Ta eo Jej Aikuj Koñm̦m̦ane ñan Jel̦ã Kõttar Jeova?

1. Ta eo emaroñ kõm̦m̦an ad m̦õk in kõttar an Jeova naaj bõktok jem̦l̦o̦kin jukjukun pãd in an Setan?

EAR jino raan ko ãliktata an jukjukun pãd in an Setan ilo kar 1914 eo. Eñin iien eo Jijej ear jino an Kiiñ ilañ. Im ilo iiõ in, ear wal̦o̦k juon tarin̦ae ilañ im Jijej ear jolal̦tak Tepil̦ eo im enjel̦ ro an renana ñan lal̦ in. (Riit Revelesõn 12:7-9.) Setan ejel̦ã bwe “jidik wõt iien” ippãn. (Revelesõn 12:12) Bõtab, jet rej ba bwe emootl̦o̦k de 100 iiõ ak ejjañin jako Setan im jukjukun pãd in an. Ãindein ke bar kõj? Jej ke m̦õk in kõttar an Jeova bõktok jem̦l̦o̦kin jukjukun pãd in an Setan?

2. Ta kajjitõk ko katak in enaaj jipañ kõj ñan lo uwaakier?

² Ekauwõtata ñe jej jino m̦õk in kõttar. Etke? Kõnke men in emaroñ kõm̦m̦an bwe jen jab l̦õmn̦ak m̦okta jãn ad kõm̦m̦an pepe. Kõn men in, ta eo emaroñ jipañ kõj bwe jen jel̦ã kõttar Jeova? Eokwe katak in enaaj jipañ kõj ñan jel̦ã uwaakin kajjitõk kein. (1) Ta eo jemaroñ katak jãn joñak eo an ri kanaan Maika kõn an kar jel̦ã kõttar? (2) Ta men ko renaaj wal̦o̦k im renaaj kaalikkar bwe jem̦l̦o̦kin raan ko ãliktata epaak? (3) Ilo wãween et jej kwal̦o̦k ad kam̦m̦oolol Jeova kõn an kijenmej im meanwõd ippãn armej ro?

TA EO JEMAROÑ KATAK JÃN JOÑAK EO AN MAIKA?

3. Ta ko Ri Israel ro rar kõm̦m̦ani ilo raan ko an Maika?

³ Riit Maika 7:2-6. Ri kanaan eo an Jeova Maika, ear lo bwe Ri Israel ro rar jakol̦o̦k aer tiljek ñan Jeova. Im ilo iien eo ke Kiiñ Ehaz ear irooj, rar kõm̦m̦ani men ko rekanooj nana. Maika ear keidi Ri Israel rein me rar jab tiljek ñan kãlõklõk ko me remaroñ lõke juon armej im kajorrããne. Rein rar ãinwõt kãlõklõk ko kõnke ear nana aer kõm̦m̦an ñan ro jet im rar bõktok jorrããn iooer. Joñan an kar nana men ko rar wal̦o̦k ilo iien in, ear bar dikl̦o̦k an baam̦le ko yokwe doon. Maika ear kile bwe ejjel̦o̦k men en̦ ear maroñ kõm̦m̦ane. Eñin unin ear jar ñan Jeova jãn aolepen bũruon kõn men kein me rar wal̦o̦k. Innem, ear kõttar wõt bwe juon iien Anij enaaj jol̦o̦k men kein renana. Maika ear lukkuun tõmak im kõjatdikdik bwe Jeova enaaj jol̦o̦k men ko renana ilo iien eo em̦õj an karõke.

