Wãwen Lelok Buk eo Baibel Ej Lukkun Katakin

Peij in ej kakobaik nan in kakabilek ko kin lelok buk eo Ta eo Baibel Ej Lukkun Katakin. Bwe en bolemen, kajerbal nan ko ren am mõke, ekkar ñõn wãwen armij ro ilo bukwon eo am. Jela kobõn im katak ko me kwomaroñ bwebwenato kaki. Kwomaroñ kajerbal ennan ko jet im rekkar ñõn ijo kwoj kwalok nan ie.​—Lale Jãnwõde 2005 Ar Jerbal Ñõn Ailiñ Eo, peij 8.

Armagedõn

◼ “Ñe armij rej roñ kin nan eo ‘Armagedõn,’ elõñ rej lemnok kin juõn jorran elap. Kwon ilbõk ke ñõn jela bwe ilo mol Armagedõn ej juõn menin jibarbar? [Kõtlok bwe en uak. Inem riit Reveles̃õn 16:14, 16.] Lale nan kein kin wãwen naj mour elikin Armagedõn.” Kebellok ñõn peij 82-84, im riit pãrokõrããp 21.

Baibel

◼ “Ekkã an armij ro ba bwe Baibel eo ej Nan in Anij. Ak ejime ke air naetan buk in Nan in Anij ke armij rar je? [Kõtlok bwe en uak. Inem riit 2 Piter 1:21 im pãrokõrããp 5 ilo peij 19-20.] Buk in ej kwalok uak eo an Baibel ñõn kajitõk kein.” Kwalok kajitõk ko ilo peij 6.

◼ “Ran kein, elõñlok wãwen ko armij ro remaroñ bõk melele ko jen kar mokta. Ak ilo am lemnok, ia eo jemaroñ lo nan in katak ko rekeie, ko remaroñ jibõñ kij ñõn bõk juõn mour ekamõnõnõ, im jerammõn? [Kõtlok bwe en uak. Inem riit 2 Timote 3:16, 17 im pãrokõrããp 12 ilo peij 23.] Buk in ej kemelele kin wãwen jemaroñ ilo wãwen eo ej kabuñburuen Anij im bõk tokjen.” Kwalok box eo im pija eo ilo peij 122-123.

Mij/Jerkakbiji

◼ “Elõñ rej kajitõk kin ta eo ej walok ñe juõn ej mij. Kwoj lemnok ke bwe jemaroñ jela? [Kõtlok bwe en uak. Inem riit Ekklisiastis 9:5 im pãrokõrããp 5-6 ilo peij 58-59.] Buk in ej bareinwõt kemelele kin jerkakbiji im ta kalimur eo an Baibel kin ro rar mij.” Kwalok pija eo ilo peij 75.

◼ “Ñe juõn eo im ejitenburu iber ej mij, einwõt jekõnan bar lo armij in. Kwoj errã ke? [Kõtlok bwe en uak.] Elõñ rar bõk kainemõn jen kalimur in ilo Baibel eo kin jerkakbiji. [Riit Jon 5:28, 29 im pãrokõrããp 16-17 ilo peij 71-72.] Japter in ej bar uaki kajitõk kein.” Kwalok kajitõk ko ituman ilo peij 66.

Mour Indrio

◼ “Enañin aolep rekõnan bwe ren ejmour im bwe en aitok air mour. Ak elañe ear maroñ eindrein, kwon ke kar kõnan mour ñõn indrio? [Kõtlok bwe en uak. Inem riit Reveles̃õn 21:3, 4 im pãrokõrããp 17 ilo peij 54.] Buk in ej kemelele kin wãwen jemaroñ bõk mour indrio im ewi wãwen mour ñe enaj jejit kalimur in.”

Baamle

◼ “Aolep eor air itoklimo kin juõn baamle elemõnõnõ. Kwoj errã ke? [Kõtlok bwe en uak.] Baibel eo ej kwalok juõn men im aolep ilo baamle ko remaroñ kõmõne bwe ren mõnõnõ, ej kajeoñwe Anij ilo air kwalok yokwe.” Riit Dri Epesõs 5:1, 2 im pãrokõrããp 4 ilo peij 135.

Moko

◼ “Ilo elõñ jikin ko, ebin an juõn maroñ lo jikin an ber im emõn wõnan bwe en jokwe ie. En or ke juõn ran im enaj bwe moko ñõn aolep? [Kõtlok bwe en uak. Inem riit Aiseia 65:21, 22 im pãrokõrããp 20 ilo peij 34.] Buk in ej kemelele kin wãwen an Anij naj kajejit kalimur in.”

