Bible eo—Kein Tel Eo An Anij ñõn Armij Otemjej
1 Juõn joñan in emen billion Bible ko kar jeje ilo elõñlok jen 2,100 kajin ko, im kõmmõn bwe Nan in Anij en bellok ñõn elaplok jen 90 percent in armij ro ilo lõl in. Ak ewor juõn ñitta ilo lõl ‘ñõn air roñjake nan ko an Jehovah.” (Amos 8:11) Elõñ armij ro ewor juõn Bible ibbeir rejjab readi ak elañe jab rejjab melele kobban. Ewi wãwen jemaroñ kamakit ir ñõn kajerbal Bible eo einwõt juõn kein tel ekeie ilo mour eo air?
2 Ilo January jenaj lelok ukok in Bible eo me jaar bõk tokjen jen e iumin yiõ ko 47 rej motlok—New World Translation eo. Men in jemaroñ kõmmõne ilo ad kwalok nan ko an realikar im ekkar ñõn ran kein. (Lale book eo “All Scripture,” ilo peij 328, paragraph 6.) Jenaj kwalok kamolol eo ad elap kin men in letok in jen Jehovah ilo ad jibañ ro jet ilo kijejeto ñõn bõk Bible eo einwõt kein tel eo an Anij ñõn armij otemjej. Ijo ewor itoklimo ie, jemaroñ bareinwõt lelok jabdewõt book ko jet me ewor ilo congregation eo.
3 Kwomaroñ jino juõn ennan ilo am kajerbal tract eo “Etke Kwomaroñ Liki Bible eo.” Kwomaroñ ba:
◼ “Meñe Bible eo ej bellok ñõn 90 percent in armij ro ilo lõl in, eiet armij ekkã air readi. Ta eo kwoj lemnak ej un eo unin? Konono paragraph ko ruo jinoin ilo tract eo, im bareinwõt 2 Timothy 3:16. Lelok New World Translation eo. Elañe ej bõke, kwalok kin lãjrak in jabawot eo. Elañe ejjab kõnan bõke, kajitõk ibben ri mweo ñõn read aolepen tract eo ñe ewor an ien. Kalikar unin tel eo edik eliktata, “Drikanij kin Ran Ko Rej Itok.”
4 Ñe kwoj bar jeblak ibben armij ro kwar door tract eo “Etke Kwomaroñ Liki Bible eo,” kwomaroñ kajeoñ men in:
◼ Elikin kwoj ba kajjem, konono paragraph ko ruo eliktata ilo tract eo. Kajitõk ibben ri mweo elañe ear lemnak kin maroñ eo ñõn mour indio ion lõl. Elikin ej uak, ba: “Ri Kennan ro an Jehovah rej liki bwe aolep kanan ko jemaroñ loi ilo Bible renaj jejjet kitier, ekoba ko rej kanan kin juõn ilju eaibujuij ñõn aolep armij ro rej kajejjet aolep men in aikwij ko an Anij.” Kwalok pija eo ilo peij 13 ilo Jen Kõmmõne brochure eo, kabellok ñõn katak 5, im ba kwoj mõnõnõ in bwebwenato kin uak ko ñõn kajitõk ko rej kalãjraki, im ilo wãwen in kajutak juõn katak kin Bible.
5 Ilo territory eo ijo armij ro elap air tõmak ilo kabuñ ie, kwomaroñ kajeoñ wãwen in ilo jinoin:
◼ “Kimij rejañ kin juõn kautiej elaplok kin Bible eo. Elõñ family ko ewor juõn Bible ibbeir, ak ejeja air lale ñe rej iion abañ ko relap. Kwar kile ke men in? [Kõtlok an uak.] Bõlen rej tõmak bwe Bible eo emor. Brochure in, Ta Eo Anij Ekõnan Bwe Jen Kõmmõne?, ej letok ñõn kij men in kamol ko rebin bwe Bible eo ej jimwe im mol im ej letok mejelan ko rekeie ñõn abañ ko rej jibed armij ilo ran kein.” Kalikar jet point ko jen Katak 1 ak Katak 2 ilo brochure eo, inem lelok e.
6 Ñe kwoj bar jeblak ibben juõn eo kwar door copy in “Jen Kõmmõne” brochure eo, kwomaroñ ba:
◼ “Ke I ar itok mokta, jaar bwebwenato kin ewi wãwen Bible eo ej jibañ kamadmõd abañ ko rekabwokbwok rainin. Ro rar bõke einwõt Nan eo an Anij rar bareinwõt bõk jibañ ñõn mour ilo juõn wãwen elaplok air lo mõnõnõ im jokane. I kõnan kwalok ñõn yuk juõn ian nan in kakabilek ko rekeie ilo Bible me brochure eo iar door ibbõm ej kamelele kake.” Bwebwenato kin juõn ian nan in kakabilek ko ilo Jeje ko me jemaroñ loe ilo Katak 10. Elañe ej kwalok an itoklimo, tilmaake juõn katak kin Bible. Kwalok bareinwõt bwe ewor New World Translation eo ñõn ro ewor air itoklimo emol kin Bible eo.
7 Ennan in tok emaroñ kaitoklimoen ro reritto:
◼ “Kar wor juõn ien ke Bible eo rar konono kake ilo enañin aolep moko im family ko rar mour ekkar ñõn nan in kakabilek ko iloan. Kar eindein ke ilo family eo am? Rainin, einwõt elõñ elap air mad ñõn air maroñ bõk ien ñõn konono Bible ak rej eñjake bwe nan in kakabilek ko kin mour erreo rej mantin etto. Chapter 5 ilo book in, Kwo Maroñ Mour Indio ilo Paradise ion Lõl, ej kwalok un ko ewor men in kamol ko ie kin etke Bible eo ej tellokin ad etale. Elañe kwo kõnan konono kin ewi wãwen kajur eo an Nan in Anij emaroñ jibañ kij, I naj mõnõnõ in door book in ibbõm.”
8 Ilo ien bar jeblak, kwomaroñ ba:
◼ “Ke iar konono ibbõm mokta, jaar errã bwe jukjuk im bed in rainin ej kajekdon nan in kakabilek ko ilo Bible kin mour erreo. Kajekdon in ej aikwij ke jelet kij? [Kõtlok an uak.] Jesus Christ ear kautiej aorõkin bõk jelalokjen.” Konono John 17:3. Inem kwalok point ko jen paragraph 1 im 2 ilo Chapter 5 ilo book eo Mour Indio. Kamelele kin lãjrak in katak Bible eo ilo ejelok wõnãn, im ba bwe kwoj mõnõnõ in kwalok kilen ilo ien eo wõt.
9 Jar bwe Jehovah en kajerammõn aolep jibadbad ko am ñõn kareilok armij ñõn Bible eo—kein tel eo an Anij ñõn armij otemjej.