4. Ta jet iaan apañ ko jej iiooni?

⁴ Ãinwõt Maika, jej bar mour ibwiljin armej ro renana im rej l̦õmn̦ak wõt kõn er make. Elõñ iaaer rejaje kam̦m̦oolol, rejjab yokwe ro nukwier, im rej ri ketak. (2 Timote 3:2-4) Emaroñ pen ñe armej ro me jej jerbal ippãer, jikuul̦ ippãer, im jokwe iturier rej l̦õmn̦ak wõt kõn er make. Bõtab, jet iaad jej jelm̦aiki juon mãlejjoñ el̦apl̦o̦k an pen. Jijej ear ba bwe rũkal̦oor ro an renaaj iioon jum̦ae im matõrtõr jãn baam̦le ko aer. Naan ko an rar ãinl̦o̦k wõt naan ko ilo Maika 7:6. Jijej ear ba: “Iar itõn kõm̦m̦an bwe l̦õm̦aro ren jum̦ae jemãer, im lim̦aro ren jum̦ae ro jineer, im kõrã ro rej pãlele ren jum̦ae jinen l̦õm̦aro pãleer; Ri kõjdat ro rel̦l̦aptata an juon armej naaj ro nukũn.” (Matu 10:35, 36, UBS) Ñe baam̦le ko ad me rejjab karejar ñan Jeova rej kajjirere im jum̦aiki kõj, men in ej juon mãlejjoñ ekanooj pen. El̦aññe jej iioon wãween in, jej aikuj kate kõj im jab ebbeer. Jej aikuj tiljek wõt ñan Jeova im kõttar iien eo enaaj jol̦o̦k apañ in jej iioone. El̦aññe jej jar aolep iien bwe en jipañ kõj, enaaj kakajoor im jipañ kõj ñan jel̦ã ta eo jen kõm̦m̦ane bwe jen maroñ tiljek wõt ñan E.

5, 6. (1) Ewi wãween an kar Jeova kajeraam̦m̦ane Maika? (2) Ta eo Maika ear jab loe an jejjet kitien?

⁵ Jeova ear kajeraam̦m̦ane Maika kõn an kar jel̦ã kõttar. Ewi wãween? Maika ear lo iien eo ear jem̦l̦o̦k an kiiñ eo enana Ehaz tõl armej in Israel. Im ear loe an Hezekaia, likao eo em̦m̦an nejin Kiiñ Ehaz, jino an kiiñ im jipañ Ri Israel ro ñan jepl̦aak im kabuñ ñan Jeova. Maika ear bar lo an jejjet kitien kanaan eo ear je kõn Sameria ak ãne eo ãnen bwij ko joñoul an Ri Israel ro ke Ri Assiria ro rar nitbwili bwij kein.​—Maika 1:6, UBS.

⁶ Bõtab, Maika ear mej m̦okta jãn an kar lo an jejjet aolep kanaan ko jet me Jeova ear kõm̦akũt e ñan jei. Ñan waanjoñak, Maika ear je im ba: “Ilo raan ko ãliktata, renaaj kapen tol̦ in m̦õn Jeova bwe en bõran tol̦ ko, im renaaj kautieje jãn bat ko, im armej renaaj ibebl̦o̦k ñane. Im elõñ aelõñ renaaj itok im ba, ‘Itok, im jen wanlõñl̦o̦k ñan tol̦ in Jeova.’” (Maika 4:1, 2) Maika ear mej m̦okta jãn an jejjet kanaan in. Bõtab, ear tiljek wõt ñan Jeova m̦ae iien eo ear mej jekdo̦o̦n ta ko armej ro ear mour ibwiljier rar kõm̦m̦ani. Ear je naan kein: “Meñe armej rej etal, jabdewõt iaaer, ilo etan anij ko aer; kõj, jenaaj etal ilo etan Jeova, Anij eo ad, ñan indeeo im indeeo.” (Maika 4:5) Maika ear kõttar wõt im kijenmej ium̦win iien ko reppen kõnke ear lukkuun tõmak bwe Jeova enaaj kajejjet aolep kallim̦ur ko An. Ri kanaan in etiljek ear lõke Jeova.

7, 8. (1) Etke ewõr unin ad aikuj lõke Jeova? (2) Ta eo enaaj kõm̦m̦an bwe en ãinwõt ñe em̦õkajl̦o̦k an itok jem̦l̦o̦kin?

