Ta Eo Jehovah Ekõnan Jen Kij?

“Ta eo Jehovah ekõnan jen kwe bwe kwon ekajet ilo jimwe im kaorõk joij im etetal ilo inemõn ibben am Anij?”​—MICAH 6:8 NW.

1, 2. Etke jet ri karejar ro an Jehovah rej ebwer, ak ta eo emaroñ jibañ ir?

VERA ej juõn Ri Christian etiljek im ej 75 an yiõ im juõn ri nañinmij. “Jet ien,” ej ba, “Ij reilok ñan nabõj jen window eo im lo Ri Christian ro jeiõ im jatiõ rej kwalok nan jen em ñan em. Ij jañ kinke ikõnan bed ibbeir, ak nañinmij eo aõ ej kadiklok jerbal eo aõ ñan Jehovah.”

² Enañin kar eindein ke eñjake eo am? Emol, aolep ro rej yokwe Jehovah rej etetal ilo etan im jerbali kien ko an. Ak, ta elañe jej nañinmij, rittolok, ak ewõr eddo ko an family eo? Jemaroñ ebwer kinke men kein rej bõpraik kij jen ad kõmman men otemjej jekõnan ilo jerbal eo an Anij. Elañe ej eindein ibbed, jenaj lo mõnõnõ ilo ad etale Micah chapter 6 im 7. Chapter kein rej kwalok bwe kien ko an Jehovah rejjab bin im jemaroñ tõbari.

Ewi Wãwen Anij Ej Jerbal Ibben Armij ro An

3. Ewi lemnak eo an Jehovah kin Ri Israel ro rejumae?

³ Jen etale mokta Micah 6:​3-5 (NW), im lale ewi wãwen Jehovah ej jerbal ibben armij ro an. Kememej bwe ilo ran ko an Micah Ri Israel ro rar jumae. Meñe eindein, ilo tiriamo Jehovah ej konono ñan ir ilo nan kein, “O armij ro aõ.” Ej akwelap ñan ir: “O armij ro aõ, joij im kememej.” Jen an narueir ilo illulu, ej kate wõt im tõbar burueir ilo an kajitõk, “ta eo I ar kõmmane ñan kom?” Bareinwõt ej rejañ ir bwe ren “naruõn.”

4. Ilo wãwen et eo joñok eo an Anij kin tiriamo en kar jelet kij?

⁴ Anij ear likit juõn joñok emõn ñan kij aolep! Ilo an tiriamokake kij ear naetan Ri Israel im Judah ro rejumae einwõt “armij ro aõ” im ba “joij” ñan ir bareinwõt. Inem, jej aikwij kwalok tiriamo im joij ñe jej jerbal ibben ro rej bed ilo congregation eo. Emol, jet iair emaroñ bin ad jerbal ibbeir, ak remaroñ mõjno ilo jitõb. Bõtab, elañe jej yokwe Jehovah, jekõnan jibañ ir im tiriamokake ir.

5. Ta katak ko relap jej loi ilo Micah 6:​6, 7 (NW)?

⁵ Kiõ, joij im ãliklok ñan Micah 6:​6, 7 (NW). Micah ear jomantak elõñ kajitõk ko, im ba: “Kin ta eo Ij aikwij jelmae Jehovah? Kin ta eo Ij aikwij jillok iman Anij eo eutiej? Inaj bõklok ke men in katok ko, kon in cow ko juõn yiõ dettair? Jehovah enaj buñburuen ke kin elõñ thousand sheep koman ko, ak kin bwijin oil? Inaj lelok ke manje eo nejiõ bwe en men in katok kin jerawiwi ko aõ?” Jaab, ejjab maroñ kabuñburuen Jehovah kin “elõñ thousand sheep koman ko, ak kin bwijin oil.” Ak ewõr juõn men ej buñburuen kake. Ta eo?

