Avy eo amin’ny lovantsofina Indiana mankeo amin’ny fahamarinana araka ny Baiboly
HO TIANAREO ve ny hiaraka amin’ny mpiandraikitra kristiana iray mpitety faritany sy ny vadiny any amin’ireo nosy San Blas (na fitambaranosin’i las Mulatas)? Io fitambara-nosy kley eo amin’ny 300 io, amin’ny moron-tsiraka fotsy manjelajelatra tondrahan’ny ranon’i Karaiba dia manaraka indrindra ny moron-tsiraka avaratra amin’ny andilan-tanin’i Panama. Saika rakotra palmie daholo ireo nosy tropikaly ireo ka onenan’ny Indiana Kunas — vahoaka izay amin’ny ankapobeny dia mahay mandray olona sy tia mampiantrano vahiny.
Ny Kunas dia manana ny lovantsofiny ara-pivavahana. Ankoatr’izany, izy ireny dia hahazo ny fitsidihan’ireo solontena avy amin’ny fivavahana maro izay nanolotra ho azy izao karazan-kevitra sy filozofia rehetra izao. Mirona ho amin’ny fanontaniana toy izao àry izy ireny: “Iza moa no kristiana marina?” Ny Vavolombelon’i Jehovah dia nanome azy ireny ny valiny voarakitra ao amin’ny Soratra Masina, ary nandray tsar any fahamarinana araka ny Baiboly ny Kunas vitsivitsy.
Fandraisana ny fahamarinana araka ny Baiboly
Ramón, ohatra, dia nahalala ny fahamarinana ao amin’ny Baiboly tany an-tsekoly. Ny anankiray tamin’ireo namany dia nanome azy anankiray tamin’ny boky hoe ‘Zavatra izay tsy hain’Andriamanitra andaingana’, boky navoakan’ny Fikambanana Watchtower. Novakiny io boky io izay nahafinaritra azy ary satria naniry hahafantatra bebe kokoa ny amin’izany izy dia nanoratra tany amin’ny sampan’io fikambanana io mba hanafatra boky hafa. Lasa ny iray volana, ary dia naharay fanafarana boky avy aminy indray ny sampana. Taorian’ny fanafarana fahatelo, dia nanao fandaharana ny biraon’ny sampana mba handehanan’ny mpiandraikitra ny fizaran-tany iray hitsidika azy io sy ny zanaky ny mpiraitampo aminy iray, Rogelio. Nasaina izy ireo hanatrika fivoriamben’ny fizaran-tany iray nataon’ny Vavolombelon’i Jehovah tany Panama, ary nitondra fifaliana lehibe ho azy izay hitany tany. Hitany aza fa i Julio, zanak’olo-mpirai-tampo aminy, nonina tao amin’io tanàna io, dia Vavolombelon’i Jehovah. Izy telo ireo izao dia kristiana vita batisa sy manao ny asan’ny mpitory maharitra manokana, na mpitory ilay Fanjakana manontolo andro. — Matio 24:14..
Miainga ho any amin’ireo nosy isika
Miaraha aminay izao raha mbola mampiely ny vaovao tsara any amin’ireo nosy izahay. Amin’ny fotoana sasany, dia havelantsika eo amin’ny fasika amoron-dranomasina ny lakana-fiarakelintsika ka mizotra manatona ny trano fanaovan-draharaham-panjakana isika. Ao isika dia miresaka amin’ny zahila (filoha), satria raha tsy misy fanomezan-dalana avy aminy dia tsy afaka mitsidika ny Indiana any an-tranony isika. Rehefa avy miteny “kuna” vetivety aminy i Ramón dia milaza amintsika fa handeha hitsidika ireo mponina ao amin’ilay vohitra isika.
Azo inoana fa ny fitafiana marevaky ny vehivavy sy ny zazavavy “kunas” no mitana ny maso voalohany. Tena mahasodoka tokoa ny taovolony sy ny akanjony maro lokoa. Matetika tokoa ny akanjo amboniny dia mola (lobaka), fitafiana voakaly mahavariana vita “broderie-application” mampiseho biby, vorona, hazandrano, lolo sy sary hafa. Tsy mahalana izy ireny no miravaka kavin’orona sy sofina volamena ary rojo volamena na volafotsy. Misy vakana haba mifehy ny tanany sy ny tongony.
