Swiv Lexanp Bann Profet—Hoshéa
1. Ki kestion kitfwa ou’nn poz oumem?
1 ‘Ki bann sakrifis mo dispoze fer pou Jéhovah?’ Kitfwa ou’nn poz oumem sa kestion-la kan ou’nn medit lor bonte ek mizerikord ki Jéhovah ena an-abondans. (Ps. 103:2-4; 116:12) Hoshéa ti dispoze pou fer seki Jéhovah ti demann li, mem si li ti bizin fer bann sakrifis. Kouma nou kapav imit Hoshéa?
2. Kouma Hoshéa inn les nou enn bon lexanp pou persevere dan predikasion?
2 Pres Mesaz Bondie dan Lepok Difisil: Mesaz Hoshéa ti konsern sirtou rwayom dis-tribi Israël, kot vre ladorasion ti’nn preske disparet. Lerwa Yarobam II ti fer seki move devan lizie Jéhovah ek li ti kontign ankouraz ladorasion vo ki Yarobam I ti koumanse. (2 Rois 14:23, 24) Lezot lerwa ki’nn vini apre inn kontribie pou ki rwayom dis-tribi kontign degrade lor plan spiritiel ziska ki sa rwayom-la detrir an 740 avan nou lepok. Pourtan, mem si fos ladorasion ti’nn fane partou, Hoshéa ti res fidel kan li ti kontign servi kouma profet pandan omwin 59 an. Eski nou osi nou determine pou pres mesaz Bondie lane apre lane, mem si bann dimounn indiferan ouswa si nou gagn persekision?—2 Tim. 4:2.
3. Kouma lexanp Hoshéa montre mizerikord Jéhovah?
3 Res Konsantre lor Mizerikord Jéhovah: Hoshéa ti gagn linstriksion par Jéhovah pou marye avek “enn fam fornikasion.” (Hosh. 1:2) Mem si so madam, Gomer, ti gagn enn garson pou li, li paret ki plitar Gomer ti donn nesans de zanfan ki pa ti pou Hoshéa. Kan Hoshéa ti dispoze pou pardonn so madam, sa ti montre gran mizerikord ki Jéhovah ti ena anver Israël rebel kan zot ti repanti. (Hosh. 3:1; Rom. 9:22-26) Eski nou dispoze met enn kote nou bann swa personel pou ed tou sort kalite dimounn konn mizerikord Jéhovah?—1 Cor. 9:19-23.
4. Ki sertin sakrifis nou kapav fer pou Jéhovah?
4 Sertin serviter Jéhovah finn sakrifie enn gran karyer pou zot kapav pas pli boukou letan dan zot minister. Lezot finn desid pou res selibater ouswa pou pa gagn zanfan pou ki zot kapav met Rwayom Bondie an premie dan zot lavi. Kan nou reflesi lor lavi Hoshéa, kitfwa nou dire noumem: ‘Zame mo ti pou kapav fer seki li’nn fer.’ Selman, plis nou ogmant nou rekonesans pou faver ki Jéhovah manifeste anver nou ek nou kont lor so lespri sin pou gagn lafors, Li kapav servi nou dan bann fason ki zame nou ti panse, parey kouma Li ti servi Hoshéa.—Mat. 19:26; Phil. 2:13.