“Komin Kõmõn Men in ilo Ememej Iõ”
1 Armij ekkã air kõtlok bwe aorõkin men ko ren mejkunlok ñe ej motlok ien. Men in ej juõn unin, ke ear kajutak “kejota an Iroij,” Jesus ear kakien ri kalor ro an: “Komin kõmõn men in ilo ememej iõ.” Jen ien eo, ilo ejja ran eo Jesus ear mij, Christian ro ilo bokake rar wõnmanlok in “kwalok mij an Iroij ñõn ien eo Ej itok.”—1 Kor. 11:20, 23-26.
2 Ejjabto jen kiõ, Jesus enaj bõk ñõn jikin eo ilõñ ro eliktata ian “bwij erik” eo ej ietlok. (Luke 12:32; John 14:2, 3) Ilo yiõ in bwen ri kabit ro ibben jar eo ej laplok wõt in “sheep ro jet” renaj bar bõk jerammõn eo ñõn kememe Kijota eo an Iroij, ilo April 11. (John 10:16; Rev. 7:9, 10) Kamolol kin yokwe eo elap an Anij ilo an kar jilkintok Nejin eo ear keutake ñõn tokjen eo an armij naj kajurlok. Renaj kwalok kin joñok eo an Jesus, yokwe eo an, tiljek eo an ñõn mij ilo an lelok wõnãn binmour eo, im an iroij kiõ einwõt King ilo Ailiñ eo an Anij emwij an jutak, im bareinwõt kin jerammõn ko me Ailiñ eo enaj bõktoki ñõn armij. Emol ej juõn ien in ememej!
3 Kebojak Kiõ: Jen aolep jerbal ñõn kõmmõn bwe ien Kwojkwoj in Kijota in en juõn kin elap lõñliñ im kamolol ñõn kij make im ñõn aolep ro renaj koba ibbed. Jemaroñ keboj burued ilo ad bar konono bwebwenato ko ilo Bible kin ran ko eliktata in jerbal eo an Jesus im men ko rar tellok ñõn mij eo an. Ilo katak in family ko ad mokta jen Kwojkwoj in Kijota eo jemaroñ elij katak 26-27 ilo book in Matthew.
4 Jete armij kwo jela remaroñ itok ñõn Kwojkwoj in Kijota eo elañe kwoj bõk ien ñõn kakajurlok kamolol eo air kin ien in, kirtok ir, im karuwaineneik ir? Kõmmõn juõn lãjrak kiõ, im kõmmõn joñan wõt am maroñ ñõn jibañ ir ñõn itok. Tokelik, jibañ ir ñõn eddeklok wõt ilo jitõb ilo am rejañ ir ñõn keini air bed ilo kwelok ko.
5 Ilo ien Kwojkwoj in Kijota eo, karõk ko rejej uair rej kõmmõni ñõn kalaplok ien ko remõn ñõn kwalok nan ñõn aolep. Kin juõn schedule emõn, kwomaroñ ke auxiliary pioneer ilo April? ilo May? Juõn ian wãwen ko remõntata ñõn kwalok bwe jej kememej ilo kamolol aolep men ko katok eo an Jesus ej melelen ñõn kij ej ñõn konono kin Anij eo ad, Jehovah, im kin jerammõn ko me iroij in Ailiñ eo ikijen Nejin enaj bõktoki.—Sam 79:13; 147:1.