Amin’ny ankapobeny, ny vehivavy dia miasa manodidina ny tranony, na dia hainy tokoa aza ny mitatitra rano avy eny amin’ny kontinanta amin’ny alalan’ny lakana kely. Mandrakariva ny lehilahy dia mamboly yucca sy mioty voankazo ao amin’ny fincas (toeram-pambolena kely) eny amin’ny kontinanta; ny fanjonoana anefa no raharahany lehibe indrindra.
Nahazo fanambarana ny “Kunas”
Andeha isika hiverina amin’ny asa fitoriantsika. Tapa-kevitra aho ny hiara-hitory amin’i Rogelio izay handika ny teniko espaniola ho amin’ny fitenim-paritany kuna, fa ny vadiko kosa miaraka amin’i Ramón na Julio. Manasa antsika amim-pahaiza-mampiantrano vahiny mba hipetraka ny “Kunas” ary avy hatrany dia manolotra amin’ny tsirairay avy amintsika kafe iray kaopy lehibe izay avy hatrany dia arahin’ny rano amin’ny kaopy mba hanotsanantsika vava. Aorian’izany dia afaka miresaka isika. Alao sary an-tsaina anefa ny toeranay rehefa avy nanao fanambarana tao amin’ny tokantrano samy hafa folo eo ho eo. Voatery fotsiny izahay mandà izay rehetra fanolorana kafe indray, amin’ny fisaorana ny mpampiantrano anay noho ny hatsaram-panahiny.
Noho izy ireny ta-hahafantapanta-javatra, dia tian’ny Kunas ny hahafantatra hoe avy aiza izahay, manambady ve izahay ary raha izany no izy, raha manana zanaka izahay. Matetika tokoa, rehefa manazava amin’izy ireo aho fa avy any Alemaina, dia avoakany ny zanany vavy eo amin’ny taona hanambadiana. Rehefa fantany fa manambady aho ary tsy miteraka izahay mivady, dia malahelo anay izy ireo. Manipy hevitra mihitsy aza izy ireo ny hanome anay zazakely mba hanananay ny fianakavianay! Tsy ilaina ny manazava fa tsy maintsy mandà ny fanolorany izahay.
Tena fahafinaretana tokoa ny mitsidika ireny olona ireny. Notoloranay boky momba ny Baiboly amin’ny teny espaniola miresaka ny amin’ny paradisa an-tany izy ireo. Rehefa afaka minitra vitsivitsy, dia tonga ny “Kunas” maro hafa koa, manantena ny hahazo ny bokiny koa.
Rehefa niverina mba hanao fiverenana mitsidika tao amin’ny anankiray amin’ireny nosy ireny izahay, dia nanatona ny lehilahy iray ka nangataka anay mba hanampy azy hianatra ny Baiboly, ary dia nataonay tamim-pifaliana izany. Tany amin’ny nosy sasany izay nanomezan’ny filoha lalana anay hihaona amin’ny olona, dia azonay natao ny nanao fanambarana tamin’ireo tonga ho azy nangataka Baiboly na boky momba ny Baiboly taminay. Eny, maro no mampiseho fahalianana amim-pahatsorana ho an’ny Soratra Masina..
Manakaiky ny takariva ka tsy maintsy miverina any amin’ny nosy Nurtupo onenan’i Ramón, Rogelio sy Julio izahay. Raha mbola mitopatopa malefaka amin’ny sambonay ny onja, dia eritreretinay sy Nora ny zavatra hita tamin’ny fitoriana mampandroso rehetra vao niainanay teo amin’ny fanompoana an’Andriamanitra. Lanjalanjainy tsaratsara kokoa ny ilàna fanampiana mba “ho ravoravo ny nosy maro” noho ny fahamarinana ao amin’ny Baiboly. — Salamo 97:1.