bann ki souleve enn joug lor zot la-machoire, ek avek douceur, mo finn amenn mangé pou sakenn.”

10 Sa verset-la compare Israël ar enn ti zenfant. Avek beaucoup l’amour, Jéhovah finn montré bann Israélite marché, Li ti prend zot dan so lé-bras. Li ti riss zot avek bann “cordon l’amour.” C’est vrai-mem enn joli l’exemple! Maziné ki ou enn parent ek ou pé ouvert ou lé-bras pou aide ou zenfant faire so premier pas. Dan certain pays, bann parent servi enn la-corde, ki zot zenfant attrapé pou li pa tombé. Eh bien, ena aussi beaucoup tendresse dan l’amour ki Jéhovah manifesté envers ou. Li content pou guide ou avek bann “cordon l’amour.”

11. Dan ki fason eski Bondié finn vinn ‘pareil couma enn kikenn ki souleve enn joug’?

11 Par fason ki Jéhovah ti traite avek bann Israélite, Li ti montré ki Li ‘ti vinn pou zot pareil couma bann ki souleve enn joug lor zot la-machoire, ek avek douceur, Li ti amenn mangé pou sakenn.’ Bondié finn agir pareil couma enn kikenn ki souleve enn joug ki lor enn zanimo, ou-soit ki pousse li par derriere pou ki zanimo-la kapav mange bien. C’est zis kan bann Israélite ti’nn arrete soumette ar joug ki Jéhovah ti mette lor zot, ki lerla zot finn mette-zot enba joug zot bann l’ennemi, ki ti domine zot. (Deutéronome 28:45, 48; Jérémie 28:14) Fodé jamais ki nou tombe dan la main nou pli grand l’ennemi, Satan, ek lerla souffert enba so domination. Au contraire, anou contigne montré nou fidelité ek marche avek nou Bondié ki content nou.

Garde touletan l’espoir en Jéhovah

12. Dapré Hoshéa 12:6, ki nou bizin faire pou nou contigne marche avek Bondié?

12 Pou nou contigne marche avek Bondié, nou bizin garde touletan nou l’espoir en Li. Bann Israélite ti gagne sa conseil-la: “Toi, to bizin retourne vers to Bondié, ek garde l’amour fidel ek la justice. To bizin contigne garde l’espoir en to Bondié.” (Hoshéa 12:6) Bann Israélite ti kapav prouvé ki zot ti’nn repenti ek ki zot ti’nn retourne vers Jéhovah si zot ti manifesté l’amour fidel, la justice ek si zot ti ‘garde touletan zot l’espoir en Bondié.’ N’importe ki quantité lé-temps nou finn marche avek Bondié, nou bizin determiné pou manifesté l’amour fidel, la justice ek garde touletan l’espoir en Bondié.—Psaume 27:14.

13, 14. Couma Paul ti applik Hoshéa 13:14, ek ki raison sa donne nou pou ena l’espoir en Jéhovah?

13 Prophetie Hoshéa lor bann Israélite donne nou enn bon raison pou nou garde nou l’espoir en Bondié. Jéhovah ti dire: “Mo pou delivré zot dan la main shéol; mo pou tire zot dan la mort. La Mort, kot to pouvoir pou faire di-mal? Shéol, kot to pouvoir pou detruire?” (Hoshéa 13:14) Sa pa vedir ki Jéhovah ti pou empeche bann Israélite mort dan sa lepok-la, mais jour pé vini kot Li pou faire la mort disparette pou touletan ek annule so victoire.

14 Kan Paul ti koz ar bann chrétien oint dan so lepok, li ti cite prophetie Hoshéa, ek li ti ecrire: “Kan seki pa kapav pourri pou remplace seki kapav pourri ek seki immortel pou remplace seki mortel, lerla sa parole-la pou realisé: ‘La mort finn disparette pou touletan.’ ‘La Mort, kot to victoire? La Mort, kot to pouvoir pou faire di-mal?’ Seki produire la mort, c’est peché, mais seki donne peché pouvoir, c’est la Loi. Mais grand merci Bondié, parski Li donne nou la victoire par nou Seigneur Jésus Christ!” (1 Corinthiens 15:54-57) Kan Jéhovah ti ressuscite Jésus, Li ti donne enn garantie ki bann dimoune ki dan so memoire pou ressuscité, ek sa bien encourage nou. (Jean 5:28, 29) Sa c’est enn bon raison pou garde nou l’espoir en Jéhovah! Mais ena enn lot kitsoz, apart l’esperance la resurrection, ki pousse nou pou marche avek Bondié.

Chemin Jéhovah, li toujours droite

15, 16. Ki ti annoncé lor Samarie, ek couma sa prophetie-la finn realisé?

