Nan in Anij Ej Tel Kij
1 “Mõnõnõ ion lõl—einwõt ejjab maroñ eindrein meñe ilo jidrik wõt ien. Nañinmij, bwijwõlã, ñitta, kowadroñ—ñõn kwalok jet wõt ian abañ ko relõñ—ekkã wõt air kaiñtan bed eo ad. Inem, kwo maroñ ba, ad kennan kin mour indrio ilo juõn paradise ion lõl ej einwõt ñe jej kil mejed jen mol eo. Kwo maroñ lemnak bwe ej einwõt kañ kõto, kinke mour indrio ej juõn ettõnak bajjõk wõt.”
2 Eindein an jino book eo Kwo Maroñ Mour Indrio ilo Paradise ion Lõl. Nan in ijjino in elaplok an jejjet rainin jen ke rar jeje book eo enañin 15 yiõ ko remotlok. Armij rej aikwij jela bwe Nan eo an Anij emaroñ tel kij im ej letok mejelan abañ ko me rej kaiñtan ir. Jenaj kate kij ñõn jibañ armij ro ilo alliñ in January ilo ad lelok ñõn ir juõn ian book kein ruo, elañe jab Kwo Maroñ Mour Indrio ilo Paradise ion Lõl inem Aõ Buk in Bwebwenato Ko Jen Baibel. Bwebota, baj doori wõt book ko ibben juõn armij ejjab melelen bwe enaj bõk tel eo an Anij. Jej aikwij kõmmõn bar jeblak ko kin mejenkajjik eo ñõn kajutak juõn katak kin Bible. Jenaj bõk jibañ elañe jej kate wõt kij. (Mat. 28:19, 20) Ijin ej jet ennan ko rej rejañ kaki:
3 Elañe kwoj iion juõn armij eritto, kwomaroñ kajeoñ wãwen in ñõn kebak armij:
◼ “I maroñ ke kajitõk: Ke kwar dik, ewi wãwen armij ilo bukwon eo rar lale don? [Kõtlok an uak.] Wãwen ko elaplok air oktak kiõ, rejjab ke? Ta eo kwoj lemnak ej unin oktak eo? [Kõtlok an uak.] Jej lo jejjet in kitien kin juõn kanan ilo Bible. [Konono 2 Timothy 3:1-5.] Ijellokin an kwalok ilo jejjet wãwen lõl in rainin, Bible eo ej kallimur kin juõn lõl emõnlok ilo ran ko renaj itok. Kin un in kimij rejañ aolep armij ñõn read Bible eo. Kwalok book eo Kwo Maroñ Mour Indrio ilo Paradise ion Lõl, im jitõñlok ñõn katak 18, eo ej kamelele kin bar juõn kanan me jaar lo an jejjet kitien. Lelok book eo. Elañe rej mõnõnõ in bõke, kamelele kin lãjrak in jabawot ñõn jerbal eo ibelakin lõl.
4 Ñe kwoj bar jeblak ibben juõn armij eritto eo kwar lelok book eo “Mour Indrio,” kwomaroñ ba:
◼ “Ke jaar bwebwenato ilo ien eo lok, jaar errã bwe ilo elõñ wãwen ko wãwen lõl in ilo ran kein rar oktak im nanalok ñe keiri ibben wãwen mour ilo jet yiõ ko remotlok. Bõtab, I ar jeblaktok ñõn kwalok ñõn yuk bwe Bible eo ej letok juõn kejatdikdik kin juõn lõl emõnlok ilo ran ko renaj itok. [Konono Revelation 21:3, 4.] Ilo ad jela bwe men in ej Nan eo an Anij en kar rejañ kij ñõn etale bar ta eo Bible ej ba. Kabellok book eo Mour Indrio ñõn peij 15, im konono paragraph 19. Tilmaake juõn katak kin Bible ilo ejelok wõnãn.
