Wõn eo Enaj Eoroñ Ennan eo Ad?
1 Ejjab einwõt mokta ilo bwebwenato in armij, elap an lap kamelele ko ibben armij, elõñ iair ejelok tokjeir im meñe kajebwabweik. Tokjen men in, elõñ rej eñjake air iabuñ kake, im ebin ad kaitoklimoir ñõn roñjake ennan eo ad kin Ailiñ in Anij. Rejjab kamolol bwe air eoroñ Nan eo an Anij emaroñ wor tokjen ko remõn ñõn ir.—Luke 11:28.
2 Jej lõñliñ bwe ilo elõñ mõttan ko ilo lõl in, elõñ thousand armij rej eoroñ ennan eo im rej mõnõnõ in katak Bible eo. Bõtab, ilo jikin ko jet, uak eo ejjab lukkun emõn. Elõñ ian jibadbad ko ad ilo jerbal in kwalok nan ejelok tõbrak ko remõn, im jemaroñ lemnak wõn eo enaj eoroñ ennan eo ad.
3 Jej aikwij kejbarok kij jen ad ebwer. Paul ear kamelele: “ ‘Bwe ro otemjej rej kir etan Iroij re naj mour.’ Inem ekijkan air naj kir ñõn Eo . . . rar jab roñ kin E? im ekijkan air naj roñ ñe ejelok dri kwalok? . . . Einwõt emwij je, ‘Enañin wõleo neen ro rej bõktok gospel in men ko remõn!’ ” (Rom. 10:13-15) Elañe jej tiljek in jeor ine in Ailiñ eo, Anij enaj kõmmõn bwe en eddeklok ilo buruen armij ro remol.—1 Kor. 3:6.
4 Key eo Ej ñõn Keini Am Kõmmõn Bar Jeblak ko: Ilo jikin ko ijo einwõt eiet armij ro rej eoroñ ennan eo ad, jej aikwij boub in kalaplok itoklimo an jabdewõt armij, meñe jej lelok book ko ak jab. Etke kwoj mõkaj im lemnak bwe ejelok juõn men kwomaroñ katõbrake? Ñe jej jeore ine ko, jejjab jela ia eo enaj wor tõbrak ie. (Ekl. 11:6) Elañe jej bojak ñe jej kõmmõn juõn bar jeblak ñõn kwalok juõn men jen Jeje ko, meñe ekaru wõt, jenaj maroñ tõbar buruen armij eo. Jemaroñ lelok juõn tract ak magazine ko rekãl. Tokelik, jenaj maroñ kwalok kilen katak Bible eo. Jenaj bwilõñ in lo joñan eo Jehovah enaj kajerammõn jibadbad ko ad.—Sam 126:5, 6.
5 Juõn tract kar doore ibben juõn kõrã eo ear kwalok an itoklimo. Kar jab bar loe ilo mweo imõn mae ruo alliñ ko tokelik, inem ear lukkun boub ñõn bwebwenato. Kar doore ejja tract eo wõt ibben. Jekdon jibadbad ko an ri kwalok eo ñõn jibadõk e ilo mweo imõn, ear bõk bar jilu alliñ ko mokta jen ear maroñ bar iione, ak ear nañinmij. Sister eo ear bar jeblak ilo week eo juõn, im juõn bwebwenato ekaru ear walok ikijen tract eo. Ke sister eo ear jeblak ilo week eo tok juõn, kõrã eo ear kwalok an itoklimo eo emol kin ennan kin Ailiñ eo. Juõn oktak ilo wãwen mour eo an ear kõmmõn bwe en lemnak kin aikwij eo an ilo jitõb. Kar kajutak juõn katak kin Bible, im jen ien eo ear kijejeto ilo an katak ilo kajojo week.
6 Einwõt kin jabdewõt men jekõnan lo an eddeklok, meñe wit ko, men in eddek ko, ak itoklimo ilo ennan kin Ailiñ eo, jerbal in kaddek ko rej men in aikwij. Men in ej aikwiji ien, kate, juõn lemnak in kea, im bebe eo ñõn jab ebwer. Ilo yiõ eo lok, elaplok jen juõn mõttan jilu in juõn million armij ro me okran in ennan kin Ailiñ eo ear eddeklok rar baptais! Elañe jej wõnmanlok im kwalok nan, jenaj lo elõñlok armij ro rej mõnõnõ in eoroñ ennan eo ad.—Keiri Galetia 6:9.