15 Nou sur ki “chemin Jéhovah, li droite” ek sa aide nou pou contigne marche avek Bondié. Bann habitant Samarie pa ti marche dan chemin droite ki Jéhovah ti’nn tracé. A cause sa, zot ti pou bizin paye consequence zot peché, ek parski zot pa finn ena la foi en Jéhovah. Guette seki ti annoncé lor zot: “Mo pou juge Samarie coupable parski vrai-mem li pé rebelle kont so Bondié. Zot pou mort par l’epée. Zot prop zenfant pou massacré, ek pou coupe ventre zot bann femme enceinte.” (Hoshéa 13:16) L’Histoire montré ki bann Assyrien, ki ti vinn attak Samarie, ti kapav vrai-mem faire bann kitsoz horrible coumsa.

16 Samarie ti capital royaume dix tribu Israël. Mais kitfois dan sa verset-la, nom Samarie applik ar zot pays en entier. (1 Rois 21:1) Le roi assyrien Salmanasar V ti entoure la ville Samarie en 742 a.n.l. Kan finalement la ville ti detruire en 740 a.n.l., bann Assyrien ti amenn beaucoup parmi bann grand dimoune ki ti reste la-bas, en exil dan Mésopotamie ek dan Médie. Nou pa vrai-mem koné si c’est Salmanasar V ki ti detruire la ville Samarie, ou-soit Sargon II, le roi ki’nn vinn zis apré li. (2 Rois 17:1-6, 22, 23; 18:9- 12) Mais seki nou koné, c’est ki dapré bann rapport ki Sargon ti’nn faire, 27,290 Israélite ti’nn deporté dan region l’Euphrate ek Médie.

17. Au lieu ki nou meprise bann principe Bondié, ki nou bizin faire?

17 Parski bann habitant Samarie pa finn suive bann principe juste Jéhovah, zot finn paye sa bien cher. Nou aussi, en tant ki chrétien, nou finn voué nou la-vie pou servi Jéhovah. Si nou commence pratik enn peché ek nou meprise bann principe Jéhovah, nou pou konn bann malheur. Fodé ki jamais nou suive enn mauvais chemin coumsa! Au contraire, sakenn parmi nou bizin applik sa conseil l’apotre Pierre-la: “Fodé ki personne parmi zot pa souffert parski li enn assassin, ou enn voleur, ou enn dimoune ki faire le mal, ou-soit kikenn ki veille zaffaire lezot. Mais si li souffert parski li enn chrétien, pa bizin li honté, mais li bizin contigne donne Bondié la gloire en tant ki chrétien.”—1 Pierre 4:15, 16.

18. Couma eski nou kapav “contigne donne Bondié la gloire”?

18 Nou “contigne donne Bondié la gloire,” si nou marche dan so chemin ki droite au lieu ki nou faire bann kitsoz dan nou fason. Caïn ti commette enn crime parski li ti faire seki li ti envie ek li pa ti ecouté kan Jéhovah ti averti li ki peché ti pré pou domine li. (Genèse 4:1-8) Balaam ti accepté l’argent ki le roi Moab ti donne li pou maudi Israël, mais li pa ti reussi maudi zot. (Nombres 24:10) Ek Bondié ti touye Qorah, enn Lévite, ek lezot dimoune encore, parski zot ti rebelle kont l’autorité Moïse ek Aaron. (Nombres 16:1-3, 31-33) Surement nou pa envie suive mem “chemin ki Caïn,” sa criminel-la, ni tombe dan mem “erreur ki Balaam,” ni trouve la mort dan “bann parole rebelle Qorah.” (Jude 11) Seulement, si arrivé ki enn kikenn commette enn faute, prophetie Hoshéa donne li courage.

Bann dimoune ki’nn faire peché kapav retourne vers Jéhovah

19, 20. Ki sacrifice bann Israélite ki ti’nn repenti, ti kapav offert Bondié?

19 Mem bann dimoune ki finn tombé spirituellement parski zot finn faire enn peché grave, kapav retourne vers Jéhovah. Dan Hoshéa 14:1, 2, nou trouve sa supplication-la: “Ah Israël, retourne vers Jéhovah to Bondié, parski peché inn faire toi tombé. Prend bann parole avek zot, ek retourne vers Jéhovah. Dire Li zot tou: ‘Pardonne nou peché; ek accepté seki bon, ek en retour nou pou offert bann jeune taureau nou la-levre.’ ”

20 Bann Israélite ki ti repenti, ti kapav offert Bondié ‘bann jeune taureau zot la-levre.’ Sa ti represente bann sacrifice sincere ki zot ti offert pou loué Jéhovah. Paul ti pé koz lor sa prophetie-la kan li ti encourage bann chrétien pou ‘offert Bondié enn sacrifice louange, setadir fruit zot la-levre ki faire declaration publik pou so nom.’ (Hébreux 13:15) Zordi, nou ena vrai-mem enn grand privilege pou marche avek Bondié ek offert Li sa qualité sacrifice-la!

