Kestyon Ki Suleve
◼ Kuma nu kapav respekte letan dan bann reynion?
Kan nu koz enn bon koze avek bann kamarad, suvan nu truv letan pas byin vit. Akoz sa, defwa li difisil pu respekte letan kan nu fer bann size dan reynion. Ki kapav ed nu pu pa depas letan?
Kumans dan ler. Enn u de minit avan ki reynion kumanse, li bon invit lasistans pran zot plas pu ki reynion kumans dan ler ek dan lord. (Eccl. 3:1) Kan nu reyni an ti grup, parey kuma dan reynion pu la predikasyon, la usi bizin kumans dan ler. Pa neseser atann bann ki an retar.
Fer enn bon preparasyon. Kan u prepar u bann size byin alavans, sa ed u pu respekte letan. Gard lobzektif u size klerman dan u lespri. Evit bann detay initil. Gard u prezantasyon sinp. Si ena bann demonstrasyon uswa bann intervyu dan u size, repet zot alavans. Kan u pe repet u size, otan ki posib kronomet li.
Diviz u size an diferan parti. Ki li enn diskur uswa enn diskisyon avek loditwar, kitfwa u pu truv sa itil, pu klas u bann lide an diferan parti. Deside ki kantite letan u pu pran pu sak parti, ek ekrir li akote, lor u bann not. Apre sa, kontrol u letan pandan u size. Dan enn diskisyon avek loditwar, ena enn move tandans ki u bizin evite. Evit dir tro buku kitsoz dan u lintrodiksyon pu ki apre, u pa galupe lor bann lide ki pli inportan. Bann kondikter Latur Degard bizin rezerv ase letan pu egzaminn bann kestyon revizyon a la fin. Fode pa usi ki zot depas letan, pu ki kumsa kapav sant kantik ek fer lapriyer final dan ler.
Terminn dan ler. Si dan enn reynion, ena plizir partisipasyon parey kuma dan reynion servis, sak orater bizin vey byin ki ler so size kumanse ek ki ler li fini. Ki pu fer si finn gayn enn retar dan program reynion? Bann frer ki ena partisipasyon apre, kapav kup zot size ek fer resorti selman bann pwin prinsipal. Kumsa, kapav ratrap letan perdi. Sa se enn parmi bann kapasite ki enn bon anseynan ena.
Loditwar usi kapav ed enn frer pu respekte letan ki li ena pu so size. Kuma? Se kan zot donn bann repons kurt ek presi. Donk, nu tu kapav fer nu par pu ki bann reynion derul “byin ek dan lord.”—1 Cor. 14:40.