5 Elañe kwoj bwebwenato ibben juõn eo edik, kwomaroñ ba:
◼ “I kõnan kajitõk ibbõm kin juõn kajitõk: Einwõt juõn jodikdik, kwoj eñjake ke bwe ewor unin ñõn am bõk juõn lemnak emõn kin ta eo ej bed imad? Ewi lemnak eo am kin ilju eo ad? [Kõtlok an uak.] Jerammõn, bwe ewor un eo emol ñõn bõk juõn lemnak emõn kin ran ko renaj itok. [Konono Psalm 37:10, 11.] Kinke lemnak ko an armij reinjuõn jen don ikijen Bible eo im kobban Bible eo, kim ar jeje book in, Aõ Buk in Bwebwenato Ko Jen Baibel Eo. Lale ta eo ej ba kin un ko unin jej aikwij read Bible. [Konono paragraph ko ruo moktata ilo preface (peij eo mokta jen peij in kobban) eo.] Ñe jej liki bwe men eo Bible ej ba emol, jej bõk juõn kejatdikdik emol kin ran ko renaj itok. Elañe kwo kõnan konono book in I naj mõnõnõ in door juõn copy ibbõm.”
6 Ñe kwoj jeblak ibben juõn jodikdik eo ear bõk book eo “Aõ Buk in Bwebwenato Ko Jen Baibel Eo,” kwomaroñ jino ilo am ba:
◼ “Iar kamolol in roñ kin ewi joñan eo kwoj inebata kin ran ko renaj itok. Kememej bwe Iar kwalok ñõn kwe juõn eon ilo Bible eo ej kallimur ñõn kij kin juõn ilju elemõnõnõ im jokane. Ijin ej bar juõn eon. [Konono Revelation 21:3, 4.] Book eo Iar likiti ibbõm ej letok men in kamol eo ebin bwe Bible eo ej Nan eo an Anij, im jab an armij. Mol en ewor jet nan in rejañ ko remwilõl. Lale jet iair. [Jitõñlok ñõn bwebwenato No. 116, “Wãwen Ar Maroñ Mour In Drio.”] Elañe kwo kõnan, I naj mõnõnõ in katak Bible eo ibbõm ilo ejelok wõnãn.” Elañe rej mõnõnõ in katak kin Bible eo, kajitõk elañe armij eo ewor juõn an copy kin Bible eo. Elañe ejelok, ba bwe kwoj mõnõnõ in jibañ e bõk juõn copy. Lelok ñõn armij eo ien eo emõn ñõn letok jidik jabawot.
7 Juõn armij eo ejaje kin ia eo emaroñ bõk tel eo ñõn kamadmõde abañ ko kin mour emaroñ emakit ñõn wãwen in ñõn kebak armij:
◼ “Jej mour ilo juõn ien me enañin aolep armij ej jelmae abañ ko relap. Elõñ rej reilok ñõn ri kakabilek ro ñõn bõk tel. Jet rej reilok ñõn psychic (ri jedjed iju) ro ñõn bõk jibañ. Ia eo kwoj lemnak jemaroñ lo kakabilek eo emõn ie me enaj wor tokjen ñõn kij? [Kõtlok an uak.] Bible eo ej kwalok juõn mol eo eaorõk me kij aolep jej aikwij melele kake.” Konono Jeremiah 10:23. Kabellok book eo Kwo Maroñ Mour Indrio ilo Paradise ion Lõl ñõn peij 14. “Book in enaj jibañ yuk ñõn kamolol kin ewi wãwen, iumin Ailiñ eo an Anij, aolep abañ ko ad naj jako. Kwo kõnan ke readi?” Elañe rej bõke, kamelele kin lãjrak kin jabawot eo.
8 Elañe ilo ien lolok eo mokta kwar konono kin aikwij eo an armij kin nan in tel, ilo ien eo kwoj bar jeblak kwomaroñ wõnmanlok ilo bwebwenato eo ilo am ba:
◼ “Ilo ien eo mokta ke jaar iion don, jaar errã bwe jej aikwiji tel jen Anij bwe jen maroñ kijenmij im lo tõbrak kin abañ ko kin mour. Ikijen men in, Ij lemnak kwonaj kamolol kin nan in kejemlok ko ilo book eo Iar likiti ibbõm. [Konono paragraph 14-15 ilo peij 255 ilo book eo Mour Indrio.] Ij mõnõnõ in tilmaake juõn katak kin Bible ilo ejelok wõnãn, im ij bojak kiõ in kwalok kilen katak eo.”
9 Jehovah enaj kajerammõn jibadbad ko ad ñe jej jibañ ro reritto im ro redik jimor ñõn kamolol kin aorõkin Nan eo an Anij im tel eo an ilo mour eo ad.—Sam 119:105.