Kortokjen Ien ko Am ilo Jerbal in Kwalok Nan
1 Emol bwe elukkun lap ñan ad kõtõbrak jerbal in kwalok nan in ad, im ien ekadu. (Jon 4:35; 1 Kor. 7:29) An jejjet karõk ko ad kin jerbal in im ilo ad kõmmani lok iman, jenaj maroñ kortokjen ien ko emwij ad kar karõki kin jerbal in kwalok nan.
2 Kwon Bojak: Mokta jen am etal ñan kwelok in kwalok nan, kanuij lale bwe en wõr am book ko kwonaj aikwiji im keboje ennan eo am. Elikin wõt kajemlok kwelok in kwalok nan eo kin jar, kajju im etal im kwalok nan. Men in enaj kamaroñ yuk im ro rej jerbal ibbam ñan kõtõbrak joñan wõt ami maroñ ilo ien eo ebellok kin jerbal in kwalok nan.
3 Elañe kar jitõñ yuk ñan tel kwelok in kwalok nan, kwon kajejjet ien. En jab to—en jab le jen 10 ñan 15 minute. Mokta jen an kumi eo etal, kajjojo iair ej aikwij jelã wõn eo ej jerbal ibben im ia eo renaj jerbal ie.
4 Ilo Ien eo Kwoj Kwalok Nan: Ñe emwij kwelok in kwalok nan, jab aibedbed, ak kwon bojak in kajju etal ñan territory eo. Elañe kwoj lemnak bwe enaj mõkaj am rol jen jerbal in kwalok nan, bõlen kwomaroñ make kabuk ialam, ilo wãwen in ro jet ilo kumi eo am rejjab aikwij mõkaj air rol. Ñe kwoj jerbal ibben juõn kumi, kwon lemnak kake ro jet me rej kõttar am kamwij bwebwenato eo am. Men in ej kitibuj ad illok jen armij eo me ekõnan kõbauwe ak am kõmman karõk ñan bar jeblak juõn ien ñan ibben eo ej kwalok an itoklimo.—Mat. 10:11.
5 Ñe kwoj bar jeblak ibben armij ro, kwomaroñ bõprae am etal wan ikijen am jeblak ibben ro me rej bed ilo juõn wõt jikin mokta inem etal ñan bar juõn jikin. Emaroñ ekkar bwe kwon telephone ñan jet ian rein ñan lale elañe rebed moko imwiir. (Ken. 21:5) Elañe kwoj lemnak bwe enaj aetok am bed, ro jet ilo kumi eo am remaroñ kwalok ilo ijoko rebak ak kõmman bar jeblak.
6 Jej mour ilo ien eo elap jonikõn ilo jitõb. (Mat. 9:37, 38) Mõttan jidik enaj jemlok jerbal in. Kin men in, kõnan eo ad ej aikwij ñan kortokjen ien ko ad ñe jej kwalok nan.