Arrose bann la grain pou ki zot poussé
1. Ki nou bizin arrosé pou ki li kapav poussé?
1 Kan nou plante enn la grain, nou bizin arrose li pou ki li poussé. Li pareil aussi pou bann la grain la verité ki’nn planté dan leker bann dimoune dan nou territoire. (1 Cor. 3:6) Si nou envie ki sa bann la grain symbolik-la prend racine, poussé ek produire bann fruit, nou bizin faire bann visite ek servi Parole Bondié pou arrose zot.
2. Couma nou kapav prepare terrain pou nou prochain visite?
2 Pose enn question: Kan ou pé prepare ou presentation, kitfois ou kapav prepare enn question ki pou interesse dimoune-la ek ki ou ti pou content reponn kan ou retourné prochaine fois. Souleve sa question-la a la fin ou premier conversation, ek faire bann l’arrangement precis pou visite dimoune-la. Beaucoup finn trouvé ki si zot choisir enn sujet dan livre Ki la Bible enseigné sa permette zot montré couma enn l’etude la Bible deroulé.
3. Ki l’information ou bizin ecrire kan ou joinde enn dimoune ki interessé?
3 Prend bann note: Desuite couma ou fini preche avek sa dimoune-la, prend bann note. Ecrire so nom ek so l’adresse. Li bon aussi ki ou ecrire date ek l’heure ki ou’nn koz avek li. Ou kapav ecrire aussi lor ki kitsoz ou finn kozé, ek ki publication ou finn quitté. Eski li’nn dire ou ki religion li été? Eski li marié ek li ena zenfant? Eski li’nn dire ou ki kitsoz interesse li ek ki kitsoz tracasse li? Sa bann l’information-la pou aide ou adapté bann conversation ki ou pou gagné apré. Ecrire aussi jour ek l’heure ki zot inn tombe d’accord pou retourné ek ki question ou pou reponn.
4. Kifer nou bizin perseveré kan nou bizin visite bann dimoune ki montré l’interet?
4 Perseveré: Satan pa pou arrete faire zeffort pou tire “parole ki’nn semé” dan leker enn dimoune. (Marc 4:14, 15) A cause sa, pa baisse lé-bras si ou pa reussi ré-joinde sa dimoune ki’nn montré l’interet-la. Eski ou kapav envoye li enn lettre ou-soit mette enn ti mot dan boite kot mette lettre? Enn pionnier ti commence l’etude avek enn madame devant so la porte, mais li pa ti reussi ré-joinde madame-la, alors li’nn envoye li enn lettre. Finalement, kan sa soeur-la finn reussi joinde sa madame-la kot li, madame ti dire ki sa ti extra touche li ki sa soeur-la ti montré enn l’interet personnel envers li. A mesure ki nou arrose bann la grain la verité, sa donne nou beaucoup la joie kan nou trouve zot pé germé, poussé ziska ki zot vinn grand, ek ‘rapporte bann fruit, ki donne trente, soixante, ek ziska cent fois plus.’—Marc 4:20.