⁷ Jej ke lõke Jeova ãinwõt kar Maika? Eokwe, ewõr unin ad aikuj lõke e. Juon ej kõnke em̦õj ad loe an jejjet kitien kanaan eo an Maika kõn ta eo enaaj wal̦o̦k ilo raan kein ãliktata. Ilo raan kein, elõñ milien armej jãn aelõñ, bwij, im kajin otemjej rej ibebtok ñan “tol̦ in m̦õn Jeova.” Meñe rein rej itok jãn aelõñ ko me ekkã aer tarin̦aeik doon, ak ri karejar rein an Jeova em̦õj aer “noe jãje ko aer bwe ren kein poktak bwidej,” im rem̦akoko in bõk kun̦aaer im “katak tarin̦ae.” (Maika 4:3) Jelukkuun jeraam̦m̦an bwe jej uwaan armej ro an Jeova me reaenõm̦m̦an!

⁸ Kõj aolep jekõn̦aan bwe Jeova en bõktok jem̦l̦o̦kin jukjukun pãd in enana kiiõ wõt. Bõtab, jej aikuj in jel̦ã kõttar. Ñan jipañ kõj ñan kijenmej im kõttar wõt, jej aikuj bõk l̦õmn̦ak eo an Jeova kõn men in. Em̦õj an kããlõt Jijej Kũraij bwe en ekajete armej ro, im ededel̦o̦k an Jeova pepe kõn ñããt eo enaaj bõktok jem̦l̦o̦kin jukjukun pãd in enana. (Jerbal 17:31, UBS) Ak m̦okta jãn an bõktok raan in kwi eo an, Anij ej kõtl̦o̦k iien ñan an aolep armej katak Baibõl̦ “bwe ren itõm jel̦ã m̦ool” eo. Ej bareinwõt kõtl̦o̦k iien ñan aer oktak im mour ekkar ñan men ko rej katak kaki, im bwe ren bõk lo̦mo̦o̦r. Jej aikuj keememej bwe mour ko an armej rej pãd ilo kauwõtata. (Riit 1 Timote 2:3, 4.) M̦õttan wõt jidik im enaaj itok jem̦l̦o̦kin. El̦aññe jej poub wõt im katak ippãn armej ro bwe ren jel̦ã kõn Jeova, jenaaj l̦ak lale ãinwõt ñe em̦õkajl̦o̦k an itok raan eo an Jeova. Im ñe ej itok, jenaaj m̦õn̦õn̦õ bwe jaar poub im m̦ad wõt kõn jerbal in kwal̦o̦k naan!

TA KO RENAAJ WAL̦O̦K IM RENAAJ KAALIKKAR BWE EPAAK JEM̦L̦O̦KIN?

9-11. Enañin ke jejjet kanaan eo ilo 1 Tessalonika 5:3? Etke?

⁹ Riit 1 Tessalonika 5:1-3. M̦õttan jidik ri aelõñ ko renaaj ba, “Aenõm̦m̦an im ejjel̦o̦k unin lõl̦ño̦ñ!” El̦aññe jejjab kõn̦aan bwe jen tõmak im po ilo l̦õmn̦ak in ebõd, eokwe jej aikuj “emmej im ekkõl” wõt. (1 Tessalonika 5:6, UBS) Kiiõ jenaaj bwebwenato kõn jet iaan men ko em̦õj aer wal̦o̦k im rej tõll̦o̦k ñan iien eo ñe armej ro renaaj ba, “Aenõm̦m̦an im ejjel̦o̦k unin lõl̦ño̦ñ!”

