Bann Prezantasyon Sinp ek Kler Donn Pli Bon Rezilta
1 Kifer eski suvan bann dimunn plis interese kan bann zenn proklamater pres mesaz Rwayom ar zot? Ebyin, enn rezon li parski zot servi bann mo sinp. Ena proklamater kapav panse ki pu rann enn bon temwaynaz, nu bizin fer bann gran-gran prezantasyon. Me, lexperyans finn montre ki enn prezantasyon sinp ek kler pli bon.
2 Zezi ti anons Rwayom Bondye enn fason sinp, direk ek li ti form so bann disip usi pu fer parey. (Matye 4:17; 10:5-7; Lik 10:1, 9) Li finn servi bann lintrodiksyon, bann kestyon ek bann legzanp ki ti sinp pu kapte latansyon bann ki ti pe ekut li ek pu tus zot leker. (Zan 4:7-14) Li pu bon si nu imit so legzanp ek nu fer bann prezantasyon ki dimunn konpran fasilman.
3“Bon nuvel lor Rwayom” sa mem mesaz ki nu bizin anonse. (Matye 24:14) Si nu fer Rwayom vinn lide prinsipal nu mesaz, sa pu ed nu pu gard enn prezantasyon sinp. Koz lor bann kitsoz ki konsern bann dimunn ki pe ekut u. Bann madam suvan pli interese ar zot fami ki ar politik. Enn papa sirtu konserne par so travay ek sekirite so fami. Bann zenn interese ar zot lavenir, ek bann dimunn aze interese ar enn meyer lasante ek zot sekirite. Suvan dimunn pran plis kont seki pe pase dan zot prop peyi ki seki pe pase deor. Apre ki u finn fini koz lor enn kitsoz ki interes dimunn la, atir so latansyon lor bann benediksyon ki bann dimunn ki obeir Bondye pu zwir kan Rwayom Bondye pu dirize. Si u servi detrwa mo sinp ki u finn byin swazire, ansam avek enn tex Labib, kitfwa sa mem meyer fason pu kapte lintere enn dimunn.
4 U kapav kumans enn konversasyon kumsa:
◼ “Sirman u pu dakor ki limanite byin afekte par buku maladi ki pena gerizon. Me, eski u kone ki Bondye finn promet ki byinto Li pu tir tu sort kalite maladi, ek mem lamor?” Les dimunn la reponn, ek lerla lir Revelasyon 21:3, 4.
5 Servi bann prezantasyon sinp ek kler pu tus lespri ek leker pli buku dimunn dan u teritwar. Ed zot pu aprann konn Zeova ek pu konn posibilite pu zwir lavi pu tuletan.—Zan 17:3.