Nou tou ensam, anou faire zeffort pou annonce l’assemblée district “Suive Christ!”
Bann proclamateur pou redistribué enn l’invitation special
1 L’année derniere, campagne mondial pou annonce l’assemblée district “Delivrance pé approché!,” ti ena enn grand l’effet lor bann ki interessé. Bann ki ti accepté sa l’invitation-la ek ki ti vini, zot ti profite enn grand repas spirituel pou premier fois ensam avek bann Témoins de Jéhovah. (Is. 65:13) Zot ti profite bon compagnie nou bann frere ki dan l’unité. (Ps. 133:1) Pou nou kapav aide enn maximum dimoune pou assisté l’assemblée district “Suive Christ!,” nou pou redistribué enn l’invitation special dan le monde entier.
2 Resultat l’année derniere: Dapré bann rapport ki finn gagné dan plusieurs l’endroit dan le monde, finn gagne bann bon resultat avek l’invitation l’assemblée district “Delivrance pé approché!” Dan beaucoup l’endroit, nou finn gagne bann bon publicité. Par exemple, dan enn la-ville, enn la-gazette finn ecrire enn lartik six colonne concernant sa campagne-la, ek finn dire: “Bann Témoin finn faire enn zeffort special pou joinde tou dimoune dan zot l’endroit a temps avant l’assemblée. Zot finn travail pli longtemps, marche pli longue distance, ek koz pli vite.” Sa campagne ki’nn organisé-la finn interesse enn journal local dan enn lot la-ville, ek zot finn donne bann l’information plus en detail. Au moins trois la-gazette finn donne enn bon rapport lor nou l’activité avant l’assemblée. Enn dimanche, enn journaliste finn ecrire plusieurs lartik dan plus detail lor deux page so la-gazette. Li ti explik nou bann croyance, l’association nou bann frere, campagne distribution l’invitation, ek lor l’assemblée. Kan enn proclamatrice ti vinn quitte enn l’invitation kot enn madame, madame-la ti dire li: “Oui. Mo ti fek pé lire sa dan la gazette là!” Enn lot madame ti dire: “Mo’nn fek pé lire lor zot, ek asterla zot là! Eski c’est mo l’invitation sa?” Apré li ti dire: “C’est enn kitsoz bien bon ki bann Témoins de Jéhovah pé faire.”
3 Beaucoup dimoune ki ti interessé ti vinn l’assemblée avek zot l’invitation dan zot la-main. Certain finn voyage depuis bien loin pou vinn assisté program. Grace a bann grand zeffort ki nou ti’nn faire pou invite bann dimoune, l’assistance pou l’assemblé ti bien augmenté. Par exemple dan enn pays ti ena 27 pour cent dimoune ki ti assisté l’assemblée en plus ki seki ti ena l’année derniere.
4 Couma pou couvert tou territoire: Ou kapav commence distribué l’invitation trois semaine avant l’assemblée. Bizin faire tou zeffort pou couvert territoire la congregation net. Dan bann congregation kot ena bann grand territoire, bann proclamateur kapav quitte enn l’invitation, sans trop faire remarké, kot bann absent pendant dernier semaine avant l’assemblée. Bann congregation bizin faire tou pou distribué tou zot bann l’invitation ek pou couvert zot territoire autant ki possible. Si ena l’invitation en plus, kapav donne sa bann pionnier dan congregation.
5 Ki pou dire: Ou kapav dire sa: “Nou pé participe dan enn campagne mondial ek nou pé distribué sa l’invitation-la avek bann dimoune, pou zot assisté enn l’evenement important. Sa c’est ou l’invitation. Ou pou gagne lezot detail ladan.” Kan nou faire enn presentation bien courte, sa pou permette nou distribué plus l’invitation. Bien-sur, si enn dimoune ena bann question, prend le temps pou reponn li. Si dimoune-la interessé, prend note ek ré-vinn visite dimoune-la pli vite possible.
6 Li vrai-mem important ki nou faire zeffort pou suive Christ. (Jean 3:36) Nou prochain l’assemblée district pou aide tou seki pou vinn assisté pou faire sa. Oui, nou kapav sur ki pou ena enn grand temoignage ki pou donné encore enn fois grace a zeffort ki nou pou faire pou invite bann dimoune pou l’assemblée district “Suive Christ!” Alors, anou invite maximum dimoune ki nou kapav avek zèle. Ki Jéhovah beni bann zeffort personnel ki ou pé faire dan l’unité dan sa campagne mondial-la!