¹⁰ Ãlikin kar pata eo an lal̦ kein kajuon im kein karuo, aelõñ ak kien ko ipel̦aakin lal̦ rar lukkuun kõn̦aan bwe en wõr aenõm̦m̦an. Innem ta eo rar kõm̦m̦ane? Eokwe, rar kajutak doulul eo etan League of Nations bwe en kõm̦m̦an aenõm̦m̦an. Tokãlik, ãlikin pata eo kein karuo, armej ro rar likũt aer kõjatdikdik ioon doulul eo etan United Nations bwe en bõktok aenõm̦m̦an ipel̦aakin lal̦ in. Ri kien ro im ri tõl in kabuñ ko rar lõke doulul kein ruo. Ñan waanjoñak, United Nations ear kõjjel̦ã bwe ilo 1986 enaaj Iiõ in Aenõm̦m̦an eo Ipel̦aakin Lal̦. Im ilo iiõ in 1986, elõñ ri tõl in kien im kabuñ ko rar kweilo̦kl̦o̦k ippãn ri tõl eo eutiej an kabuñ in Katlik bwe ren jar kõn aenõm̦m̦an.

¹¹ Meñe rar kõm̦m̦ane men in im men ko jet ñan bõktok aenõm̦m̦an, ak ejjab iien ko kein im ear jejjet kanaan eo ilo 1 Tessalonika 5:3 me ri aelõñ ko renaaj ba, “Aenõm̦m̦an im ejjel̦o̦k unin lõl̦ño̦ñ!” Etke? Kõnke ekkar ñan eoon in ãlikin wõt an armej ro ba naan kein, eokwe naaj ‘ko̦kkure er ilo idiñ’ ak jidimkij. Bõtab, men in ejjañin wal̦o̦k.

12. Ta eo jejel̦ã kake ñe renaaj ba, “Aenõm̦m̦an im ejjel̦o̦k unin lõl̦ño̦ñ”?

¹² Wõn ro renaaj ba, “Aenõm̦m̦an im ejjel̦o̦k unin lõl̦ño̦ñ”? Ta naaj ijo kun̦aan ri tõl in kabuñ ko me rej ba er Kũrjin im ri tõl ro jãn kabuñ ko jet rewaan ilo men in? Ta eo kien ko an lal̦ in renaaj kõm̦m̦ane? Eokwe Baibõl̦ ejjab kwal̦o̦k ñan kõj. Ak jejel̦ã bwe jekdo̦o̦n ewi wãween aer naaj kwal̦o̦k naan in kõjjel̦ã in im jekdo̦o̦n ewi joñan an naaj em̦m̦an, ak eban m̦ool in “aenõm̦m̦an im ejjel̦o̦k unin lõl̦ño̦ñ.” Ilo iien in, aolepen lal̦ in enaaj pãdwõt ium̦win pein Setan. Im toon wõt an Setan tõl, eban em̦m̦anl̦o̦k lal̦ in ak enaaj ãindein wõt an nana. Ekabũrom̦õjm̦õj wõt ñe jenaaj oktak im tõmak naan in etao ko an Setan im bõk kun̦aad ilo m̦akũtkũt ko an lal̦ in!

13. Etke enjel̦ ro rej dãpij kõto ko ilo kõkkar?

¹³ Riit Revelesõn 7:1-4. Ilo tõre in me jej kõttar an jejjet kanaan eo ilo 1 Tessalonika 5:3, enjel̦ ro rekajoor rej dãpij wõt kõto ko ilo kõkkar me renaaj kõtl̦o̦ki ilo eñtaan eo el̦ap. Ta eo enjel̦ rein rej kõttare? Rijjilõk Jon ear je im ba bwe rej kõttare iien sil eo ãliktata an ‘ro ri karejeran ad Anij’ ak ri kapit ro.a (Lale kõmel̦el̦e eo itulal̦.) Ãlikin an wal̦o̦k men in, enjel̦ rein rej kab naaj kõtl̦o̦k kõto kein im enaaj jino eñtaan eo el̦ap. Innem ta eo enaaj wal̦o̦k?

