Box In Kajitõk

◼ Ewi wãwen jemaroñ kõmman bwe kajjojo mõttan ko ilo kwelok ko an congregation eo ren kwaloki iloan wõt awa eo kar karõke?

Emõkaj an motlok ien ñe jej kwalok juõn men emõn ñan ro jerad. Kin un in, emaroñ juõn aitwerõk elap ñan kwalok mõttan ko ilo kwelok eo iloan wõt awa eo kar karõke. Ta eo emaroñ jibañ?

Jino ilo ien eo ejejjet. Ñe aolepen congregation eo ej kwelok, emaroñ juõn men in jibañ ñe rej kejelãik ri kwelok ro juõn ak ruo minute ko mokta jen an jino program eo ñan jijet bwe kwelok eo en maroñ jinoe ilo juõn wãwen ekwon im ilo ien eo kar karõke. (Ekkl. 3:1) Kwelok ko me rej kitibuj kumi ko rediklok, einwõt kwelok ko ñan kwalok nan, ren jab karumijloke ñan kõttar ro rerumij tok.

En let am kebojak. Juõn key ñan kajejjet ien ej ñan kebojak lok iman. En alikar am lemnak kin unin katak eo. Kwalok kin point ko relap, im kõmman bwe ren alikar. Bõprae bwe kamelele ko ediklok aorõkiir ren jab kamad yuk. En lamwan wãwen am kwaloke katak eo. Elañe katak eo ekoba demonstration ak interview ko, kamelmeli lok iman. Ilo joñan wõt am maroñ, time i katak eo am ke kwoj kamelmele ilo juõn ainikien emõn roñjake.

Ajeje katak eo am. Elañe kunam ej juõn katak ak bwebwenato ibben ri kwelok ro, kwomaroñ lo bwe ej juõn men in jibañ elañe kwoj ajeje ilo jet mõttan ko. Bebe kin aetokin ien eo kwomaroñ kajerbale ñan kajjojo mõttan, im kalikar men in itõrerein note ko am. Inem lale aetokin ien eo am ñe kwoj kwalok katak eo. Ñe kwoj bwebwenato ibben ri kwelok ro, bõprae aujid eo ñan am bõk elõñ uak ko ilo mõttan eo jinoin im kwoj aikwij kakaiuriur kake mõttan ko elaplok air aorõk me renaj walok tokelik. Ro rej tel Katak in Imõniaroñroñ ren karõk bwen ien eo ñan etale box in elij eo ilo jemlokin katak eo. Ren bareinwõt kejbãrok bwe ren jab kajerbal ien eo kar karõke ñan al in kajemlok eo im jar.

Kajemlok ilo ien eo ejejjet. Elañe juõn kwelok ej ejaak in elõñ mõttan ko, einwõt Service Meeting eo, kajjojo ri kwalok katak ro ren jelã kin ñããt eo mõttan eo an ej jinoe im jemlok. Ta eo jemaroñ kõmmane elañe kwelok eo enaj le jen awa eo? Juõn ak elõñlok brother ro remaroñ kõmman ien ilo air kwalok point ko relap wõt im kadiklok air konono kin kamelele ko ediklok aorõkiir, im ilo wãwen in kakadulok katak eo air. Maroñ eo ñan kõmman men in ej juõn kakõllan juõn ri kaki ekabel.

Einwõt ri kwelok ro, jemaroñ jibañ brother eo ej tel ilo ad kõmman bwe uak ko ad ren kadu im jejjet. Ilo wãwen in, kij aolep maroñ wõr kunad ñan kwelok ko rej walok ilo “ekar im ilo lajrõk.”​—1 Kor. 14:40.