Jej Aikwij Jerbale Ekajet Jimwe

6. Ta men in aikwij ko jilu jej loi ilo Micah 6:​8 (NW)?

⁶ Ilo Micah 6:8 (NW), jej katak kin ta eo Jehovah ekõnan jen kij. Micah ej kajitõk: “O armij in lal, ear jiroñ yuk kin ta eo emõn. Im ta eo Jehovah ekõnan jen kwe bwe kwon ekajet ilo jimwe im kaorõk joij im etetal ilo inemõn ibben am Anij?” Men in aikwij kein jilu rej kitibuji wãwen ad eñjake, lemnak, im jerbal. Jej aikwij kõnan kwalok kadkad kein, lemnak kin ewi wãwen ad maroñ kwaloki, inem kwaloki. Jen etale men in aikwij kein jilu juõn kin juõn.

7, 8. (a) Ta melelen “ekajet ilo jimwe”? (b) Ta manit ko rejjab jimwe rar jededlok ilo ran ko an Micah?

⁷ “Ekajet ilo jimwe” ej melelen kõmmane men eo ejimwe. Wãwen an Anij kõmmani men ko ej bedbed eo ñan ekajet ilo jimwe. Bõtab, armij ro ilo ran ko an Micah, rar jab jerbale ekajet jimwe ak rar ekajet ilo jab jimwe. Ilo wãwen et ko? Lale Micah 6:​10 (NW). Ilo tujemlokin eon eo, ear kalikar bwe ri wia ro rar kajerbal “kein joñok ko rebwid,” jen ba, ko idiki wõt. 11 eon ej ba bareinwõt bwe rej kajerbal “juõn ieb in dekã einwõt kein paun ko rebwid.” Im ekkar ñan 12 eon, “lo ko loir rej jelã mon.” Inem, kein joñok ko rejjab jejjet, kein paun ko rebwid, im nan ko reriap rar jededlok ibelakin lal eo ilo ran ko an Micah.

⁸ Manit kein rejjab jimwe rar jab kõmmani ilo jikin wia ko wõt. Rar kõmmani ilo imõn ekajet ko bareinwõt. Micah 7:3 (NW), ej kalikar bwe “bwirõk eo ej kajitõk kin juõn men, im eo ej ekajete armij ej kõmman eindein bwe en bõk wõnãn.” Rar wiaik buruen ri ekajet ro bwe ren ekajete armij ro ejelok rueir. “Eo eutiej,” ak ri ailiñ eo ebuñbuñ, ej bõk kunan ilo kõtõrãi kien. Emol, Micah ej ba bwe bwirõk eo, ri ekajet eo, im eo eutiej aolep rej “burueir wõt juõn” ilo air kõmman men ko renana.

9. Ewi wãwen manit ko rejjab jimwe an ri nana ro rar jelet Judah im Israel?

⁹ Manit ko renana ri tel ro renana rar kõmmani rej jelet aolepen Judah im Israel. Micah 7:5 (NW) ej kalikar bwe kin an ejelok ekajet jimwe men in ej tellok ñan jab liki ikõtan ro rej jeran don, im ri belele ro bareinwõt. Ilo 6 eon ej kalikar bwe men in ear tellok ñan juõn wãwen bwe ro rej nukin don einwõt ladik ro im jemeir, ledik ro im jineir, rej dike don.

10. Ilo ran kein eobrak kin ekajet jab jimwe, ewi wãwen an Ri Christian ro jerbal?

¹⁰ Ta kin ran kein? Jejjab lo ke ejja wãwen kein? Einwõt Micah, wãwen ko einwõt jab ekajet jimwe, juõn jitõbõn jab liki don, im erup kõtan eo ikõtan armij ro im mour in family eo rej bed ibelakid. Ak, einwõt ri karejar ro an Anij rej bed ibwiljin juõn lal ejjab wãnik, jen jab kõtlok bwe jitõb in lal in ikijen manit kein rejjab jimwe ren jab deloñtok iloan congregation eo an Christian. Jen men in, jej kate wõt kij ñan jurake kadkad ko einwõt mol im tiljek, im kwaloki ilo aolep wãwen mour eo ad ien otemjej. Emol, jej kate wõt bwe kõmman ko ad ren “jime ilo men ko otemjej.” (Dri Hibru 13:18) Kwojjab errã ke bwe ilo ad jerbale ekajet jimwe jej bõk elap jerammõn ko rej jen juõn jimjera eo ej kalikar liki eo emol?

