Jen Anõke Ri Kanaan Ro—Maika
1. (1) Ta kajjitõk eo Maika emaroñ kar l̦õmn̦ak kake? (2) Etke men ko ear kwal̦o̦k naan kaki rar lukkuun m̦ool?
1 ‘Ñããt eo enaaj itok jem̦l̦o̦kin jukjukun pãd in enana?’ Ri kanaan Maika emaroñ kar bar l̦õmn̦ak kõn kajjitõk in. Ilo tõre in, ear jiroñ armej ro kõn iien eo Jeova enaaj bõktok ekajet ioon bwij ko joñoul bwijjin Israel im bwij ko ruo bwijjin Juda im Benjamin. Men ko Maika ear kwal̦o̦k naan kaki ear tõmaki im rar m̦ool. Maika ear mour ilo iiõ eo 740 ke ear jeepepl̦o̦k aelõñ in Sameria ãinwõt an kar Jeova ba. (Mai. 1:6, 7) Tokãlik, Jerusalem ear jeepepl̦o̦k ilo iiõ eo 607. (Mai. 3:12) Ke jej kõttare iien eo Jeova enaaj ko̦kkure jukjukun pãd in, ilo wãween et jemaroñ ãinwõt Maika?
2. Ilo wãween et jej kijenmej wõt ke jej kõttare raan eo an Jeova im etke?
2 Kijenmej Wõt: Maika ear je: “Ak kõn ña, Inaaj reilo̦k ñan Jeova; inaaj kõttar Anij in aõ lo̦mo̦o̦r. Aõ Anij enaaj roñjake eõ.” (Mai. 7:7) Em̦ool bwe Maika ear jab baj pãd wõt im kõttar an itok jem̦l̦o̦kin. Maika ear poub wõt ilo jerbal eo an ãinwõt ri kanaan an Jeova. Ke jej kõttare tok raan eo an Jeova, jej aikuj lale bwe ‘mour ko ad ren kwõjarjar im jen aji ñan Anij.’ (2 Pi. 3:11, 12, UBS) Jeova ej kijenmej wõt kõnke ekõn̦aan letok iien bwe armej ro ren ukel̦o̦k. (2 Pi. 3:9) Kõn men in, jej aikuj bar anõke ri kanaan ro ilo ad kijenmej wõt.—Jem. 5:10.
3. Etke jej aikuj akwel̦ap ippãn Jeova bwe en letok kajoor eo an?
3 Atartar Ioon Kajoor eo an Jeova: Jerbal eo an Maika ear lukkuun pen. Jekdo̦o̦n ak ear reilo̦k ñan Jeova bwe en jipañe ñan kajejjet jerbal in. (Mai. 3:8) Jeova ejel̦ã bwe jej aikuji kajoor eo an. Eñin unin Baibõl̦ ej rõjañ kõj bwe jen kajjitõk jipañ ippãn. Jeova ej m̦õn̦õn̦õ in kakajoor ro rej kijel̦o̦k im m̦õk bwe ren maroñ kajejjet jerbal ko aer ilo doulul eo an. (Sam 84:5, 7; Ais. 40:28-31) Em̦õj ke am̦ iioone an Jeova jipañ eok ilo wãween in? Emmakijkij ke am̦ kajjitõk bwe Jeova en jipañ eok ikijjeen kajoor eo an?—Luk 11:13.
4. Etke joñak eo an Maika elukkuun em̦m̦an ñan kõj rainin?
4 Men eo ear aorõktata ilo aolepen mour eo an Maika ej ñan kõm̦anm̦an ankilaan Anij. Ear jek ilo bũruon bwe enaaj dãpij wõt an tiljek jekdo̦o̦n ñe ear lukkuun l̦ap nana ilo tõre ko. Ãindein, jen aolep iien dãpij wõt ad tiljek. Kõn men in, jen l̦oor wõt pepe eo ad ñan etetal “ilo etan Jeova, Anij eo ad, ñan indeeo im indeeo.”—Mai. 4:5.