Jeova Anij

◼ “Elõñ ro rej tõmak ilo Anij rekõnan kebaklok e. Kwar jela ke bwe Baibel eo ej kir kij bwe jen druaklok ñõn Anij? [Kõtlok bwe en uak. Inem riit Jemes 4:8a im pãrokõrããp 20 ilo peij 16.] Kar kapoje buk in bwe en jibõñ armij ro katak kin Anij, ilo air kajerbal Baibel eo air mõke.” Kwalok kajitõk ko ilo peij 8.

◼ “Elõñ armij rej jar bwe etan Anij en kwojarjar, ak en utiej. Kwo jela ke ãt eo etan? [Kõtlok bwe en uak. Inem riit Sam 83:18 im pãrokõrããp 2-3 ilo peij 195.] Buk in ej kemelele kin ta eo Baibel ej lukkun katakin kin Jeova Anij im karõk eo an ñõn armij ro.”

Jisõs Kraist

◼ “Armij ro iaolepen lõl emwij air roñ kin Jisõs Kraist. Jet rej ba bwe an buñbuñ ej joñõn wõt dri buñbuñ ro jet. Ro jet rej kabuñ ñõn e einwõt Anij Ekajur Potata. Ilo am lemnok eaurõk ke kin ta eo jej tõmak kake kin Jisõs Kraist?” [Kõtlok bwe en uak. Inem riit Jon 17:3 im pãrokõrããp 3 ilo peij  37-38.] Jitõñlok ñõn kajitõk ko rej walok iomin unin tel in japter eo.

Jar

◼ “Kwo nañin ke kar lemnok kin ewi wãwen Anij ej uaki jar ko ar? [Kõtlok bwe en uak. Inem riit 1 Jon 5:14, 15 im pãrokõrããp 16-18 ilo peij 170-172.] Japter in ej bar kemelele kin etke jen kar jar ñõn Anij im ta eo jej aikwij kõmõne bwe en eoroñ kij.”

Kabuñ

◼ “Elõñ armij rej kab kile bwe elap an kabuñ ko kõmõn biuktõk ijellokin air kamarmiri abañ ko. Ilo am lale, ejime ke an kabuñ ko tel armij? [Kõtlok bwe en uak. Inem riit Matu 7:13, 14 im pãrokõrããp 4 ilo peij 145.] Japter in ej etale jiljino men ko im rej kalikar wãwen kabuñ eo me Anij ej buñburuen kake.” Kwalok lajrõk eo ilo peij 147.

Jerata/Iñtan

◼ “Ñe ej walok jerata, elõñ rej kajitõk elañe eor an Anij kea kin armij im elañe ej lo air iñtan. Kwonañin ke kar lemnok kin men in? [Kõtlok bwe en uak. Inem riit 1 Piter 5:7 im pãrokõrããp 11 ilo peij 11-12.] Buk in ej kemelele kin wãwen an Anij naj jolok iñtan.” Kwalok kajitõk ko jen peij 106.

Tõrinae/Ainemõn

◼ “Armij ro ijoko otemjej rej kõnan lo ainemõn. Kejatrikrik in ñõn lo ainemõn ion lõl ej juõn ettõnak ke? [Kõtlok bwe en uak. Inem riit Sam 46:8, 9.] Buk in ej kemelele kin wãwen Anij enaj kajejit ankilan im bõktok ainemõn iaolepen lõl.” Kwalok pija eo ilo peij 35, im etale pãrokõrããp 17-21 ilo peij 34-36.

[Box ilo peij 5]

Wãwen ko ñõn Bõkmantak Karõk eo kin Jabawõt

“Elañe kwokõnan jabawõt jidrik kin jerbal in, Inaj mõnõnõ in bõke.”

“Meñe kimij lelok buk kein kin ejelok wõnan, elañe armij rekõnan letok jidrik jabawõt ñõn jerbal in, kimij mõnõnõ in bõke.”

“Kwomaroñ lemnok kin ewi wãwen an jerbal in maroñ wõnmanlok. Ej ikijen jibõñ ko jen ro ibelakin lõl im rej mõnõnõ in letok air jabawõt. Elañe kwokõnan letok jidrik ranin, Inaj mõnõnõ in bõke.”