Ewi Wãwen Armij ro Rej Roñjake “Ainikien Jehovah”?

11. Ewi wãwen Micah 7:​12 (NW) ej jejjet kitien?

¹¹ Micah ej kanan bwe meñe ewõr wãwen ko rejjab jimwe, ekajet jimwe enaj tõbar elõñ kain armij ro. Ri kanan eo ej kanan bwe armij ro renaj kwelok ibben don jen “im jen lometo ñan lometo, im jen tol ñan tol” bwe ren erom ri kabuñ ro an Jehovah. (Micah 7:​12, NW) Ran kein, ilo jejjet in jemlokin kanan in, ejjab juõn wõt ailiñ, ak armij ro kajjojo ilo ailiñ otemjej rej bõk tokjen jen ekajet jimwe eo an Anij. (Aiseia 42:1) Ewi wãwen men in ej wõnmanlok in jejjet kitien?

12. Ewi wãwen ad roñjake “ainikien Jehovah” ilo ran kein?

¹² Ñan bõk juõn uak, lale tujinoin nan ko an Micah. Micah 6:9 ej ba: “Ainikien Jehovah ej kir jikin kwelok eo, im armij eo emeletlet enaj mijak etõm.” Ewi wãwen an armij ro ilo ailiñ ko otemjej eoroñ ainikien Jehovah,” im ewi wãwen ej ekkeijaklok ñan ad jerbale ekajet jimwe? Emol, armij ro ran kein rejjab lukkun roñ ainikien Anij. Bõtab, ikijen jerbal in kwalok nan eo ad ibelakin lal, armij ro kajjojo jen kil im ailiñ ko otemjej rej roñjake ainikien Jehovah. Tokjen men in, ro rej roñjake rej ‘mijake etan Anij,’ im kautiej e. Emol bwe jej jerbal ilo juõn wãwen e jimwe im yokwe ilo ad jerbal einwõt ri keañ ro rekijejeto an Ailiñ eo. Ilo ad kwalok etan Anij ilo ejelok kalijeklok, jej “jerbale ekajet jimwe.”

Jej Aikwij Yokwe ilo Tiljek

13. Ta oktak eo ikõtan yokwe ilo tiljek im yokwe?

¹³ Kiõ, jen bwebwenato kin men in aikwij eo kein ka ruo ilo Micah 6:8 (NW). Jehovah ej kakien kij bwe jen “kaorõk joij.” Nan in Hibru eo ej melelen “joij,” ej bareinwõt melelen “yokwe ilo tiljek,” ak “yokwe etiljek.” Yokwe ilo tiljek ej juõn kadkad jej kwalok ilo alikar ibben ro jet, juõn lemnak in tiriamokake kin ir. Ekijkan? Yokwe ej juõn nan im elõñ melele ko melelen, juõn nan emaroñ jerbal ñan men ko rejjab mour im lemnak ko. Ñan wanjoñok, Bible eo ej konono kin juõn armij eo ej “yokwe lõl ak men ko ilo lõl” im kin juõn emaan ej “yokwe meletlet.” (Jabõn Kennan Ko 29:3; 1 Jon 2:15) Ak, tiljek ilo yokwe ej jerbal ñan armij ien otemjej, elaptata ñan ro rej jerbal ñan Anij. Inem Micah 7:​20 (NW) ej konono kin yokwe ilo tiljek eo Abraham ear bõke”​—juõn emaan eo ear karejar ñan Jehovah Anij.

14, 15. Ewi wãwen ad kwalok yokwe ilo tiljek, im ta kamelele ko jej loi kin kadkad in?

¹⁴ Ekkar ñan Micah 7:​18 (NW), ri kanan eo ej ba bwe Anij “ej mõnõnõ kin yokwe ilo tiljek.” Ilo Micah 6:8 (NW), ej jiroñ kij bwe jen jab kwalok yokwe ilo tiljek wõt ak jej aikwij lukkun kaorõk kadkad in bareinwõt. Ta tokjen ko jej bõk jen jeje kein ilo Bible? Jej mõnõnõ in kwalok yokwe ilo tiljek ejelok joñan kinke jekõnan kwalok e. Einwõt Jehovah, jej lo mõnõnõ, in kwalok yokwe ilo tiljek ñan ro rej aikwiji.

¹⁵ Ran kein, kadkadin yokwe ilo tiljek ej kakõllan armij ro an Anij. Lale juõn wanjoñok. Ilo June 2001, juõn lañ ear kõmman juõn ibwijleplep ilo Texas, U.S.A., im ear kajorrãn elõñ thousand em, ekoba elõñ buki moko imõn Ri Kennan ro an Jehovah. Ñan jibañ ro jeiir im jatiir enañin 10,000 Ri Kennan ro rar mõnõnõ in lelok ien im kajur ko air kin ejelok wõnãn ñan jibañ ir. Iumin elõñlok jen jimettan yiõ, rar kamaat air maroñ ñan jerbal, ilo ran im boñ, Saturday im Sunday ñan kõkãle 8 Kingdom Hall ko im elõñlok jen 700 moko imõn Ri Christian ro mõttair. Ro rar jab maroñ kõmman kain jerbal rot in rar jabawõt kin mõñã, men in aikwij ko, im money. Etke elõñ thousand Ri Kennan rein rar jibañ ro jeiir im jatiir ilo tõmak? Kinke rej “yokwe ilo tiljek.” Im men in elap an kõmãnãn buruõd ñan jelã bwe kain jerbal rot kein rej bedbed ion yokwe eo etiljek ro jeid im jatid rej kwaloke ibelakin lal! Aet, kwalok “yokwe ilo tiljek,” ejjab juõn eddo, ak ej juõn men in kalañliñ!

Etetal ilo Inemõn Ibben Anij

16. Ta wanjoñok eo ej kalikar aikwij eo ñan etetal ilo inemõn ibben Anij?

¹⁶ Men in aikwij eo kein ka jilu jej loe ilo Micah 6:8 (NW) ej “etetal ilo inemõn ibben am Anij.” Melelen men in bwe jen kile joñan maroñ ko ad im atartar ion Anij. Ñan wanjoñok: Baj pijaik ilo lemnak eo am juõn ledik ej jibwe pein jemen ke erro ej etetal ilo juõn lañ. Ledik eo ej jelã bwe ejjab kanuij kajur, ak ej liki wõt jemen. Kij bareinwõt jejelã joñan maroñ ko ad ak jej liki Jemedwõj ilañ. Ewi wãwen ad maroñ kõmman bwe jen jab luji liki in? Juõn wãwen ej ilo ad kememej bwe bed ebak ñan Anij ej juõn wãwen emeletlet. Micah ej kakememej kij kin jilu un ko: Jehovah ej Ri Lomor, Ri Tel, im Ri Kejbãrok eo ad.

17. Ewi wãwen an kar Jehovah lomoren, tel, im kejbãrok armij ro an ilo ien ko etto?

¹⁷ Ekkar ñan Micah 6:​4, 5 (NW), Anij ej ba: “I ar ãñintok kom jen enen Egypt.” Aet, Jehovah ear Ri Lomor eo an Israel. Bareinwõt Jehovah ej ba: “I ar jilkinwõj Moses, Aaron im Miriam.” Ear kajerbal Moses im Aaron ñan tel ailiñ eo, im Miriam ear tel Ri Israel limaro ilo juõn eb in anjo. (Exodus 7:​1, 2; 15:​1, 19-​21; Duteronomi 34:10) Jehovah ear kajerbal ri karejar ro an ñan tel ir. Ilo 5 eon, Jehovah ej kakememej ailiñ in Israel bwe ear kejbãrok e jen Balak im Balaam im bwe ear kejbãrok Ri Israel ro ilo tujemlokin ien air itoitak jen Shittim in Moab ñan Gilgal ilo Enen Kallimur.

18. Ewi wãwen an Anij jerbal einwõt Ri Lomor, Ri tel, im Ri Kejbãrok eo ar ilo ran kein?

¹⁸ Ñe jej etetal ibben Anij, ej kanemkwoj kij jen lal eo an Satan, ej tel kij ikijen Nan im dolul eo an, im ej kejbãrok kij einwõt juõn jar in armij ñe ri jumae ro rej nitbwili kij. Inem ebwe un ko unin ad aikwij jibwe pein Jemed ilañ ñe jej etetal ibben itujemlokin itoitak eo ad ñan juõn men elaplok jen Enen Kallimur eo etto​—lal eo ekãl im wãnik an Anij.

19. Ilo wãwen et eo inemõn ej ekkeijaklok ñan maroñ ko ad?

¹⁹ Etetal ilo inemõn ibben Anij ej jibañ kij bõk juõn lemnak ejimwe kin wãwen ko ad. Emol men in kinke ñe jej kwalok inemõn ej kitibuj ad kile ewi joñan maroñ ko ad. Bwijwõlã ak mour eo ad ej nanalok wõt remaroñ kadiklok men ko jemaroñ kõmmani ilo jerbal eo ad ñan Jehovah. Bõtab, jen ad kõtlok bwe men kein ren kabwer kij, emõn bwe jen kememej bwe Anij ej buñburuen kin jabdewõt men in jortak ko ‘ekar ñõn men ko iben armij, jab ñõn men ko ejelok ibbeir.’ (2 Dri Korint 8:​12) Emol, Jehovah ekõnan bwe jen kabuñ ñan e kin aolepen ad, im kõmman jabdewõt men ekkar ñan maroñ im kajur ko ad. (Dri Kolosse 3:​23) Ñe jej kate wõt kij im kõmman aolep men ko ilo kijejeto joñan wõt ad maroñ, Anij enaj kajerammõn kij ñan juõn joñan elap.​—Jabõn Kennan Ko 10:22.

Meanwõd Ej Bõktok Jerammõn

20. Ad jelã kin ta men eo emaroñ jibañ kij ñan kwalok juõn lemnak in kõttar einwõt Micah?

²⁰ Ñe jej lo kajerammõn eo an Jehovah ej lujur kij ñan kajeoñe jitõb eo an Micah. Ej ba: “Inaj kõttar kin Anij in lomor eo aõ.” (Micah 7:7 NW) Ewi wãwen nan kein rej jelet ad etetal ilo inemõn ibben Anij? Ñe jej meanwõd, ej kejbãrok kij jen ad ebwer kinke ran eo an Jehovah ejañin tok. (Jabõn Kennan Ko 13:12) Emol, kij aolep jej kijoror kin ien jemlokin lal in enana. Bõtab, ilo week otemjej elõñ thousand armij ro rej jino etetal ibben Anij. Ilo ad jelã kin men in en kamakit kij ñan kwalok juõn jitõb in kõttar ak meanwõd. Kin men in juõn eo etto an bed einwõt Ri Kennan ear ba: “Lak reiliklok iumin elõñlok jen 55 yiõ ko ilo jerbal in kwalok nan, Ij lukkun tõmak bwe Iar jab luji jabdewõt men kin aõ kõttar Jehovah. Jen men in, Iar rõlok jen elõñ utame ko.” Kwonañin ke lo kain ien rot kein?

21, 22. Ewi wãwen Micah 7:​14 (NW) ej jejjet kitien ilo ran kein ad?

²¹ Ejelok bere bwe etetal ibben Jehovah ej kajerammõn kij. Ñe jej konono Micah 7:​14 (NW), Micah ej keidi armij ro an Anij ibben men in mour sheep ko rej bed ilo jokane ibben shepherd eo air. Ilo juõn ien elaplok an kanan in jejjet kitien ilo ran kein, bwen Israel eo ilo jitõb im “sheep ro jet” rej jokane ibben Shepherd eo air elap air liki, eo ej Jehovah. Rej make iair “ibulen wijki”​—ibwiljin juõn jikin melan grape,” jebel ilo jitõb jen lal in eo ej laplok wõt ilo abañ im kauwatata.​—Jon 10:16; Duteronomi 33:28; Jeremiah 49:​31, NW; Dri Galetia 6:​16.

²² Armij ro an Jehovah rej mweie, einwõt an Micah 7:​14 (NW) kar kanan kake bareinwõt. Ilo an konono kin sheep ak armij ro an Anij, Micah ear ba: “Ren mõñã ilo melaj in Bashan im Gilead.” Einwõt ñe sheep ilo Bashan im Gilead rar mõñã ilo melaj ko ijo im kileplok, eindein armij ro an Anij ran kein rej lañliñ ilo air mweie ilo jitõb​—eñin bar juõn jerammõn ñan ro rej etetal ilo inemõn ibben Anij.​—Bwinbwin 32:1; Duteronomi 32:14.

23. Ta tokjen eo jemaroñ bõk jen Micah 7:​18, 19 (NW)?

²³ Ilo Micah 7:​18, 19 (NW), ri kanan eo ej kalikar bwe Jehovah ekõnan jeorlok bwid ko an ro rej ukwelok. Ilo 18 eon ej ba bwe Jehovah ej “jolok bwid ko.” Ekkar ñan 19 eon, enaj “jolok bwid ko air ibulõn lojet.” Ta tokjen eo jemaroñ bõk jen katak in? Jemaroñ kajitõk ibbed make elañe jej kajeoñe Jehovah ilo men in. Jej jolok ke bwid ko an armij ro rej bwid nae kij? Ñe armij rein rej ukwelok im bukõt kilen kajimwe bwid ko air, jekõnan kajeoñe Jehovah im ilo mõnõnõ jolok ilo likieo bwid ko air ñan indio.

24. Ewi wãwen kwar bõk tokjen jen kanan eo an Micah?

²⁴ Ewi wãwen ad bõk tokjen jen ad etale nan in kanan eo an Micah? Ear kakememej kij bwe Jehovah ej letok kejatdikdik eo emol ñan ro rej ruaklok ñan e. (Micah 2:​1-​13, NW) Ear rejañ kij bwe jen kamaat ad maroñ ñan kowõnmanlok kabuñ eo emol im etetal ilo etan Anij ñan indio. (Micah 4:​1-5, NW) Im ear kallimuri kij bwe jekdon ta wãwen ko ad, jemaroñ kõtõbar men ko Jehovah ej ba jej aikwij kõmmani. Aet, kanan eo an Micah ej kakajur kij ñan etetal ilo ãt eo etan Jehovah.

Ewi Wãwen Am Maroñ Uak?

• Ekkar ñan Micah 6:​8 (NW), ta eo Jehovah ej aikwiji jen kij?

• Ta eo jej aikwiji elañe jekõnan “ekajet ilo jimwe”?

• Ewi wãwen ad maroñ kwalok “yokwe ilo tiljek”?

• Ta eo ej kitibuj ad ‘etetal ilo inemõn ibben Anij’?

[Pija ko ilo peij 17]

Meñe wãwen ko renana rar walok ilo ran ko an, Micah ear bokake kien ko an Jehovah. Kwomaroñ kõmman eindein bareinwõt

[Pija eo ilo peij 19]

Jerbale ekajet jimwe ilo ad kwalok nan ibben armij ro otemjej

[Pija ko ilo peij 19]

Kwalok yokwe ilo tiljek ilo am kabwe aikwij ko an armij ro jet

[Pija eo ilo peij 19]

Kwon kõmman men ko joñan wõt am maroñ im kile ilo inemõn ewi joñan maroñ ko am