14. Ta eo ej kwal̦o̦k bwe m̦õttan jidik naaj ko̦kkure Babil̦on eo El̦ap?

¹⁴ Naaj ko̦kkure Babil̦on eo El̦ap me ej kõkkar kõn aolep kabuñ ko reriab im enaaj jako. Ñe men in ej wal̦o̦k, ejjel̦o̦k juon enaaj maroñ jipañe. Jej loe kadede kakõl̦l̦e ko im rej kaalikkar bwe m̦õttan wõt jidik naaj ko̦kkure Babil̦on El̦ap. (Revelesõn 16:12, UBS; 17:15-18; 18:7, 8, 21) Ilo nuuj ko, ekkã ad roñ aer kananaiki kabuñ ko im ri tõl ro aer, im edikl̦o̦k an armej tõmak im rejetake er. Meñe ãindein ak ri tõl in kabuñ kein rej l̦õmn̦ak bwe rejjab pãd ilo kauwõtata. Bõtab relukkuun bõd! Ãlikin wõt an wal̦o̦k kõjjel̦ã in, “Aenõm̦m̦an im ejjel̦o̦k unin lõl̦ño̦ñ!” kien ko renaaj oktak im ko̦kkure kabuñ kein reriab im jol̦o̦k er. Im Babil̦on eo El̦ap enaaj jako ñan indeeo! Kõn men in, ekadkin wõr tokjãn ad kijenmej im kõttar wõt bwe jen maroñ loe an wal̦o̦k men kein.​—Revelesõn 18:8, 10.

ILO WÃWEEN ET JEJ KWAL̦O̦K AD KAM̦M̦OOLOL ANIJ KÕN AN KIJENMEJ IM MEANWÕD?

15. Etke Jeova ejjañin bõktok jem̦l̦o̦kin jukjukun pãd in?

¹⁵ Meñe armej ro rej kõm̦m̦ani men ko renana im rej kattoone etan Anij, ak ej kijenmej wõt ippãer ñan iien eo enaaj bõktok jem̦l̦o̦kin jukjukun pãd in. Etke? Kõnke Jeova ejjab kõn̦aan bwe jabdewõt armej me em̦m̦an bũruon en jako. (2 Piter 3:9, 10) Ãindein ke am̦ bar l̦õmn̦ak? M̦okta jãn an itok jem̦l̦o̦kin jukjukun pãd in, elõñ men ko jemaroñ kõm̦m̦ani ñan kwal̦o̦k ad kam̦m̦oolol Jeova kõn an kijenmej im meanwõd.

16, 17. (1) Etke jej aikuj jipañ ro rem̦õjn̦o̦ im eto aer jab bar kwal̦o̦k naan? (2) Etke eaorõk bwe rein rem̦õjn̦o̦ ren bar jepl̦aak ñan Jeova im eklejia eo kiiõ?

¹⁶ Jipañ ro rem̦õjn̦o̦ im eto aer jab bar kwal̦o̦k naan. Jijej ear ba bwe el̦ap lañlõñ ilañ ñe juon jiip me ear jebwãbwe ej bar jepl̦aak. (Matu 18:14; Luk 15:3-7) Jeova ej kaorõk wõt ro me rekõn kar yokwe e, im ej yokwe wõt rein meñe rejjab karejar ñan e kiiõ. El̦aññe jej jipañ rein ñan bar jepl̦aak ñan e, men in enaaj kam̦õn̦õn̦õik bũruon Jeova im enjel̦ ro ilañ.

¹⁷ Kwõj ke juon iaan ro me kiiõ ebõjrak an karejar ñan Anij? Bõlen ebõjrak am̦ etal ñan kweilo̦k kõnke juon armej ilo eklejia eo ear kõmetak im kalluuk eok. Bõlen emootl̦o̦k de jet iiõ kiiõ jãn iien eo men in ear wal̦o̦k. Kõn men in, em̦m̦an kwõn kajjitõk ippam̦ make: ‘Em̦m̦anl̦o̦k ke mour e aõ kiiõ? Im̦õn̦õn̦õ l̦o̦k ke? Jeova eo ear kal̦õkatipi ña ke ak juon armej ejjab weeppãn? Ewõr ke juon men enana Jeova Anij ear kõm̦m̦ane ñan kajorrããne ña?’ Aolep iien Jeova ej kõm̦m̦ani men ko rem̦m̦an ñan kõj. Meñe ilo tõre in me jemaroñ jab kõjparok kallim̦ur eo ad bwe jenaaj karejar wõt ñan e, ak ej kõn̦aan wõt bwe jen m̦õn̦õn̦õ kõn men ko rem̦m̦an ear litok ñan aolep armej. (Jemes 1:16, 17) Bõtab, m̦õttan jidik raan eo an Jeova enaaj itok. Kõn men in, ej iien kiiõ ñan ad bar karejar ñan Jemãd, Jeova, eo im el̦ap an yokwe kõj, im jepl̦aak ñan eklejia eo. Etke? Kõnke jikin eo de in ejjab kauwõtata im jemaroñ kone ie ilo raan kein ãliktata.​—Duteronomi 33:27, UBS; Hibru 10:24, 25, UBS.

18. Etke jej aikuj rejetake em̦m̦aan ro rej lale kõj?

¹⁸ Tiljek wõt ilo ad rejetake em̦m̦aan ro rej lale kõj. Ãinwõt juon Jabõt eo ejouj im yokwe, Jeova ej tõl im kõjparok kõj. Em̦õj an jitõñe Nejin bwe en juon Jabõt El̦ap ñan bwij eo ak eklejia ko. (1 Piter 5:4) Elõñ em̦m̦aan ro ilo elõñl̦o̦k jãn 100,000 eklejia ko ipel̦aakin lal̦ in rej lale im kõjparok kajjojo jiip ro an Anij. (Jerbal 20:28, UBS) Ñe jej lukkuun rejetake em̦m̦aan rein, jej kwal̦o̦k ñan Jeova im Jijej bwe jej kam̦m̦oolol erro kõn aolep men ko rej kõm̦m̦ani ñan jipañ kõj.

19. Ta eo jen kõm̦m̦ane bwe Setan en jab anjo̦ iood?

¹⁹ Jen epaake wõt doon. L̦õmn̦ak m̦õk kõn men eo ri tarin̦ae ro etto rekõn kõm̦m̦ane ñe kumi eo juon ej jibadek er. Ilo iien in, ri tarin̦ae ro rej ko̦baj doon bwe en ejjel̦o̦k kõta ñan an kumi eo juon itõm el̦l̦ã iooer. Ilo wãween in, rej ãinwõt juon wõrwõr im enaaj pen an ri kõjdat ro rupe. Ak ta kõn kõj? Eokwe, Setan ej kamaat an maroñ ñan tarin̦aeik armej ro an Anij. Innem, ejjab iien kiiõ ñan ad ellotaane ro jeid im jatid ilo tõmak. Ak ej iien kiiõ ñan ad epaake wõt doon. Kõn men in, jen jab lo nana ko an doon ak jen jol̦o̦k an doon bõd im lõke Jeova.

20. Ta eo jej aikuj kõm̦m̦ane kiiõ?

²⁰ Kõn men in, jen kakajoor wõt kõtaan eo ad ippãn Jeova im kõttar e. Jen kijenmej im kõttar iien eo ñe renaaj ba, “Aenõm̦m̦an im ejjel̦o̦k unin lõl̦ño̦ñ!” im iien eo ãliktata me Anij enaaj sili ri kapit ro. Ãlikin an men kein wal̦o̦k, enjel̦ ro emãn renaaj kõtl̦o̦k kõto ko ilo kõkkar im enaaj jino eñtaan eo el̦ap. Ilo iien in, naaj ko̦kkure im jol̦o̦k Babil̦on eo El̦ap. Innem, ilo ad kõttaretok iien eo men kein renaaj wal̦o̦k, jen l̦oore naan in tõl ko jãn ro em̦õj jitõñ er bwe ren lale doulul eo an Jeova. Jen ippãn doon im jum̦aiki Tepil̦ eo im enjel̦ ro renana! Ej iien kiiõ ñan ad l̦oore naan in kakapilõk in an ri jeje sam ke ear ba: “Kom̦win pen, im bũruomi ren peran, kom̦ otemjej kom̦ij kõjatdikdik kom̦ ilo Jeova.”​—Sam 31:24.