Kwõ Pojak Ke Ñe Enaaj Wal̦o̦k Juon Idiñ?
Juon iien, emaroñ wal̦o̦k juon men ilo idiñ im kõm̦m̦an bwe mour im ãjmour eo am̦ en pãd ilo kauwõtata. (Jem. 4:14) Kõn men in, juon eo elol̦o̦kjen̦ enaaj kapojakl̦o̦k im̦aan bwe en jel̦ã ta ko enaaj kõm̦m̦ani ñe enaaj wal̦o̦k men in. (JK. 22:3) Em̦õj ke am̦ pepe kadede im kanne peba in bõtõktõk eo kõn ta kilen taktõ ko kwõnaaj bõki? Doulul in ear kõm̦m̦ane juon pija (Transfusion-Alternatives—Documentary Series) ñan jipañ eok kõm̦m̦ane pepe in. Jouj im alwõje part eo kein karuo (Transfusion-Alternative Health Care—Meeting Patient Needs and Rights) ilo pija in me ej kwal̦o̦k kõn kilen taktõ ko jet me rejjab lewõj bõtõktõk ñan kwe. Ilo am̦ naaj alwõje pija in, jouj im lale el̦aññe kwõmaroñ uwaaki kajjitõk ko ilal̦. Kõnke ewõr jikin ko ilo pija in im ej wal̦o̦k an ri nañinmej ro m̦wijm̦wij ilo aujpitõl̦, rũtto ro ren kããlõt ta ko rekkar ñan an ajri ro nejier alwõji ilo pija in.
(1) Etke jet taktõ im nõõj ro rej ukot l̦õmn̦ak ko aer kõn lel̦o̦k bõtõktõk ilo eke? (2) Kwal̦o̦k jilu waanjoñak ko kõn m̦wijm̦wij ko rel̦l̦ap im taktõ ro rar kõm̦m̦ani ilo aer kar jab kõjerbal bõtõktõk. (3) Jete taktõ ro ipel̦aakin lal̦ in rar kalikkar aer m̦õn̦õn̦õ in kõm̦adm̦õde ri nañinmej ro ilo aer jab kõjerbal bõtõktõk? Etke rem̦õn̦õn̦õ in kõm̦m̦ane men in? (4) Ta eo aujpitõl̦ ko em̦õj aer loi kiiõ ilo aer bar etale wãween aer kõjerbal bõtõktõk? (5) Ta kauwõtata ko rej wal̦o̦k jãn aer lel̦o̦k bõtõktõk ilo eke? (6) Ta eo elõñ taktõ ro rej ba kõn men ko rem̦m̦an rej wal̦o̦k jãn kilen kõm̦adm̦õd ko jet me ri nañinmej eo ejjab aikuj bõk bõtõktõk? (7) Ta eo ej kõm̦m̦an an jabwe red cell (anemia) ilo bõtõktõk? Ta ko remaroñ jipañ juon ri nañinmej eo ejabwe an red cell? (8) Ewi wãween taktõ ro remaroñ kõm̦m̦an bwe en lõñl̦o̦k red cell ippãn ri nañinmej eo? (9) Ta kilen kõm̦adm̦õd ko taktõ ro rej kõjerbali bwe en dikl̦o̦k an to̦o̦rl̦o̦k bõtõktõkin ri nañinmej eo ilo iien m̦wijm̦wij? (10) Kõm̦adm̦õd ko jet me rejjab lel̦o̦k bõtõktõk remaroñ ke jipañ ajri ro im ro me ej wal̦o̦k jorrããn ko ilo idiñ ñan er? (11) Ta juon iaan men ko raorõk im taktõ ro rej l̦oori ak etali ilo aer kõm̦adm̦õde ri nañinmej ro?
Kõnke ejjel̦o̦k kien n̦ae jet iaan kõm̦adm̦õd ko kar kwal̦o̦ki ilo pija in, juon Kũrjin ej aikuj make pepe ekkar ñan men eo ej l̦õmn̦ak bwe ejim̦we. Jab kõttar an wal̦o̦k juon men ilo idiñ innem l̦ak m̦õj pepe kõn kilen kõm̦adm̦õd ko kokõn̦aan im ko kwõjjab kõn̦aan. Jouj im lale Ad Jerbal ñan Aelõñ Eo an Nobõm̦ba 2006 ñan bõk mel̦el̦e ko jet. Ãlikin, el̦aññe kwõj juon eo em̦õj an peptaij, jouj im kanne peba in bõtõktõk eo (DPA) im je pepe ko im kõn̦aan ko am̦. Peba in ej aikuj pãd ippam̦ aolep iien.
[Naan ko ilo peij 3]
Em̦õj ke am̦ pepe kadede im kanne peba in bõtõktõk eo kõn ta kilen taktõ ko kwõnaaj bõki?