‘Afafazo ny Voan’ilay Fanjakana’ eo Amin’ny Lalana Fizarana Gazety
1 Mitondra ny lohateny hoe “Fafazo ny Voan’ilay Fanjakana” ny hira faha-133 ao amin’ny boky Mihirà Fiderana ho An’i Jehovah. Miorina amin’ny fanoharan’i Jesosy izay mampitovy ilay asa fanaovana mpianatra amin’ny famafazana voa izy io. (Matio 13:4-8, 19-23). Toy izao no vakin’ilay tonon-kira: “Ny voa latsaka an-tany lonaka/Miankina aminareo”. Ahoana no ahafahantsika mampitombo ny fahitana vokatra eo amin’ny fanompoantsika? Ny fomba iray dia ny fanorenana sy ny fihazonana lalana fizarana gazety.
2 Zava-kendrena maromaro no azo tratrarina amin’ny fanaovana lalana fizarana gazety. 1) Mahatonga anao hanorina fifandraisana amim-pisakaizana amin’ilay olona liana ny fitsidihana tsy tapaka isan-tapa-bolana. 2) Hamatsy tsy tapaka izany olona izany amin’ny fanazavana mamonjy aina izay voarakitra ao amin’ny Tilikambo Fiambenana sy Mifohaza! ianao. 3) Amin’ny resaka ataonao, dia afaka manampy ilay olona ianao mba hanana faniriana mafy ny fahamarinana araka ny Soratra Masina izay mety hitarika ho amin’ny fianarana Baiboly. — 1 Pet. 2:2.
3 Ny fomba hanombohana lalana fizarana gazety: Isaky ny misy olona mampiseho fahalianana amin’ireo gazety, dia hazavao fa misy lahatsoratra miavaka aseho ao amin’ny nomerao tsirairay, ary ho faly ianao hitondra azy ireny any aminy isan-tapa-bolana. Aorian’ny handaozanao azy, dia raiso an-tsoratra ny anaran’ilay olona sy ny adiresiny, ny daty nitsidihana, ny datin’ireo gazety voapetraka, ny lahatsoratra nasongadina, ary ny foto-kevitra nahaliana indrindra ilay olona.
4 Afaka manomboka lalana fizarana gazety amin’ny olona vitsivitsy monja ianao amin’io. Avy eo dia miezaha mba hanitatra izany amin’ny fampidirana ny hafa izay nametrahanao gazety. Rehefa mitombo ny olona anaovanao lalana fizarana gazety, dia afaka mandamina azy isam-paritra ianao mba hahamora kokoa ny famitana ny fitsidihana azy. Raiso an-tsoratra amim-pitandremana hoe gazety inona avy no voapetraka tamin’ny fitsidihana tsirairay, ary oviana. Manaova naoty fanampiny momba ny resaka nataonao sy ny fomba hanohizana ny fampitomboana ny fahalianan’ilay olona amin’ny fahamarinana amin’ny fitsidihana manaraka.
5 Ampidiro ireo mpandraharaha sy mpiasa matihanina: Nasehon’ny fitantarana fa mpivarotra sy mpiasa matihanina hafa no azo inoana fa handray ny gazetintsika tsy tapaka. Nanao lalana fizarana gazety ho an’ny ben’ny tanànany mihitsy aza ny loholona iray. Nanomboka fampianarana tamin’ny tompon’ny tranombarotra iray izay 80 taona, ny mpitory iray, taorian’ny nitondrany gazety tany aminy nandritra ny folo taona nisesy!
6 Niditra tao amin’ny fivarotana ny anabavy mpisava lalana iray, ary nahita mpivady izay tena tsy nandray azy tamim-pitiavana. Kanefa, noho izy ireo nandray gazety, dia nanapa-kevitra ny hampiditra ilay mpivady ho ao amin’ny lalana fizarany gazety izy. Rehefa nandeha ny fotoana, dia tsy te hitsidika azy ireo intsony ilay anabavy satria niavonavona erỳ izy ireo sady tsy niteny firy mihitsy, na dia nametrahany fanontaniana hahalalana fomba fihevitra fotsiny aza. Nivavaka momba ilay raharaha anefa ilay anabavy, ary tamin’ny farany dia nametraka ny boky Hiaina Mandrakizay tamin’ilay mpivady. Hoy ilay ramatoa rehefa voavakiny ilay izy: “Ela ny ela ka nahita ny fahamarinana aho!” Natomboka àry ny fampianarana Baiboly, ary natao batisa ilay mpivady tatỳ aoriana. Nitondra voka-tsoa tokoa ny faharetan’ilay mpisava lalana.
7 Fanaovana fiverenana mitsidika: Vakio ny lahatsoratra tsirairay, rehefa mahazo gazety vaovao ianao. Mitadiava hevitra izay hanintona ny olona tsirairay ao amin’ny lalana fizaranao gazety. Avy eo, rehefa miverina any aminy ianao dia afaka milaza toy izao: “Rehefa namaky ity lahatsoratra ity aho dia nieritreritra anao sy ny mety hahaliana anao amin’izy ity.” Afaka mankafy ny fanaovana lalana fizarana gazety ny mpitory rehetra samy hafa taona. Na dia ny ankizy aza dia afaka milaza toy izao: “Faly aho mahita anao indray. Efa tonga ny nomeraonao farany amin’ny Tilikambo Fiambenana sy Mifohaza! Mino aho fa ho tianao ity lahatsoratra mitondra ny lohateny hoe (...) ity.”
8 Ataovy izay hahatsindrian-daona azy hahita ny lahatsoratra ho avy, amin’ny fisarihana ny sainy ho amin’ilay faritra voafefy mitondra ny lohateny hoe: “Ao Amin’ny Nomerao Manaraka”. Rehefa mitohitohy ny lahatsoratra, dia asehoy izany ary ampirisiho ilay olona mba tsy ho tapaka amin’ny famakiana ny fizarana tsirairay amin’izany. Aza hadinoina fa isaky ny manatitra gazety any amin’ny olona iray izay anaovanao lalana fizaranao gazety ianao, dia azo isaina ho fiverenana mitsidika iray izany. Ary ambonin’izany rehetra izany, dia tadidio fa ny tanjontsika dia ny hanao izay hahatonga ireny fitsidihana ireny ho fampianarana Baiboly any an-tokantrano.
9 Tsidiho tsy tapaka ireo olona ao amin’ny lalana fizaranao gazety: Afaka manao ny lalana fizaranao gazety ianao amin’ny fotoana rehetra mifanentana amin’ny toe-javatra — amin’ny maraina ankobanandro, amin’ny faran’ny tolakandro, amin’ny fiandohan’ny takariva, na amin’ny faran’ny herinandro aorian’ny isan-trano. Raha tsy afaka manao ny lalana fizaranao gazety ianao satria marary na vakansy, dia mangataha mpitory hafa iray ao amin’ny fianakavianao na ao amin’ny kôngregasiônanao mba hanatitra ireo gazety. Amin’izay, ireo olona ao amin’ny lalana fizaranao gazety dia hahazo ny gazetiny ara-potoana.
10 Fomba iray hamafazana ny voan’ilay Fanjakana ny fitondrana tsy tapaka Ny Tilikambo Fiambenana sy Mifohaza! any amin’ireo rehetra anaovanao lalana fizarana gazety. Rehefa mampianatra azy ireo ny fahamarinana araka ny Soratra Masina ianao, dia mety ho azony ny hevitry ny tenin’ilay Fanjakana, ka hamoa voan’ilay Fanjakana miaraka aminao izy amin’ny farany. — Matio 13:8, 23.