21, 22. Ki retablissement bann Israélite ki ti’nn repenti ti pou koné?

21 Bann Israélite ki ti abandonne zot mauvais conduite, ek ki ti retourne vers Bondié, ti offert Li ‘bann jeune taureau zot la-levre.’ Lerla, zot ti retabli lor plan spirituel, pareil couma Bondié ti promette. Hoshéa 14:4-7 dire: “[Moi Jéhovah] mo pou gueri zot infidelité. Mo pou content zot, pa par obligation, mais parski mo envie, parski mo nepli en colere ar li. Mo pou vinn couma la rosée pou Israël. Li pou fleuri pareil couma enn lis, li pou enfonce so racine pareil couma Liban. Li pou bourgeonné, ek so dignité pou vinn pareil couma pié zolive, ek so parfum pou couma parfum Liban. Zot pou ré-vinn vive enba so l’ombrage. Zot pou plante la grain ek zot pou bourgeonné couma pié raisin. Li pou ena mem reputation ki di-vin Liban.”

22 Bann Israélite ki ti’nn repenti, ti pou gueri lor plan spirituel ek Bondié ti pou ré-content zot. Jéhovah ti pou vinn couma enn la-rosée ki ti pou rafraichi zot; sa vedir ki Li ti pou beni zot beaucoup. So bann serviteur ki ti pou retabli dan zot pays, ti pou ena dignité “couma pié zolive,” ek zot ti pou marche dan chemin Bondié. Nou aussi nou bien determiné pou marche avek Jéhovah, alors ki nou bizin faire?

Contigne marche dan chemin droite ki Jéhovah inn tracé

23, 24. Avek ki prophetie encourageant livre Hoshéa fini, ek couma sa concerne nou?

23 Si nou envie marche avek Bondié, nou bizin manifesté la “sagesse ki sorti la-haut” ek agir toujours en accord avek so bann principe juste. (Jacques 3:17, 18) Dan dernier verset prophetie Hoshéa, nou lire: “Kisannla ki ena la sagesse, pou li comprend sa bann kitsoz-la? Kisannla ki ena enn bon jugement, pou li konn sa? Parski chemin Jéhovah, li droite; c’est bann dimoune juste ki pou marche ladan, mais bann ki faire peché pou tombé kan zot marche ladan.”—Hoshéa 14:9.

24 Au lieu ki nou laisse la sagesse ek principe sa lé-monde-la guide nou, anou bien decidé pou marche dan chemin droite ki Jéhovah inn tracé. (Deutéronome 32:4) C’est seki Hoshéa ti faire pendant au moins 59 an. Avek fidelité, li ti preche bann message ki Bondié ti donne li. Li ti koné ki bann ki ti ena la sagesse ek enn bon jugement ti pou comprend sa bann parole-la. Ki nou kapav dire lor nou? Tant ki Jéhovah permette nou rann temoignage, nou pou contigne rod bann dimoune ki, avek sagesse, pou accepté so faveur ki nou pa merité. Nou faire sa travail-la avek plaisir, ek en mem temps, nou coopere avek “l’esclave fidel et avisé.”—Matthieu 24:45-47.

25. Ki tou seki nou finn aprann dan prophetie Hoshéa bizin aide nou pou faire?

25 Tou seki nou finn aprann dan prophetie Hoshéa, bizin aide nou pou contigne marche avek Bondié avek l’esperance ki nou pou gagne la vie eternel dan le monde nouveau ki Li’nn promette. (2 Pierre 3:13; Jude 20, 21) C’est vrai-mem enn l’esperance extraordinaire! Sa l’esperance-la pou vinn enn realité pou nou personnellement, si nou montré par nou parole ek nou action ki nou vrai-mem sur ki “chemin Jéhovah, li droite.”

Couma ou pou reponn?

• Couma Bondié pou agir avek nou si nou adore Li dan enn fason ki pur?

• Kifer eski nou bizin garde touletan l’espoir en Jéhovah?

• Kifer ou sur ki chemin Jéhovah, li droite?

• Couma nou kapav contigne marche dan chemin droite Jéhovah?

[Zimage, page 18]

Accepté l’aide spirituel ki bann ancien donne nou

[Zimage, page 21]

Contigne marche avek Bondié avek l’esperance ki nou pou gagne la vie eternel

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze