Nou bann magazine inn faire pou attire tou qualité dimoune
1. Couma eski l’esclave fidele et avisé imite l’apotre Paul?
1 Pareil couma l’apotre Paul ti adapté fason ki li ti presente la bonne nouvelle pou li kapav gagne “tou sorte qualité dimoune,” l’esclave fidele et avisé aussi servi nou bann magazine pou touche bann dimoune ki sorti dan different culture ek ki ena different croyance. (1 Cor. 9:22, 23) Pou ki nou kapav bien servi La Tour de Garde ek Réveillez-vous !, nou bizin garde bien dan nou l’esprit pou kisannla finn ecrire sa bann magazine-la.
2. Réveillez-vous ! finn faire pou touche ki qualité dimoune?
2 Réveillez-vous !: Sa magazine-la finn faire pou touche bann mem qualité dimoune avek ki l’apotre Paul ti kozé, kan li ti pé adresse-li ar bann “habitant Athènes.” (Actes 17:22) Sa bann zom-la pa ti bann chretien, ek zot pa ti ena enn grand connaissance lor bann l’Ecriture. Réveillez-vous ! inn faire pou bann mem qualité dimoune, setadir bann ki ena enn ti connaissance ou-soit mem bann ki pena okenn connaissance lor la Bible. Kitfois zot pa konn nanyin concernant bann l’enseignement chretien, zot pena confiance en la religion, ou-soit zot pa koné ki la Bible ena enn valeur pratik. Enn l’objectif principal Réveillez-vous ! c’est pou convaink bann ki lire sa magazine-la ki vrai Bondié existé. L’objectif sa magazine-la c’est pou aide bann dimoune pou ena la foi dan la Bible ek pou comprend ki bann Témoins de Jéhovah zot different ar bann lezot groupe religieux.
3. Pou kisannla chaque edition La Tour de Garde finn ecrire?
3 La Tour de Garde: Edition publik sa magazine-la finn faire pou touche bann dimoune ki ena enn certain respé pou Bondié ek pou bann l’Ecriture. Zot ena enn certain connaissance lor la Bible mais zot pa comprend so bann l’enseignement dan enn fason exact. Zot “ena la crainte pou Bondié” pareil couma bann dimoune avek ki Paul ti kozé. (Actes 13:14-16) Edition l’etude La Tour de Garde finn ecrire surtout pou bann Témoins de Jéhovah. Paul ti koné ki bann dimoune ki ti lire so bann lettre ti konn bann l’Ecriture ek ti ena enn connaissance exact lor la verité. (1 Cor. 1:1, 2) Li pareil aussi pou bann lartik ki trouve dan edition l’etude. Zot finn ecrire pou bann ki assisté reunion ek ki bien habitué avek bann croyance bann Témoins ek bann expression ki zot servi.
4. Kifer eski nou bizin bien konn chaque numero bann magazine ki nou servi dan predication?
4 Mem si normalement dan predication nou presente toulé-deux periodik ensam, bien souvent nou koz zis lor enn sel dan nou presentation. Alors, fixé l’objectif pou konn chaque numero bann magazine bien. Coumsa, ou pou pli kapav presente bann lartik ki pou attire bann dimoune ki ou joinde.