Kan bizin faire enn nouvelle visite?
1. Ki kitsoz impliké kan nou faire bann disciple?
1 Faire bann disciple implik revisite n’importe ki dimoune ki finn montré l’interet pou aprann lor Royaume Jéhovah. (Mat. 28:19, 20) Pli bon moment pou faire enn nouvelle visite depann souvent lor nou programme ek programme dimoune ki interessé-la. Kifer nou bizin révinn visite enn dimoune pa trop longtemps apré ki nou’nn joinde li premier fois?
2, 3. Kifer nou bizin revisite enn dimoune pli vite possible?
2 Kifer bizin révinn vite? Sa travail pou preche “sa bon nouvelle lor royaume-la” pré pou fini, ek la fin sa systeme-la bien pré. (Mat. 24:14; 1 Pierre 4:7) Parski bann dimoune encore kapav profite sa ‘jour pou delivrance-la,’ nou bizin prend compte conseil ki dire nou ‘pa arrete preché.’ Sa implik ki nou retourne pli vite possible pou cultive l’interet ki bann dimoune inn manifesté.—2 Cor. 6:1, 2; 2 Tim. 4:2.
3 Satan bien envie detruire tou la grain Royaume ki nou finn kapav planté dan leker enn dimoune ki interessé. (Marc 4:14, 15) Bann membre enn famille, bann camarade travail, ek lezot dimoune souvent bouffonne bann ki’nn montré l’interet. Kan nou pa tardé pou révinn visite enn dimoune, sa pou permette nou pou construire lor conversation ki nou finn gagné premier fois, avant ki lezot faire li perdi so l’interet.
4. Ki nou kapav faire pou prepare enn nouvelle visite kan nou joinde enn dimoune premier fois?
4 Prend rendez-vous: Kan nou joinde enn dimoune premier fois, li bon ki nou faire bann l’arrangement precis pou revisite li avant nou allé. Souleve enn question ki ou pou reponn dan ou prochain visite. Li important ki nou ecrire kan nou finn joinde enn dimoune ek kan nou pou revisite li. Si ou programme permette, ou kapav demann dimoune-la si ou kapav révini lendemain, ou-soit bien vite apré. Si ou joinde enn dimoune premier fois pendant enn week-end, ek ki dimoune-la travail pendant la semaine, kitfois li pou d’accord ki ou revisite li week-end apré. Kan ou prend enn rendez-vous, faire sur ki ou tini ou parole.—Mat. 5:37.
5. Kan nou al faire bann nouvelle visite sans tardé, couma sa aide nou pou rempli mission ki Jésus inn donne nou pou faire bann disciple?
5 Nou ena bann bon raison pou revisite bann dimoune ki interessé, pli vite possible. Alors, prend enn rendez-vous, ek révini vite, parski “reste bien tigit le temps.” (1 Cor. 7:29) Pli vite nou revisite bann ki interessé par message lor Royaume Bondié, plus nou pou gagne bann bon resultat pou nou bann zeffort.