Res “Byin Okipe” Avek U Minister
1 Kan nu lir ki Pol ti pe kud latant letan li ti dan lavil Korint, nu kapav panse ki kitfwa sa travay la pa ti donn li ase lokazyon pu prese. Purtan, Akt 18:5 rakonte: “Pol finn kumans byin okipe avek laparol, ek li ti pe rann temwaynaz ar bann Zwif pu pruve ki Zezi li mem Kris.” Kifer eski Pol ti telman okipe avek travay predikasyon? Mem ki buku abitan Korint finn vinn krwayan, Senyer finn konfirme ki ti pu bizin fer ankor disip dan sa lavil la. (Akt 18:8-11) Eski nu’si, nu ena enn rezon parey pu res byin okipe avek nu minister? Wi. Nu kapav truv ankor buku dimunn ek anseyn zot laverite.
2 Pas Plis Letan dan Servis Pandan Avril: Sirman, u ena deza lobzektif pu pres bon nuvel tulemwa. Me, sertin mwa spesyal donn nu plis lokazyon pu “byin okipe” avek sa travay la. Parmi, ena mwa Avril ki an plin lepok Memoryal. Eski u sityasyon finn permet u fer pyonye asistan uswa pu ogmant u zefor dan predikasyon pandan sa lepok la? Buku proklamater ki fer sa pe gayn enn kantite benediksyon. (2 Korintyin 9:6) Si u pe fer tu seki u kapav, mazine ki Zeova apresye u servis ki u fer avek tu u nam. (Lik 21:2-4) Malgre dan ki sityasyon u ete, fixe lobzektif pu res “byin okipe” avek u minister pandan Avril. Ek pa bliye donn u rapor servis lafin dimwa pu ki kapav kont u zefor ansam avek zefor leres bann serviter Zeova.
3 Vizit Bann Nuvo Ki Ti Asiste Memoryal: Lane dernyer, lasistans pu Memoryal dan nu bann zil ti 9,943. Ek pu Moris li ti 3,346. Nu pu bizin atann pu konn lasistans sa lane la. Selman, bann rapor montre ki nu kapav atann ki ena enn pli gran “rekolt.” (Matye 9:37, 38) Donk, pli vit posib al vizit bann dimunn interese ki finn asiste Memoryal, pu donn zot led spirityel. Si nu ranvway sa bann vizit la pu plitar, nu pu permet Satan ‘ras parol rwayom ki finn seme dan zot leker.’ (Matye 13:19) Si u vizit sa bann dimunn la vit, sa pu montre ki u vremem “byin okipe” avek u minister.
4 Kontiyn Ed Bann Ki Pa Aktif: An Fevriye, finn kumans fer enn zefor spesyal pu ed bann ki pa aktif. Si ena ki pankor gayn vizit pastoral, bann ansyin bizin fer laranzman pu vizit zot avan mwa Avril fini. Bann ansyin pu sey dekuver rasinn zot problem, ek rod meyer mwayin pu ed zot pu revinn aktif dan servis Zeova. Si zot donn sa led ranpli ar lamur la, zot pu montre ki zot serye dan zot responsabilite berze pu pran swin “trupo Bondye.” (1 Pyer. 5:2; Akt 20:28) Bann ansyin kapav servi bann sigzesyion ki ena dan La Tour de Garde 15 Septam, 1993, paz 22-3, si zot bizin regle enn parmi sa bann sink problem ki bann proklamater ki pa aktif kapav gayne. Ek ki kone, ena kapav revinn aktif dan zot minister an Avril.
5 Ed Plis Dimunn pu Vinn Bann Proklamater Pa Batize: Eski u bann zanfan kalifye pu vinn bann nuvo proklamater bon nuvel? Ki u panse lor bann ki pe etidye Labib avek u? Si bann ansyin apruv zot, eski u pa panse ki Avril pu enn bon lepok pu zot kumans prese? Si enn dimunn pe fer progre, ek li finn etidye brosir Ki Bondye Pe Demann Nu? ek liv Connaissance, kapav kontiyn so letid dan enn dezyem liv—swa liv La Bible : Parole de Dieu ou des hommes ?, swa liv La paix et la sécurité véritables : comment est-ce possible ?, ubyin ankor liv Unis dans le culte du seul vrai Dieu. U bizin ena lobzektif pu ed etidyan la gayn enn pli gran lintelizans laverite, pu li kalifye pu vinn enn proklamater pa batize, ek pu li angaz li ek vinn enn Temwin Zeova batize.—Efezyin 3:17-19; 1 Timote 1:12; 1 Pyer 3:21.
6 Si u kontiyn montre enn vre lintere pu u bann etidyan Labib, sa pu ed zot pu viv laverite. Enn Temwin finn zwenn enn kup ase aze ki finn aksepte enn letid Labib avek tu zot leker. Me, pandan trwa semenn aswiv zot finn ranvway zot letid. Alafin, letid finn kumanse. Sa fwa la, tulesemenn zot ti pe kennsel zot letid. Kan mem sa alafin, madam la finn progrese ziska batem. Frer la rakonte: “Apre ki li finn fini batize, so lizye ti ranpli ar larm lazwa, ek kan mwa ek mo fam finn get li, larm lazwa finn kumans kule dan nu lizye usi.” Wi, nu gayn enn gran lazwa kan nu “byin okipe” avek bon nuvel!
7 Bann profesi Labib ek bann levennman dan lemond montre ki lafin deryer laport. Asterla mem ki lepep Bondye bizin “byin okipe” pu fer lezot konn bon nuvel. Lapot Pol donn nu lasirans ki byinsir nu lapenn “pa pu dan vid devan Senyer.”—1 Korintyin 15:58.